Aruba ta pasando un momento sumamente dificil. E situacion aki nos no por compare cu e cierre di nos refineria na aña maart 1985. E situa-cion actual ta mundialmente. E desbentaha cu nos ta bibando ta paso nunca como pais a crea un reserva den caso di emergencia. Nunca nos a traha un dam warda awa.
Na 2008 tabata tin un crisis mundial caminda stock market a cay den otro y e tempo ey economia mundial a crash. Nos por corda cu hopi hende a perde placa y tambe APFA. E cambio di mentalidad di no spaar ta haci bo bira es-clavo di debe y esaki awe den 2020 nos por mir’e claramente. Na aña 2001 ai-nda bo por bisa cu nos debe nacional tabata por ser maneha. For di e tempo ey nan bin te dia di awe gobierno a bin ta fia te na unda nos ta awe. Den articulo 29 di Statuut ta para claramente cu pa fia placa den exterior Aruba mester a pidi autorisacion pa por haya placa fia. Esaki ta duna nos di conoce cu Hulanda tabata na altura di e debe di pais Aruba. Gobierno despues di 2001 a by-pass e sistema cu ayudo di un banco local pa haci prestamo
Na November 2018 gobierno a firma prolongacion di CAFT. E acuerdo cu te dia di awe no a cumpli cu’ ne. Nos tur sa cu gobierno su gasto personal a keda subi y tur esaki ta pa via di patronahe politico. Maske cuanto Hulanda a bisa pa baha gasto di gobierno y cuminsa manda hende cas gobierno no a cumpli cu esaki. Awe ainda den e crisis aki, e informacion cu mi tin, gobierno ta sigui tuma hende den servicio. Den tur manera nan ta by-pass e sistema. Den e aña aki so 2020 gobierno su debe ta pasa un biyon florin. Esaki ta pone pais Aruba den un situacion sumamente dificil y impagabel. Hulanda no tin confiansa den nos gobernante nan paso a pesar di a firma un acuerdo gobierno no ta cumpli cu ne. Bo no por papia di negociacion si e acuerdonan cu bo firma bo no ta cumpli cu nan
Esaki a caba cu e confiansa di Hulanda pa cu Aruba. Gobierno ta sigui busca moda pa haya placa fia y asina aki ta sigui hinca Aruba den un pos sin salida. Nos ta spera cu e actitud di gobierno aki haci cu nos companianan estatal wordo uza como borg pa sigui haya placa pa sigui fiesta. E consecuencia lo ta pa pueblo paso gobierno su debe ta surpasa 130% di nos GBP y ta hinca pais Aruba den un pos sin salida y crea un problema financiero mas grandi ainda pa pais Aruba. RdA a paga e director 2.6 miyon florin pa a core cu ne. Te dia di awe nan no ta bisa cuanto placa mester a paga e director di Elmar pa e bay. Si nan comete delito den na funcion mester a entrega un keho y no kita nan pa capricho politico. Esaki nos ta
Yama malgastamento di placa di pueblo. No tin transparencia den nos gobernacion. Politiconan tradicional tin nos awe unda cu nos ta. Gobierno no tin vision y den nan mes un seno nan ta dividi. Nan no tin vision y nan no tin salida tampoco pa e situacion cu nan a hinca nos aden.
E reunion di parlamento yama pa baha minister Lopez Tromp a dal un buelta y a dal nan manera un boomerang. Nan a perde tur nocion y tur strea di Noord. Esaki ta mustra claramente cu e parlamentarionan ta prefera di keda cobra nan salario en bes di tin pais Aruba na pecho.
Nos como partido CURPA su programa gobernacion tabata uno extenso cu un Vision Pa Un Miho Futuro. E miho regalo di fin aña cu gobierno por duna pais Aruba ta di bay goberna dor y entrega e gobierno y yama eleccion. Nos mester traha riba un fundeshi nobo y e mester ta uno solido. Cu Dios por sigui guia y conserva nos amor pa libertad. No kibra nos baranca tan stima nos Aruba dushi tera.
