Robot cu ta papia y interactua cu hende di edad avansa por wordo introduci den cas di cuido di anciano pa yuda combati soledad y mehora salud mental.
Pepper, un robot ‘culturalmente competente’, a wordo test na cas di cuido di anciano na Reino Uni y Hapon – esnan cu a interactua cune pa hasta 18 ora durante dos siman ‘a mira un mehoracion significativo di nan salud mental’, segun investigadonan.
Pepper tabata parti di un estudio global grandi conoci como CARESSES, funda conhuntamente pa Union Europeo y gobierno Hapones, cu a investiga e uso di inteligencia artificial (AI) den cuido di hende di edad avansa.
E cientificonan tras di e estudio a haya cu ‘despues di dos siman di usa e sistema tabatin un impacto chikito pero positivo riba severidad di soledad entre e usuarionan’.
Pepper ta completamente autonomo, nificando cu e no ta controla pa un persona. E aparato, cu ta conta cu un tablet computer cu por toca musica y entretenimento, no ta djis puntra y contesta pregunta, sino por inicia y sostene combersacion. E ta diseña pa ta ‘culturalmente competente’, nificando cu e por responde na e necesidad y preferencia culturalmente specifico di hende di edad avansa.
Dr. Chris Papadopoulos, profesor principal den salubridad publico na Universidad di Bedfordshire, tabata autor lider di e evaluacion di e proyecto di tres aña. Den un declaracion online, el a describi e estudio como ‘vanguardista’, agregando: “E resultadonan ta mustra cu uso di robot AI CARESSES manera Pepper tin beneficio potencial real na un mundo cu ta testigo di hende bibando mas largo cu menos hende pa cuida nan. Mal salud mental y soledad ta preocupacionnan di salud significante y nos a demostra cu robot por yuda alivia esakinan.”
Na cuminsamento di e estudio na 2016, no por a anticipa e pandemia di coronavirus, cu tin un impacto enorme riba hende di edad avansa den cas di cuido rond mundo. “Nos sistema no por a yega na un miho momento”, Papadopoulos a bisa CNN.
Pues, Pepper por ofrece ayudo na e miyones di persona di edad avansa ainda incapaz di mira nan famia y amigo pa miedo di contagio di coronavirus? “E proyecto cu nos a desaroya awo rigurosamente a demostra cu por y a mehora salud mental y bienestar y a reduci soledad”, Papadopoulos a bisa. “Sinembargo, e ta apenas na nivel di prototipo y tabatin cantidad di limitacion tecnico.”
Ta calcula cu lo mester dos of tres aña mas di investigacion, desaroyo comercial y financiamento prome cu robotnan manera Pepper por wordo introduci di berdad den casnan di cuido. “Nos ta kere cu esaki no ta bay tocante reemplasa cuido – un robot no por haci loke un humano por haci. Pero nan por ta un herment complementario pa stimula salud mental di hende”, el a bisa.
