Segun minister Xiomara Maduro: “Posicion di florin no ta na peliger”

Minister di Finanzas, Asunto Economico y Cultura, Xiomara Maduro citando reportahe reciente di Banco Central di Aruba (CBA) a bisa cu Aruba no tin niun indicacion cu nos tin problema cu divisa. Y niun indicacion cu esaki ta bay trece nos florin den peliger.

Di e forma aki el a reacciona despues cu a tuma nota di un publicacion cu a sali ayera den e matutino aki. E articulo aki dr. Arjen Albert a papia, entre otro riba posicion di nos florin en bista cu nos entrada di divisa a cay debi cu nos principal fuente di divisa cu ta turismo a cay drasticamente. Mientras cu gobierno a bin cu emision di bono na florin pa nos mercado local cu ta pone miyones di florin circula, sin cu tin divisa ta drenta producto di turismo.

E mandatario a bisa cu e manera con e declaracion di dr. Albert a wordo poni, ta trece den comunidad e preocupacion si ta berdad cu nos divisa ta den problema, y tambe riba posicion di florin. Siendo cu nan cu ta maneha e tipo di informacion aki, no tabatin niun motibo pa duda den locual CBA ta raporta na e propio conseho di minister di Reino. CBA ta indica cu den escenario mas malo mes, nos florin ta salvaguardia.

El a splica cu nan a bin cu e bono emiti pa gobierno den dos valuta den florin y den dollar, pa tene na cuenta e posicion di divisa. Den otro articulo publica den nos edicion di awe, e matutino aki ta bay mas den detaye riba e mandatario su declaracion rond di e bononan aki.

Banda di esey, el a bisa cu CBA ta raporta cada luna na locual ta conseho di minister di Reino ariba e posicion di divisa di nos pais. Recientemente dia 18 di september, CBA a bin cu su reportahe unda nan ta indica cu hasta den e scenario di mas malo, toch ‘e nivel di divisa ta keda adecuado’. Tur esaki conforme na exigencianan internacional.

E mandatario a indica cu dr. Albert tabata consehero tempo di ex minister di Finanzas, Tico Croes; y aworaki e ta trahando como consehero di minister di Salubridad na St. Maarten. “P’esey mi ta lamenta si cu nan ta mete den politica local…,” el a bisa. El a expresa cu tur respet cu Sr. Albert por papia di e situacion di St. Maarten, “pero por fabor laga e situacion di Aruba pa gobierno di Aruba y instancianan di Aruba, y expertonan di Aruba duna nan opinion ariba dje.”

Aunke e ponencia di dr. Albert publica den Bon Dia Aruba ta a base di un investigacion haci pa su tesis como PhD, pero e ta haya cu cada un di nos tin e responsabilidad di no crea un crisis mas grandi cu ya caba tin.