Pa motibo financiero a stop investigacion cu plasma; Minister di Salubridad Publico lo pidi Hulanda pa financie

Sin duda algo cu a yena nos di orguyo, meymey di e pandemia, tabata e anuncio cu un team medico di Horacio Oduber Hospitaal (HOH) a cuminsa un investigacion den aliansa cu Hulanda riba uso di transfusion di plasma pa pashentnan interna cu Covid.

Cada bes cu Dr. Choudhry tabata splica e motibo y alcance di nan investigacion tabata un motibo di elogio pa loke e team medico lidera pe tabata haci, poniendo e nomber di Aruba resona internacionalmente.

Sinembargo hospital a bin cu tres motibo pakico nan a stop cu e investigacion aki. Mientras cu e mandatario encarga cu salubridad publico a bisa categoricamente cu e motibo tabata uno exclusivamente financiero.

Hospital a informa dialuna pa medio di un comunicado cu nan ta stop cu e investigacion aki pa varios motibo. Un di nan tabata cientifico mes. Nan a bisa cu despues di algun luna e resultadonan a demostra cu e uso di plasma no ta yuda pa cu e mehoracion di pashent cu Covid. Ademas cu poco pashent local a bin na remarca pa wordo trata cu plasma. Y e di tres argumento tabata financiero, ya cu debi na limitacion den finanzas na HOH a tuma e decision pa para e investigacion aki.

Sinembargo durante e conferencia di Crisis Team di dialuna anochi, minister di Salubridad Publico, Dangui Oduber a aclaria cu e motibo tabata uno totalmente financiero. E mandatario a informa cu e investigacion aki riba plasma a wordo para temporalmente pa motibo financiero.

El a splica cu na momento cu gobierno mester corta 5 miyon pa luna den e fondo pa gasto medico di AZV, esaki ta trece su consecuencia. Naturalmente e consecuencia aki ta wordo sinti pa hospital tambe, y esaki ta e motibo cu nan a dicidi cu temporalmente no tin e financiamento pa e proyecto aki.

Igualmente el a laga sa cu un peticion lo wordo haci na gobierno Hulandes pa wak si lo por tene consideracion cu e proyecto aki, y si nan ta yuda financia e proyecto aki. “Cu tabata mustra uno prometedor,” el a bisa.

Tambe el a yega di bisa cu tin varios investigacion cu ta wordo haci mundialmente pa wak si e tratamento cu plasma ta uno exitoso. “Y a bin resulta cu berdad cientificamente ta wordo proba cu ta uno exitoso,” Oduber a bisa.