Segun minister di Enseñansa, Ciencia y Desaroyo Sostenibel Armando Rudy Lampe: ‘Nos no ta corta den presupuesto di Enseñansa’

Dialuna mainta, minister di Enseñansa, Ciencia y Desaroyo Sostenibel, Armando Rudy Lampe a ofrece un conferencia di prensa, na unda el a duna su banda di medaya di situacion di scol Paso Pa Futuro y otro scolnan na unda e mes a sigura cu ‘nos no ta laga niun mucha riba caya’.

Despues di un relato pa loke ta trata cambionan den ciclo di bida di personanan y adaptacion pa e ‘normal nobo’ cu tambe ta adapta pa sistema di enseñansa, minister Lampe a informa cu e ta haya hopi apropia e proposicion di Hulanda pa loke ta educacion.

El a splica cu ora ta papia di entidad di reforma, pa educacion ta nifica cu e crisis aki ta obliga pa haci un maneho financiero mas estricto den control, pa tur loke ta subsidio na e diferente directiva. Esaki pa motibo cu – segun el a bisa – “no ta pa corta den presupuesto di enseñansa, sino cu nos mester haya e recursonan pa por inverti den innovacion”.

Di e manera aki, el a señala cu asina nan por inverti mas den e-Learning pa por sali mas fuerte di e crisis cu Covid-19 a trece. Pa via di esaki, Lampe a specifica cu diferente comentarionan ta circulando tocante esaki. El a duna como ehemplo e discusion cu tin riba e situacion di scol Paso pa Futuro, cu ta un scol pa muchanan special.

Lampe a bisa cu ta berdad cu nan a bin cu un maneho di un scol special cu mester ta pa muchanan special y mester duna enseñansa special. P’esey e ta bisa cu cantidad di muchanan special pa scolnan special ta bahando y cu scol Paso pa Futuro tin un eerste klas y un tweede klas so. Door cu ta un scol cu maximo por tin 12 mucha per klas, den algun par di aña, Lampe ta premira cu por tin un cantidad total di 72 mucha den scol.

“E ta bay bira un scol chikito y mester bira un scol cu ta duna educacion special, cu nos lo duna tur e apoyo pa nos muchanan special”, Lampe a expresa.

Ademas, el a trece dilanti cu pa un scol chikito ta coresponde un edificio chikito y esey ta e esencia di e discusion cu tin. Igualmente rond di mundo un scol special no conoce ‘keda sinta’; den scol special ta sigui e trayectorio di un programa. For di 2007, departamento di Enseñansa a publica cu un scol manera Paso pa Futuro, ora un mucha ta sali for di zesde klas tin cu bay pa un SPO, cu ta scol secundario pa muchanan special.

Aunke Lampe a afirma cu nan a haci un palabracion algun lunanan pasa cu lo no muda e scol aki. El a sigura: “Bo no por laga mucha keda sinta pa aumenta e volumen, esey no ta corecto pa e muchanan.”

Asina mes, el a comenta cu e semper ta habri pa dialogo semper y cuando lo ta di manera digital, pa evita aglomeracion di hende.

Pa loke ta trata e edificio di VAD na Playa, na unda tin tres scol na e momentonan aki, di e cual nan a haya e noticia cu un di nan ta bay cera pa dos siman pa via di deteccion di un caso positivo di Covid-19, el a expresa cu ta trata di un edificio cu poco ventilacion. Expertonan ta bisa cu circulacion di aire ta hopi importante pa evita mas contagio, segun Lampe a declara.

Di edificio VAD, nan a anuncia cu nan ta cu e directiva di scol di Skoa pa hopi tempo caba deliberando, pa motibo cu nan a ofrece alternativanan pa locual aworaki tin. Pa e motibo ey nan a comunica cu pa fin di aña aki, ora aña di presupuesto 2020-2021 inicia, nan lo aloca e medionan diferente. Y p’esey mester yega na un solucion, pa loke a sigura cu “nos no ta laga niun mucha riba caya”.

Tambe Lampe a trece dilanti e situacion di Imelda Kleuterschool, unda parlamentario Marlon Sneek – segun el a menciona – ta insinuando cu e muchanan ainda no por haya les door di culpa di minister Lampe. El a bisa cu esey no ta berdad. “Al contrario nos a ofrece Skoa na augustus caba un edificio alternativo pa muchanan por haya les, pa motibo cu unda nan ta ubica ta un espacio hopi chikito y no ta adecua.”

Di esaki, el a comenta cu Skoa mes a nenga y nan a presenta un otro alternativa. “No ta culpa di minister, sino di directiva di scol, cu ta esun cu ta tuma decisionnan al respecto.”

Tambe el a referi cu parlamentario Sneek a bisa “cu kier bula cabes di miembronan di directiva di Skoa, algo cu no ta berdad.” El a splica cu loke a sucede ta cu tin un sentencia di hues cu Skoa a tuma decisionnan contra ley. Tin un rapport di CAD cu ta confirma cu no solamente a actua contra ley, sino cu a causa un daño financiero te aworaki di 8.5 miyon florin, un cifra cu Lampe a manifesta lo aumenta.

Despues cu Lampe a ofrece su conferencia di prensa, Sindicato di Maestro SIMAR y docentenan di scol Paso pa Futuro a haci un accion di protesta den oranan di atardi, pa mustra nan mal contento tocante e declaracionnan cu Lampe a haci y tambe pa reuni cu prome minister, Evelyn Wever Croes.

“E team di docente y SIMAR lo sigui bringa pa enseñansa cu muchanan special ta merece, cu ta enseñansa di calidad”, Josephine Albertus a declara pa medionan local presente dilanti Bersturkantoor.