Parlamentario Mike de Meza (AVP): Minister Dangui ta aproba retironan pa despues desaproba mesun retironan na AAA

For di prome dia di gabinete Wever Croes, a resalta e hecho cu pueblo di Aruba a haya un gobierno cu tabatin un vision con pa goberna e pais aki.

Parlamentario di fraccion di AVP, sr Mike de Meza a mustra cu den prome lunanan pueblo a conoce un gabinete Wever Croes, cu a dicidi di no cumpli cu cantidad di promesa cu e tres partidonan cu ta sostene gobierno, a haci durante di campaña electoral.

De Meza a mustra cu e prome medida tabata pa re-introduci un aumento di BBO, apesar cu ta mesun gobierno aki a sigura pueblo cu e lo drecha finansa di gobierno sin cu e tin cu tuma medida.

“Cantidad di otro cos nan a priminti pero despues di tres aña den gobernacion, ningun di esakinan a bira realidad, al contrario pueblo ta realisando mas y mas cu e tin un gobierno dirigi pa Prome Minister Evelyn Wever Croes, cu solamente a ranca placa for di cartera di tur hende sin duna absolutamente nada al cambio. Awor den e pandemia serio di corona virus, tin negociacionnan andando entre gerencia di AAA, caminda a dicidi cu na aeropuerto un grupo di 70 trahado cu tin cu wordo manda cas dentro di algun dia y caminda tin negociacionnan tumando luga caba cu sindicato.

Ya caba tin algun trahado a acepta un pakete di retiro cu gerencia a ofrece pero ainda tin un grupo grandi cu tin cu bay cas, mama y tata di famia cu ta bay perde nan entrada di tur luna, pa colmo mey mey di un pandemia cu ya caba a afecta nan caba dor di reduccion di salario cu nan mester a entrega pa motibo di e pandemia. Retira trahadonan den un tempo asina aki, ta un crimen mayor, sigur ora cu ta trata di un di e companianan estatal cu tur aña a draai cu miyones di ganashi, cu ta un di e companianan estatal solido financieramente.

Sigur ora cu tuma nota cu Triple A a haya un fiansa di 500 miyon pa ehecucion di plan di ampliacion di su facilidadnan, cual ta duna un muestra con solido e compania aki ta.

Awor nos por a scucha Minister Dangui Oduber bin dilanti y hunga pa santo, bisando cu ta falta di gobierno anterior cu a yena AAA cu simpatisante di partido. Despues cu ministro Dangiu Oduber a realiza cu ta bow di su maneho a yena AAA cu trahador awor e ta bisando cu gobierno lo no acepta ningun peticion di retiro di ningun trahado di aeropuerto, cual ta un reaccion cu no ta basa riba honestidad y sinceridad caminda e Minister kier duna e impresion cu su persona y ni su gobierno, tabata na altura di e desaroyo aki.

Gobierno ta unico accionista den Triple A, pues un decision asina drastico di manda 70 trahado cas, Hunta di Comisario cu gobierno a nombra na aeropuerto y e mes como minister, mester tabata na altura y lo mester a bay di acuerdo cu e decision aki pa manda mama- y tatanan cas den e tempo dificil aki. Pues Minister Dangui Oduber mes tabata bon na altura mescos cu su gobierno, cu e retironan aki tabata pa bin! Pa colmo henter e proceso aki tin algun luna caba andando, ya cu trahadonan a haya un pakete di retiro te cu algun di nan a acepta e pakete di retiro aki, algo cu a Sali publica den medionan di comunicacion, pues no ta algo scondi ta tumando luga cu Minister Dangui Oduber no ta na altura di dje.

Aki un biaha mas ta resalta d e hecho cu gabinete Oduber no tin solucion pa ningun problema di nos hendenan, gobierno no tin un vision di loke e tin cu haci of con e tin cu actua y ta opta pa medidanan cu simplemente ta inaceptabel den e momentonan dificil aki.

Esaki ta conta tambe pa e maneho pa loke ta prevencion di casonan di corona virus, caminda ta tuma decisionnan ad hoc, hasta decisionnan cu ta perhudica no solamente negoshinan pero tambe trahadonan liga na e negoshinan aki.

A introduci un toque de queda cu inicialmente mester a wordo anula pa despues bin c’un otro MB caminda a dicidi di cera negoshinan pa 9’or di anochi ya cu toque de queda ta di 10’or di anochi pa 5’or di marduga. Un decision sin cu gobierno a mustra ni un solo bes cu cifranan concreto, cu e medida aki lo liminta plamamento di e virus, tur esaki despues cu Prome Minister a bisa cu 60% di contagio ta tuma luga na cas y 40% pia di trabou pero ningun momento gobierno a informa cuanto e contagio ta den oranan di anochi den restaurantnan. Un maneho ad hoc atrobe cu e gobernante aki ta tuma sin pone controlnan adecuado in place. Diferente superspreader ta wordo mantene den operacion dor di e mesun gabinete actual y no ta mira decision concreto pa stop e contagio!

Pues un biaha mas ta mustra cu gobierno ta tuma un medida sin cu por hustifica e medida aki djis pa mustra cu a haci algo pero na mes momento un biaha mas ta haci algo sin pia ni cabes y ta prueba otrabes cu e maneho di e minister aki y su colega promer minister ta un fracaso total caminda pueblo ta sigi sufri,” Parlamentario Mike de Meza a mustra.