Salubridad lo conoce reforma; Acuerdo firma cu Hulanda no ta bay resolve tur problema di biaha

Diamars presidente di Asociacion di Dokter di Cas (HAVA), Dr. Joaquin van Trigt a vocifera cu salubridad no ta un prioridad pa gobierno y mas atencion ta wordo poni riba sector publico.

Ayera minister di Finanzas, Xiomara Maduro a reacciona bisando cu gobierno a traha diligentemente pa percura cu AZV por haya tur fondo produci y destina pa e organo aki. “E ta un prioridad, pero nos tin cu wak tambe loke Covid ta trece pa locual ta pais Aruba,” e mandatario a bisa.

E mandatario en cuestion a informa cu gobierno a cumpli cu tur pago corespondiente y destina pa AZV. Pero cu e mesun rosea, el a laga sa cu durante e delaster 8 luna, AZV a bay atras cu 64.1 miyon florin den nan fondo.

Ademas a bin un cortamento di 5 miyon florin pa luna for di e fondonan di AZV cu Hulanda a pone como condicion pa otorga mas ayudo financiero na Aruba. Contestando pregunta di Bon Dia Aruba riba e punto aki, minister Maduro ta haya cu e ta keda un situacion preocupante, ya cu e ta afecta e cuido medico pa nos comunidad.

El a laga sa cu hunto cu AZV nan a traha un modelo riba cambionan cu e organo aki lo trece den tereno di cuido medico. E condicion di Hulanda riba 5 miyon menos for di fondo di AZV ta ocasiona un impacto grandi. Vooral na momento cu henter mundo, y Aruba no ta un excepcion, ta pasando den un crisis di salubridad debi na e pandemia di Covid.

E parti cu e ta haya mas cuestionabel ta cu nunca pais Aruba no a haya un argumentacion di Hulanda pa kico mester corta e suma di 5 miyon tur luna, y no eventualmente menos cu e cifra aki. Ademas e condicion aki a bin net na momento cu tin un crisis, no solamente financiero sino di salubridad tambe.

Encuanto e solicitud di HAVA y tur e gremio di sector priva, entre nan ATIA, KvK, AHATA, AGA pa gobierno bin pronto cu Hulanda na un acuerdo ya cu e rosea financiero ta cabando, minister Maduro ta haya cu esaki no ta resolve full e problema actual.

“No ta pasobra gobierno bay firma pa ricibi e yudansa, esey kiermen cu automaticamente nos ta bay haya tur e fondonan necesario,” asina e mandatario a declara. Ademas cu automaticamente nos ta bay resolve tur problema. Pues el a reitera cu firma un acuerdo cu Hulanda no kiermen cu automaticamente Aruba ta bay haya tur e placa cu nos tin mester pa atende cu e efectonan cu ya a cuminsa presenta, entre otro riba cuido medico.

E ta haya cu nos ta sinta actualmente den un situacion caminda ta falta hopi logica. Den e sentido cu Hulanda ta brinda yudansa, pero di otro banda ta pidi pa cuminsa corta den gastonan prome. Despues Hulanda ta bay bisa cu nan ta bay duna nos, pero nos no tin niun garantia cu ora bo firma di berdad nos ta bay haya tur e fondo cu mester. Tampoco e ta bay kita tur e problemanan cu por surgi aworaki pa falta di fondonan riba e parti di salubridad. Pasobra e acuerdo aki y tur reforma inclui ta bay conta tambe pa loke ta e tereno di salubridad, el a laga sa.

Cu hopi respet e mandatario a bisa cu Covid ta trece hopi cambio y un normal nobo, y te hasta salubridad tambe ta bay tin un normal nobo, mirando e condicionnan cu Hulanda a bin cune. El a agrega cu e normal nobo a wordo presenta aworaki y tur a wordo afecta debi na esaki. E cuido ta bay conoce reforma cu ta bay toca nos como hende, pero tambe pa esnan cu ta brinda un servicio di cuido na AZV.