Aruba considerando ‘herd immunity’

Durante un conferencia di prensa di Gobierno di Aruba diaranson ultimo, minister di Salud, Turismo y Deporte, Dangui Oduber a trece dilanti cu si vacuna no ta disponibel na luna di december, lo cuminsa examina ‘herd immunity’ cu ta trata di gruponan di inmunidad.

Oduber a duna di conoce cu ora Covid-19 a yega na Aruba, gobierno tabatin un strategia pa maneha e crisis aki y maneha e transmision. Esaki ta wordo evalua y discuti, kico ta e miho strategia, si tin cu wordo adapta esaki, considerando cu Covid-19 no ta bay desaparece den proximo dianan, ni tampoco pa e proximo lunanan.

Esaki ta enfoca riba reduccion di cantidad di contagio. Nan lo kier yega na un cantidad di 30 caso positivo pa dia. Tambe nan kier percura pa preveni y combati clusternan den casnan di cuido, companianan priva y na departamentonan di gobierno.

Un parti interesante cu minister Oduber a splica ta cu nan tambe kier enfoca riba e vacuna. El a sigura cu nan ta den combersacion cu Gobierno Hulandes y tambe cu Organisacion Panamericano di Salud (PAHO) pa asina ora e vacuna bira disponibel, tambe Aruba por tin acceso na dje.

Tambe nan ta considera pa termino largo cu den caso cu e vacuna lo no ta disponibel, lo cuminsa examina ‘herd immunity’, cu ta trata di gruponan di inmunidad.

Tocante esaki, Bon Dia Aruba a haci un pregunta pa epidemiologo Gareth Tromp, cu mirando e poblacion di riesgo halto cu Aruba tin – cu personanan cu ta sufri di diferente malesanan como diabetes, problema cu curason, etc., – si su persona como epidemiologo ta conseha crisis team pa bay den direccion di herd immunity?

Tromp a contesta cu esaki no ta un strategia necesariamente cu ta riba su mes, esaki ta algo cu ta desaroyando naturalmente. E ta na momento cu e casonan cu tin na e momentonan aki ta keda bay, no ta algo cu por dicidi riba dje cu nan ta bay lag’e los. “Pero si e ta sigui bay asina e lo yega na un gran mayoria di poblacion cu por contagia y cu lo a desaroya un tipo di inmunidad p’e.”

Pa loke ta e parti di grupo vulnerabel, Tromp a menciona cu e strategia ta pa proteha e grupo aki, cu tin cu percura pa nan no wordo contagia.

Di esaki, Oduber a haci un declaracion cu a sigura: “Esaki no ta un strategia cu gobierno kier pa mas hende wordo contagia, esaki ta un proceso cu ta pasando door cu hopi hende ta contagia, cu por tin e virus na Aruba y cu no ta un strategia cu ta stimula e contagio. Ta un proceso natural cu no solamente na Aruba ta pasando, sino rond mundo tambe ta pasa” Oduber a manifesta.

Mirando cu Aruba ta un poblacion di riesgo halto, Bon Dia Aruba a busca datonan den e rapport ‘Gezonheidsonderzoek Aruba 2016-2017’ cu DVG a haci na september di 2018 y cu ta publica riba website di CBS. Den esaki a saca e siguiente datonan importante: 12.6% di poblacion total ta huma sigaria, 44.2% di poblacion di Aruba ta consumi alcohol, 42.7% di e poblacion tin sobrepeso y 26% ta obeso.

Otro datonan ta indica cu 91.9% di e personanan den e estudio aki ta wordo trata pa un dokter specialista di curason, 40% di pashentnan ta wordo trata pa specialista di diabetes y 86% ta usa un of otro medicina pa presion halto.

Esaki ta datonan importante cu DVG mes a laga sa cu ta trata di e grupo di riesgo, e grupo mas vulnerabel pa Covid-19. Tin mas factornan y datonan cu ainda ta falta pa pensa di bay den direccion di herd immunity, cu na Hulanda e ta den fase di experimento, specificamente con e virus di Covid-19 ta comporta su mes. No tin dato concreto pa cuanto tempo e persona ta keda immuun di e virus y cuanto porcentahe di e poblacion total tin cu haya Covid-19 pa por crea herd immunity.

Bon Dia Aruba a haci un investigacion riba e tema aki y segun Rijksinstituut voor Volksgezondheid en Milieu di Hulanda (RIVM), cu ainda ta den fase di investigacion, nan a lansa un estudio na scala grandi pa investiga cuanto hende tin anticuerpo pa Covid-19. E invitacionnan pa participa den e estudio lo ser manda pa 6.000 persona na henter pais y di tur edad.

RIVM lo midi anticuerpo den sanger den varios fase di e investigacion. Cu e resultadonan RIVM tin como obhetivo siña mas riba e plamamento di Covid-19 y riba e desaroyo di inmunidad na tur e grupo di edad.

Tur persona cu a haya contacto cu coronavirus lo genera anticuerpo den nan sanger y mediante e medicion di e anticuerpo aki den sanger, nan lo haya sa cuanto persona den poblacion Hulandes a haya contacto cu e virus.