Entre october y november venidero; Avianca y COPA Airlines cla pa bin Aruba

Silvia Mosquera, kende ta CCO di Avianca Holding, a informa cu nan intencion lo ta inicia nan operacion aereo pronto pa Aruba. Pero logicamente cu menos frecuencia di vuelo, compara cu loke nan tabatin prome cu e pandemia di Covid a presenta den henter mundo. Nan plan ta cuminsa bula pa Aruba entre e luna di october y/of november venidero.

Nan plan prome di e pandemia tabata aumenta nan frecuencia di vuelo di 12 pa 15, pero for di luna di april nan a stop nan vuelo pa Aruba.

Mosquera a declara cu obviamente Avianca no lo inicia su vuelo pa Aruba cu e mesun frecuencia cu tabatin prome di e lock down. Ya cu nan mester cuminsa cu menos capacidad. Eventualmente 4 pa 5 frecuencia pa siman. Den e caso aki nan ta observa con e demanda ta evoluciona y dependiendo di e demanda, nan lo añadi gradualmente mas capacidad den nan vuelonan pa Aruba.

Ya caba nan a cuminsa bula pa algun destino internacional, manera Ecuador y El Salvador. Tambe nan inicia nan vuelo domestico na Colombia mes. Nan tin planea di aumenta nan vuelonan internacional. Pero segun Mosquera, nan perspectiva pa futuro ta exigi di Avianca pa nan ta mas creativo y flexibel pa adapta nan mes na e retonan venidero, y den algun casonan pa nan por “sobrevivi.”

COPA Airlines

Mientras cu COPA Airlines su plan di vuelo pa nos region ta depende di e nivel di demanda, asina Chistophe Didier, kende ta VP di Benta den COPA Airlines, a bisa. El a indica cu e panorama aki no ta mucho diferente na esun di Avianca. “Obviamente nos tur ta den e mesun barco actualmente y bibando un crisis sin precedente,” el a bisa.

El a declara cu actualmente den e mundo di operacion aereo e palabra ‘flexibilidad’ ta uno clave tanto pa e compania aereo como pa nan clientenan. Y tambe pa e distribuidonan manera e agencianan di biahe. Tocante e re-inicio di nan operacion aereo, COPA a cuminsa bula e luna aki for di Panama cu nan ta cualifica como nan Centro di Operacion Controla.

Nan ta realisa algun dia di operacion pa siman bulando pa algun destino cu ta permiti pa nan bula. Nan ta permiti tambe cu e pasaheronan por haci nan conexion na Panama. Por ehempel un pasahero cu kier haci uzo di COPA pa bula for di Brasil pa Mexico, e por haci su conexion na Panama for di 12 di october proximo. Pa e fecha aki COPA ta premira cu lo tin vuelonan casi diario pa e destinonan principal cu un 10% di nan capacidad.

COPA ta spera cu pa luna di december, si e situacion di e pandemia ta mengua un poco, nan kier yega na un 30% di nan capacidad. Nan kier opera pa 30 destino na october di un forma gradual y hopi flexibel. Nan no ta wordo descarta cu Aruba eventualmente lo ta un di nan.

El a bisa cu e hendenan kier disfruta di e beachnan y sinti e sancion di espacio y libertad pa haya su espacio bek. Tanto Silvia Mosquera di Avianca Holding como Chistophe Didier di COPA Airlines a participa di e 30 Conferencia di Turismo di Aruba (CATA) organisa virtualmente pa Aruba Tourism Authority (ATA) diamars ultimo.