Un palabra cu ta resona regularmente ta escape di divisa. Principalmente ora ta trata di migrantenan legal of ilegal ta haci uzo di e companianan di money transfer pa manda placa afo, memey di e crisis financiero interno cu nos ta pasando aden debi na e pandemia.

Mandamento di placa a cay

E tipo di compania aki tambe ta mira cu nan negoshi a resulta afecta pa causa di e Covid crisis. E mandamento di placa a mengua y awor ta wordo presenta otro fenomeno cu masha poco antes nan tabata presenta, esta placa manda di afo pa alivia necesidad di famianan bibando na Aruba.

Pa elabora riba e tema aki Bon Dia Aruba a consulta cu Banco Central di Aruba (BCA), y tambe cu algun fuente na servicio di compania di money transfer cu a prefera di keda anonimo.

BCA a señala cu e mandamento di placa afo haciendo uzo di e servicio aki a baha comparando e cifra di 2020 cu un aña anterior (2019). E instancia aki a indica cu e publicacion di e tipo di cifranan aki ta tuma luga den e “Annual Statistical Digest” cu BCA ta publica tur aña riba su website. Si nan por menciona cu den e periodo januari 2020 pa juli 2020 e companianan di money transfer a transferi pa exterior Afl. 17 miyon (- 20 porciento) menos compara cu e mesun periodo aki den 2019.

E fuente consulta di e companianan di money transfer a afirma cu sin duda e mandamento di placa afo a baha masha hopi mes durante 2020, compara cu un aña anterior. E estadistica cu nan ta maneha ta cuadra cu esun di BCA, nan actividad a cay entre 20% pa 25%, el a bisa.

Control

Segun BCA den cuadro di e ley prevencion y combatimento labamento di placa y financiamento di terorismo, un dunado di servicio di money transfer mester, entre otro, identifica su cliente y determina e origen di e placa si tin rason pa hacie. Por ehempel si e persona ta bay frecuente na e dunado di servicio di money transfer. E compania aki mester tin procedura pa por verifica e origen di e placa. Banco Central di Aruba (BCA) no a pone e exigencia con e compania por verifica esaki. Esaki ta responsabilidad di e compania en cuestion.

Tin cierto existencia cu e compania di money transfer mester cumpli cu nan, specialmente den e tempo cu nos ta pasando aden actualmente. E fuente consulta a laga sa cu como empresa, e tipo di exigencia aki ta mas cuida ainda. Cada compania cu ta brinda e tipo di servicio aki tin nan propio departamento special di compliance. E departamento aki ta diseña su programa con nan por mitiga e posibilidad cu un cliente por haci mal uzo di un compania di money transfer pa otro motibo cu no ta esun principal cu nan a solicita, manera asistencia di famia of paga cierto compromiso afo. Esaki ta principalmente e motibo cu nan clientenan ta haci uzo di nan servicio.

Mas cu un 80% di nan cliente ta hende migrante estableci y trahando na Aruba cu ta manda un parti di nan ingreso pa duna sosten na nan famia afo. Pero e sorto di compania aki no solamente ta brinda e servicio di manda placa, sino di ricibi placa tambe. For di inicio di e pandemia nan ta mira mas regularmente cu e compania di transferencia di divisa ta fungi pa e famia na Aruba ricibi placa di pafo. E ta un indicacion cu cos ta malo na Aruba.

“E cantidad di placa cu ta wordo ricibi di afo a crece enormemente, compara cu e placa cu ta wordo manda afo,” asina e fuente consulta a bisa.

E no ta descarta cu tin hende cu ta purba uza e tipo di compania aki pa otro cosnan cu tin di haci entre otro cu labamento di placa. E riesgo mas grandi ta via transaccion cash. P’esey nan ta trata di motiva e cliente pa haci uzo di nan credit card.

Tin regla cu e compania di manda y ricibi divisa tin implementa pa atende cu algo asina. Un di nan reglanan principal ta cu e compania mester verifica pa medio di sistema automatisa e procedencia di e placa pa evita un delito asina. Como compania di transferencia di placa, nan mester sa e procedencia di e placa. Ya cu esaki ta un rekisito fundamental pa e companianan cu tin e tipo di licencia aki mester cumpli cune pa nan por sigui opera na Aruba.

Cantidad di placa

Segun informacion di BCA, e suma maximo permiti pa manda placa afo ta Afl. 2000 pa cliente pa dia. E companianan mes ta aplica tambe internamente limitenan pa dia, siman of luna.

