E aña aki United Nations World Tourism Organization (UNWTO) ta celebra dia di turismo mundial cu e tema “Desaroyo Urbano”. E celebracion di turismo y desaroyo urbano, ta enfatisa e capacidad unico cu e sector aki ta ofrece den desaroyo economico y ta duna oportunidad na districtonan y comunidadnan pafo di ciudad cu no ta ricibi debido atencion.
Tambe e ta demostra e importancia di e rol cu turismo ta hunga, ora ta trata di perseverancia y promocion di cultura y patrimonio rond mundo.
Den e siman tras di lomba, Tourism Corporation Bonaire (TCB) a presenta un video educativo demostrando e diferente ofishinan cu tin den e sector turistico na scolnan basico di grupo 5 te cu 8.
E meta di e video ta pa e hobennan por mira con nan por converti nan interes of hobby den un profesion den e sector turistico, den futuro. E video aki tambe a ser lansa riba e pagina di Facebook di TCB.
Alabes, TCB den colaboracion cu e autor Denise de Jong-Rekwest, a crea un buki titula “Turismo na Boneiro, Bo Futuro!”, caminda cada capitulo ta ilustra diferente elemento den e sector turistico. Scolnan basico lo ricibi e buki aki den futuro binidero, ya asina cada studiante entre grupo 5 te cu 8 por amplia nan conocemento di turismo na Boneiro y sa cua ta tur e actividadnan cu tin pa ofrece na turistanan.
TCB ta pone enfasis riba conscientisacion y crecemento di interes bou di hobennan pa un posibel carera den e sector turistico den futuro.
