Un corte di apelacion Hulandes ayera a sostene e conviccion di legislador anti-Islam, Geert Wilders, pa insulta Marocanonan den comentarionan cu el a haci na un reunion riba anochi di eleccion na 2014. Sinembargo, e corte a anula e conviccion di Wilders pa incita discriminacion.
E corte di apelacion no a castiga Wilders pa su conviccion riba e cargo di insulta un grupo, cual e por apela na Corte Supremo Hulandes.
E comentarionan pa cual a condena Wilders ‘por contribui na polarisacion di sociedad Hulandes, mientras den nos sociedad democratico, pluralistico, respet pa otronan, specialmente gruponan minoritario, ta di gran importancia”, Segun hues Jan Maarten Reinking.
Wilders, kende su carera politico ta basa en gran parti riba su retorica fuerte anti-Islam, a keda condena na december 2016 di insulta y incita discriminacion contra Marocanonan na 2014. E no a ricibi un castigo.
Papiando cu prensa pafo di corte, Wilders a critica e caso como un ‘huicio politico’ y a bisa cu e corte ‘a tira libertad di expresion den bar’i sushi. No djis pa mi, sino pa tur hende’.
E lider di Partido pa Libertad (PVV) semper a insisti cu e ta inocente y a tacha su enhuiciamento di ta un intento motiva politicamente pa silenci’e y un atake riba libertad di expresion. E corte di apelacion a rechasa su keho di interferencia politico den e caso y a bisa cu libertad di expresion tambe tin limite.
E condena ayera tabata basa riba comentarionan cu Wilders a haci riba e anochi di eleccion municipal Hulandes na 2014, na un reunion na un café na Den Haag. Den loke hues di apelacion a bisa tabata un intercambio cuidadosamente prepara, Wilders a puntra su sostenedonan si nan tabata kier mas of menos Marocano na Hulanda. Esey a desata gritonan di ‘Menos! Menos! Menos!’ – na cual el a contesta, ‘nos lo take care di esaki’.
E veredicto ayera ta yega alrededor di seis luna prome cu eleccion parlamentario nacional na Hulanda. Segun encuestanan, partido di Wilders ta e partido mas grandi den oposicion.
Splicando pakico no a duna castigo na Wilders ayera, Reinking a nota cu Wilders a biba pa añas bou siguridad estricto pa motibo di menasa. “E acusado pa añanan ya a paga un prijs halto pa expresa su opinion”, Reinking a bisa.
