Minister Dangui Oduber: ‘Responsabilidad civico di cada ciudadano pa sigui e protocolnan’

Dialuna ultimo, Gobierno di Aruba hunto cu crisis team a ofrece un conferencia di prensa pa duna di conoce un actualisacion tocante situacion di Covid-19 na Aruba, pa e area di cuido y turismo, como tambe e situacion den AZV.

Minister di Salud, Turismo y Deporte, Dangui Oduber a expresa cu den ultimo siman a situacion a cambia un tiki. Den sentido cu siman pasa tabata e di cuater siman desde cu a registra e casonan di segundo ola di infeccion di coronavirus dia 4 di augustus. Siman pasa a registra 60 caso positivo pa dia promedio y durante e prome simannan tabata registra 85 caso positivo pa dia.

Loke si por a mira ta un reduccion di averahe di casonan positivo pa dia, den comparacion cu e prome siman. Oduber a splica cu nan a repasa e edad den e casonan activo na e momentonan aki, y cu 15% ta di 0 pa 25 aña, 36% di 25 pa 34 aña, 38% 45 pa 64 aña, 7% di 65 pa 74 aña y 3% riba 74 aña. Di mesun forma el a enfatisa esunnan cu a recupera den ultimo siman, un cantidad di 1.244 persona.

Semanalmente nan ta evalua strategianan cu nan como crisis team ta ehecuta y wak kico nan tin cu cambia, adapta of tuma medidanan adicional. Tambe el a señala cu nan a pone como meta cu den proximo simannan nan kier mira un reduccion di casonan positivo pa dia, pa esakinan por yega na 30 .

Oduber a comenta cu mester ta consciente tanten cu economia y frontera ta habri – cual nan ta purba di mantene tambe, pa mantene e balans entre salud y economia teniendo na cuenta e situacion di e capacidad na hospital. “Na tur momento nos ta keda mantene e balans aki y mantene abao e cantidad di negoshi cu ya caba a bati bancarota y miles di persona cu no tin trabou ni perspectiva.”

Loke nan kier como gobierno kier ta conscientisa na tur momento riba tur e protocol cu nan a traha na momento cu nan a dicidi di habri e fronteranan. Pero ta e responsabilidad civico di cada ciudadano pa sigui e protocolnan aki, cu segun minister Oduber, esey ta e unico manera cu por siña biba cu e riesgo aki y cu no ta bay disparce por lo pronto. Nan ta haya conseho di expertonan y profesionalnan riba e area medico y nan ta conseha nan como gobierno y crisis team cu si por yega na e reduccion di casonan positivo pa dia na 30, nan por maneha esey sin pone presion riba e sistema di salud publico ni riba e capacidad di camanan na hospital.

“Nos ta den 60 caso positivo pa dia y ainda nos no a yega na unda nos kier ta. Pero e situacion ta pone cu nos tin cu biba cu e riesgo aki” Oduber a sigura.

Ademas, minister Oduber a informa cu nan a pidi cooperacion pa yuda financia e aumento di cantidad di algun personal cu ta necesario na e momentonan aki. Por ehemplo, nan ta pidiendo e ayudo di ocho enfermero cu lo busca na Aruba mes y cu unda Hulanda por yuda pa e financiamento. Di esaki, el a señala cu nan lo yuda Departamento di Salud Publico.

Aworaki e Task Force a wordo reforsa pa controla tur establecimento pa loke ta trata e cumplimento di protocolnan.

Pa loke ta trata e situacion di casonan positivo den cas di cuido, specificamente Maris Stella, minister Oduber a splica cu eynan no tabatin casonan di cluster. Sino algun ciudadano cu ta biba eynan cu a sali positivo y e situacion ta bou control, tur e empleado a wordo getest.

Na banda di turismo, el a expresa cu e situacion ta recuperando poco a poco y nan ta spera cu esey por recupera un tiki mas lihe. Aunke tin preocupacion tambe di parti di turistanan cu kier biaha no solamente pa Aruba, sino otro paisnan cu tambe a pasa pa e mesun situacion door di Covid-19.

“Nos ta convenci cu pa luna di november lo mira un mehoracion pa turismo”, el a bisa.

Tocante e situacion di cuido na AZV, minister Oduber a declara cu den pleno crisis di pandemia Hulanda a duna Aruba un instruccion pa reduci e gastonan di AZV cu 5 miyon florin pa luna. “Esaki ta algo increibel, pero el a sucede y en bes di yuda nos pa prepara nos mes pa ta miho, nan ta pone nos mes pa corta den cuido medico”, el a sigura.

Asina mes, el a trece dilanti cu nan ta hayando hopi presion for di e veld cu mester ta consciente cu esaki ta un instruccion cu nan a haya pa por cumpli pa por haya e ayudo for di Hulanda. El a agrega cu “AZV ta den problema den likides tur siman y hende tin cu compronde e situacion cu ta bibando pa dia ”.