Mundo di aviacion a keda severamente afecta desde cuminsamento di crisis di Covid-19. E impacto a wordo sinti hasta pa e dos aerolineanan mas antiguo di mundo, esta KLM y Avianca, cu recien a celebra nan 100 aña di existencia. Esakinan a conta cu ayudo financiero di nan respectivo gobierno, pero con lo para cu nos aerolinea local, Aruba Airlines?
Segun un articulo di Harald Linkels pa e portal aruba.nu, e dificultad cu aerolineanan ta enfrenta, principalmente pa motibo cu no lo por restaura nan entrada por lo pronto, ta presenta un riesgo grandi pa nan existencia.
Pronostico pa futuro di aerolineanan den nos region, entre otro Aruba Airlines, JetAir Caribbean, EZ Air, Divi Divi y Win Air, ta mustra scur. Gobiernonan local, a diferencia di gobiernonan Colombiano y Hulandes, no ta parce di mira e problema di e aerolineanan como algo cu nan mester yuda resolve.
Segun Linkels, maske historia di aerolinea den nos region semper a keda uno compleho y turbulento. Esaki a keda empeora na momento cu Corsou y Sint Maarten algun aña atras a pasa na un status asina-yama FAA Categoria-II, cual di su mes ta un sentencia di morto pa e modelo di negoshi pa aerolineanan local. Pa motibo di e status Categoria-II, no por tin rutanan por ehempel na e sitio potencialmente lucrativo di Merca, tampoco drenta den acuerdonan di ‘code share’ cu organisacionnan Mericano.
Pero loke ta keda mas grave, segun Linkels, ta e falta di vision pa cu aviacion local. Esaki, ademas di e caida di DAE y Insel Air, como tambe e catastrofe economico na Venezuela, ta haci cu practicamente no tin nada den aviacion local.
