Douglas S. Reed, PhD, autor di e articulo aki, ta un cientifico cu ta studia malesa infeccioso specialisando den infeccion respiratorio severo. Tambe ta sirbi como un miembro di team di seguridad di su iglesia. Durante ultimo simannan mientras estadonan a cuminsa reduci restriccionnan, nan ta discutiendo con pa cuminsa servicio religioso di nobo di forma sigur.

Pero e coronavirus ta leu di bay. Mientras ta purba di haya un manera pa tene servicio mientras ta protege nan miembronan, un pregunta ta keda un preocupacion particular: Con comun ta e transmision aereo di e virus?

Con pa transmiti un virus

Infeccion respiratorio generalmente ta plama den tres forma posibel: di contacto directo; di droplet; y di particula den aire.

Transmision via contacto ta sucede ora un persona ta toca un obheto cu tin virus bibo riba dje – yama un fomite – y ta bira malo.

Droplet ta particula chikito di mucus of slijm cu ta sali di boca of nanishi di un persona ora ta tosa of papia. Nan ta varia den tamaño entre 5 micron te centenares di micron den diameter – for di tamaño di un cel cora te un grano di santo. Mayoria di droplet, particularmente esnan grandi, ta cay riba suelo dentro di algun seconde y usualmente no ta biaha mas di 1 pa 2 meter. Si un persona tosa riba bo y bo bira malo, esey ta transmision via droplet.

Transmision via aire ta sucede pa motibo di e particulanan den aire conoci como droplet nuclei. Droplet nuclei ta cualkier pida di mucus of slijm mas chikito cu 5 micron. Hende ta produci droplet nuclei ora di papia, pero tambe por forma ora droplet chikito ta evapora y bira chikito. Mayoria di e dropletnan aki ta bira asina chikito cu nan ta cuminsa flota prome cu cay riba suelo, pues nan ta bira aerosol.

Hende ta produci miles di e droplet nuclei aki per seconde ora di papia, y e particulanan den aerosol por contene virus bibo y flota den aire pa varios ora. Nan ta facil pa inhala, y si nan contene virus bibo, hende por bira malo. E habilidad di e droplet nuclei pa transmiti coronavirus tin un impacto enorme riba si un luga manera un iglesia por habri back.

Na cuminsamento di e pandemia, expertonan na e Centro pa Control y Prevencion di Malesa Mericano (CDC) y Organisacion Mundial di Salud (WHO) tabata principalmente preocupa cu coronavirus ta transmiti via superficienan y droplet grandi.

Pero mientras ta haci mas investigacion riba SARS-CoV-2, tin mas evidencia cu transmision aereo ta tuma luga, maske esaki ta controversial. Tanto CDC como WHo awo ta recomendando pa poblacion general bisti tapaboca, pero pa hende cu ta bibando nan bida y puntrando con pa habri areanan publico rond mundo back, e pregunta ta keda: Con importante transmision aereo ta?

Longetividad aereo den laboratorio

Pa bira infecta, un persona mester bin den contacto cu e virus bibo. Si e virus muri prome cu un persona inhala esaki, nan no lo bira malo.
Pa test con bon SARS-CoV-2 por biba den aire, investigadonan a usa ekipo special pa crea virus den aerosol y tine den aire pa periodonan largo di tempo. Investigadonan despues por tuma muestranan di e virus y mira con bon esaki ta keda bibo den un aerosol. Un estudio inicial di investigadonan na e Instituto Nacional di Salud a tene e virus den aire pa cuatro ora y a haya e virus bibo henter e rato. Un estudio subsecuente den cual Reed a participa a haya cu e coronavirus por keda bibo pa hasta 16 ora den aire.

Ni e estudio inicial ni esun den cual Reed a participa a midi e impacto di temperatura, humedad, luz ultra violeta of contaminacion riba e sobrevivencia di virus den aerosol. Tin evidencia cu luz di solo artificial por inactiva 90% di virus SARS-CoV-2 den slijm riba superficienan of den aerosol dentro di shete minuut. E estudionan aki ta sugeri cu e virus lo ta inactivo rapidamente pafo, pero e riesgo di transmision paden ta continua.

Evidencia di mundo real

Estudionan di laboratorio por duna informacion valioso, pero e escenarionan den mundo real ta mustra riba e riesgo berdadero di transmision aereo.
Reportenan di China, Singapore y Nebraska a haya cu e virus den camber di pashent, y den nivelnan abao den e sistema di ventilacion den hospitalnan unda a trata pashentnan di Covid-19.

E reporte di China tambe a haya evidencia di e virus na entrada di un tienda. Te awo, e muestranan aki a ser haci usando test di reaccion di polymerase, cual ta busca pidanan di DNA viral, no e virus bibo. Nan no por bisa investigadonan si loke nan ta hayando ta infeccioso.

Pa evidencia directo di e riesgonan di transmision aereo, nos por mira algun estudionan di caso na Merca y den exterior.

Un estudio a track con un solo persona infecta na un call center na Sur Korea a infecta 94 otro persona. Tambe tin e caso ampliamente reporta di un persona infecta na un restaurant na Guangzhou, China, transmitiendo e virus na nuebe otro persona pa motibo di e fluho di aire crea pa un unidad di airco den e camber.

Lo mas impactante, probablemente, particularmente pa Reed mientras e ta contempla con pa habri su iglesia back, ta un ehempel di un coro di iglesia na Skagit County, Washington. Un individuo cantando den practica di coro a infecta 52 otro persona. Cantando y vocalisando en general por produci hopi aerosol, y evidencia ta mustra cu algun persona ta ‘super-emisor’ di aerosol hasta durante habla normal. Ta probable cu algun infeccion den e incidente aki a tuma luga door di droplet of contacto directo, pero e hecho cu un solo persona tabata capaz di infecta asina hopi hende, fuertemente ta sugeri cu transmision aereo tabata e factor impulsando e brote aki.

Un documento publica apenas siman pasa a compara e exito di medidanan di mitigacion – manera distancia social y bistimento di tapaboca – pa purba determina con ta transmitiendo e virus. E autornan ta conclui cu transmision aerosol tabata e ruta dominante. E conclusion aki ta debati fuertemente den comunidad cientifico, pero e estudio aki y otronan ta mustra e efectividad di tapaboca den transmision di Covid-19.

E evidencia fuertemente ta sugeri cu transmision aereo ta tuma luga facilmente y probablemente ta un factor significante den impulso di e pandemia aki. Mester tuma esaki seriamente mientras hende ta cuminsa sali back den mundo.

Afortunadamente, tin un manera facil – maske no perfecto – pa reduci transmision aereo: tapaboca. Ya cu hende por transmiti e virus na momento cu nan ta pre-sintomatico of asintomatico, bistimento di tapaboca universal ta hopi efectivo, un manera barata pa reduci e pandemia.

Ya cu e riesgo principal ta paden, aumento di ventilacion y no recircula aire paden di edificionan por elimina e virus di un ambiente paden mas lihe.