Parlamento ta firma hunto cu St. Maarten y Corsou rechasando propuesta Hulanda

Despues cu diaranson parlamento di St. Maarten a tene un reunion di emergencia pa discuti nan posicion pa cu propuesta di ayudo financiero di Hulanda, awe a confirma cu parlamento di Aruba tambe a join St. Maarten y Corsou, firmando un carta rechasando dicho propuesta.

Mientras cu diaranson, parlamento di Aruba a tene un reunion publico pa discuti maneho di minister di Desaroyo Teritorial y Infrastructura, Marisol Lopez-Tromp – cu a desvia pa converti den un discusion tocante corupcion den aparato gubernamental – parlamentonan di St. Maarten y Corsou tabata debatiendo un postura pa cu e propuesta di Hulanda pa ayudo financiero relaciona cu crisis di coronavirus.

Den un carta conhunto di e parlamentonan di e tres islanan, dirigi na prome minister Hulandes, Mark Rutte, ta argumenta cu ta intolerabel cu representantenan Caribense ta forsa pa acepta condicionnan cu ta conduci na mas pobresa y cu ta trapa riba derechonan democratico, segun informacion cu a circula den medionan di comunicacion di Corsou.

E parlamentonan na kere cu gobiernonan local tin derecho pa busca otro solucion cu no ta sigui e ruta obligatorio cu tur condicion di Hulanda. “Nos kier informa Conseho di Minister di Reino cu nos lo usa nos autoridad pa instrui nos gobiernonan pa busca alternativa”, e mocion di e parlamentonan ta bisa, segun CuracaoChronicle.

Bon Dia Aruba a busca contesta di parlamento tocante e carta y mocion aki, mirando cu Parlamento mes no a duna ningun indicacion cu tabata tumando un postura pa cu esaki, y tambe mirando cu prome minister, Evelyn Wever-Croes mes a bisa di ta den deliberacion cu Hulanda.

Segun informacion cu Bon Dia Aruba a ricibi, ta presidente di Parlamento, Juan ‘Adi’ Thijsen a firma e carta den nomber di Parlamento.

Parlamentario independiente, Daphne Lejuez a declara cu el a manda un carta di su mes, pa bisa cu e no ta di acuerdo cu e mocion di parlamento. Esaki pasobra e no ta considera cu por manda un carta asina siendo cu ainda tin deliberacion andando.

Redaccion a acerca Thijsen pa puntra si tur parlamentario a sostene e carta, y si e por a firma den nomber di Parlamento e ora ey. Sinembargo, no a ricibi ningun contesta.