E di dos cambio riba presupuesto 2020; Gobierno ta haci debe manehabel pa pais Aruba no bay den ‘default’

Ayera minister Xiomara Maduro a bin cu informacion riba e di dos cambio haci riba presupuesto 2020 di pais Aruba. E cambio aki a wordo haci meymey di e crisis di salubridad y tambe di falta di likides pa causa di e pandemia cu ta trece cune cu nos scenarionan economico/financiero ta cambia constantemente.

Teniendo na cuenta cu nos economia ta depende principalmente di turismo, ora cu pais Aruba a cera nos frontera, esaki a nifica un golpi pa nos economia. El a bisa cu e diferente escenario aki a keda valida pa IMF (Fondo Monetario Internacional) y tambe Banco Central di Aruba (CBA) su scenario ta yega na e mesun conclusion cu esun presenta pa gobierno.

Pero ora cu frontera a habri e scenarionan aki tambe a cambia hunto cune. E caida di nos economia cu a wordo premira di alrededor di un 44%, esaki a bira menos, segun e mandatario. Unabes cu gobierno finalisa e scenarionan aki di presupuesto 2020 lo bay Parlamento pa hustifica e presupuesto aki. Sinembargo e cambionan aki a yega Parlamento caba.

A pesar di tur componente presenta den e version aki di presupuesto 2020, no ta tur ta bay wordo realisa debi na e situacion di likides. Un concepto nobo cu no tabata den e gasto di e prome version di presupuesto 2020 ta e fondo pa subsidio salario.

El a splica cu tin cos cu lo wordo temporisa y hala pa proximo aña. Pero na momento cu e presupuesto 2020 lo wordo trata den Parlamento, gobierno lo bini cu informacion mas detaya y escenario mas actualisa, el a bisa. Tambe cierto debenan internacional di pais Aruba nan a hala nan dilanti, y esun local tambe pa haci e debe manehabel y pagabel pa pais Aruba pa nos no keda ‘default’ sin paga nos debenan y drenta den un problema mas grandi.

El a bisa cu e deficit ta mas chikito cu esun premira. Ya caba recientemente nan a haci un presentacion den Parlamento riba entrada di 1.004 miyon florin y gasto di 2118 miyon florin. E presupuesto aki ta registra un necesidad financiero di 1.410 miyon florin, y un deficit financiero di 1.114 miyon florin, cual ta un 28% di nos producto interno bruto (GDP).

E gasto mas grandi di presupuesto di pais Aruba ta esun di personal cu ta registra 442 miyon den e di dos version di presupuesto 2020. Minister Maduro a bisa cu nan a purba como gobierno mantene e gastonan aki mas abao cu ta posibel, y tambe pospone algun inversion pa otro aña, pa asina gobierno por haya espacio pa maneha e situacion cu pais Aruba ta pasando aden debi na e pandemia aki.