Si e companianan di money transfer ta controla of restringi e hendenan cu ta ricibiendo ayudo di subsidio di salario of ayudo di FASE pa no manda placa afo, no tur compania ta di acuerdo cu esaki. E fuente consulta ta sali for di punto di bista cu cada hende sa kico ta haci cu su placa.

El a trece como ehempel cu tin hendenan cu ta ricibi ayudo di gobierno y nan ta us’e full na droga. Of nan ta haci uzo di e placa aki den otro cos cu no ta causa niun beneficio pa nos economia, ni pa nos pais. “Mi ta kere cu pa bo bisa un hende cu ta haya un FASE no mag di manda un 100 florin pa su mama of pa su yiu cu ta afo, mi ta kere cu esey no ta un punto cu valido,” segun e fuente consulta pa e matutino aki. E ta haya cu si nos ta bay den e direccion aki, e ta un muestra peligroso di xenofobia caba.

Loke si, naturalmente como compania di money transfer nan por haci ta, limita e cantidad di placa cu cualkier hende cu tin FASE por manda afo. Cada compania tin su maneho pa mitiga esaki. Algun di nan ta permiti te hasta un 20%, y nan ta restringi e mandamento di placa aki pa un luna, y no pa un dia so. Tin algun di nan cu tin programanan cu ta asocia e entrada di e persona of cliente na e maximo cu nan por manda afo, segun nan entrada.

Tambe tin compania cu a yega di exigi na nan clientenan un carta di nan dunado di trabou, caminda ta wordo bisa cu e persona ta traha pe, suma di nan salario y copia di ID. Esaki debi cu BCA a bin cu exigencia mas stricto cerca e companianan aki, ya cu nan sa cu tin hopi hende cu ta sin trabao of nan ta perdiendo trabao.

Sinembargo e tipo di exigencia aki a bira mas flexibel, y e no ta mas na vigor den cierto compania di money transfer. Tin compania cu ta permiti pa un hende por manda maximo un suma di 1000 florin, sin cu no mester duna cuenta di esey. Nan ta considera cu e cifra aki ta un entrada cu un hende cu ta traha por manda afo.

Hende indocumenta

E compania di money transfer tin regla tambe pa esunnan cu ta indocumenta of cu ta traha ilegalmente.

Nan por haci uzo tambe di e servicio di money transfer, pero e ta hopi restringi. Nan por manda un suma relativamente chikito den un periodo di 30 dia. Ta wordo calcula cu tin alrededor di 15 mil persona indocumenta na Aruba. Actualmente e hendenan aki ta ricibi placa for di afo, specialmente for di Europa (Spaña, Francia y Inglatera) y Merca. Tambe for di otro paisnan caminda un famia di nan ta traha. “E grupo aki ta esunnan cu mas tanto ta ricibi placa di afo pa nan por sobrevivi di e pandemia aki,” e fuente a bisa na e matutino aki.

 

Un situacion cu ta contribui negativamente pa e situacion aki por a bira mas pio tin di haci cu e maneho di migrante na Aruba, mirando cu gobierno no ta procesando extension di permiso mas.

E hecho aki ta causa cu e problema di persona cu no a logra drecha nan permiso a cay den e circuito di ilegalidad. Tin cifra cu ta indica cu e ta bay crece mas cu 5 pa 6 mil persona ilegal, si gobierno ta sigui tene na e prome 3 of 5 aña pa no extende mas nan permiso.

E idea cu comercio lo bay emplea otro hende pa reemplasa nan ta algo cu cierto sector di comercio no ta mir’e asina. Nan ta cupo di trabao cu no lo wordo yena mas, ya cu e dunado di trabao a inverti hopi den nan trahadonan cu dificilmente nan tin e capacidad financiero pa tuma otro trahadonan pa cuminsa for di cero y establece un base di confiansa cu nan.

 

BCA a bini cu medidanan pa via banconan no por deposita placa pa un banco por ehemplo na Corsou. Mientras tanto e clientenan di e compania di money transfer ta liber pa manda nan placa afo. Riba e punto aki BCA a aclaria cu un dunado di servicio di money transfer tin cu cumpli estrictamente tambe cu e reglanan di divisa di BCA y por ehempel, no ta permiti pa ehecuta transaccionnan di capital, asina CBA a reacciona.