Parlamentario Marlon Sneek su pensamento prioritario ta pa Aruba por haya un ayudo financiero. Sinembargo den su concepto locual tin ariba mesa tocante e acuerdo cu Hulanda, e no ta kere cu pais Aruba mester firm’e.

Bon Dia Aruba ta acercando diferente politico encuanto si gobierno, den nomber di pais Aruba, mester firma of no un acuerdo a base di e condicionnan cu Hulanda a bin cune pa e di tres tranche di ayudo financiero.

Sigur el a indica cu nan ta para habri pa e ayudo aki, mirando cu nos tin un comunidad cu tin mester di e ayudo ey actualmente. Sinembargo riba e hecho cu e siman aki ta uno crucial, ya cu pais Aruba ta yegando na su ultimo rosea financiero, e parlamentario a laga sa cu no ta awe nos sa cu e ultimo rosea ta september. Ya cu el a wordo menciona despues di e ultimo conseho di minister di Reino na juni ultimo.

Pues e no ta kere cu gobierno mester warda aworaki cu nos ta yegando nos ultimo rosea pa mustra cu den urgencia cu nos ta mester firma. E ta haya cu gobierno mester haci uso eficiente di e tres lunanan ultimo pa soluciona e problema cu Hulanda. Pero den e periodo aki nos no por a mira algo substancial den e negociacion cu Hulanda.

E ta mira cu nan ta oportunidad cu no a wordo probecha debidamente, mientras diabierna awor 11 di september lo tuma luga e siguiente conseho di minister di Reino. Esaki ta nifica cu pa diaranson 9 di september, Aruba mester duna su ultimo palabra. Mientras e ta kere cu gobierno por a haci mas prome cu e tempo a wordo agota.

E por mira cu minister Hulandes, Raymond Knops tabata na Corsou siman pasa. Mientras cu prome minister di Corsou a papia cu tin un apertura y cu nan ta discutiendo cu Hulanda. “E tipo di cos aki mi kier tende pa Aruba tambe. Pero lamentablemente bo no ta tende cu tin un apertura of cu tin un discusion…” segun Sneek.

Ayudo financiero y condicionnan

“Den esey no caba duda cu fraccion di AVP y mi persona como politico ta kere den un ayudo financiero…” el a declara na Bon Dia Aruba. E ayudo aki ta fundamental no solo pa yuda nos comunidad sino tambe nos sector priva, empresarial, pa nos por garantisa cu nan por sobrevivi e periodo aki y asina nan por garantisa e trahadonan nan cupo di trabao.

Esaki ta e aspecto di ayudo financiero di Hulanda cu parlamentario Sneek ta considera necesario. Pero si e ta distancia su mes di e forma cu Hulanda ta haciendo uso cu pais Aruba mester di e sosten financiero aki pa purba di introduci reglamentonan nobo, leynan nobo y supervision nobo. Pa loke ta e parti di supervision, Sneek a bisa cu fraccion di AVP sigur ‘no tin miedo di supervision’.

El a agrega cu na 2015 e mes como parlamentario formando parti di e fraccion di e 13 parlamentarionan di su partido cu tabata sostene gobierno na e momento ey, a bay di acuerdo pa introduci un landsverordening of ley local (LAFT) caminda a bin cu supervicion financiero pa medio di CAFT. Pa asina duna Hulanda un bista con e parti di finanzas di nos pais ta wordo maneha. P’esey e ta di opinion cu mester hinca e entidad di rescate y reforma cu Hulanda kier bin cune bao un ley local, manera a wordo haci cu CAFT den pasado. E ta kere cu algo asina mester bin bek.

E ta haya cu di un banda e institucion di e landsverordening aki a duna nos un credibilidad den mundo financiero pa tin nos por tin acceso na credito pa atende cu nos debe nacional. Ya cu no solamente ta trata di supervision di gobierno den su totalidad, sino cu tambe tin un supervision di Reino.

Sinembargo e ta haya cu na december di 2018 den reunion di conseho di minister di Reino, e discusion tabata ta cu e ley di CAFT no a wordo implementa, manera cu a wordo acorda den e protocol cu e mesun gobierno actual a firma cu Hulanda. E ta haya cu mester a cumpli cu e protocol aki.

“Mi interpretacion ta: Mi a duna bo e oportunidad pa haci’e. Bo no a haci’e, anto awor mi ta bay haci’e pa bo,” el a bisa. E ta lamenta esaki, ya cu na momento cu ta wordo introduci un ley di reino (rijkswet) bo ta kita e poder tanto di Parlamento, pero fundamentalmente di e pais pa e dicidi riba su leynan.