Segun economistanan: No mester baha gasto ni aumenta impuesto pa paga crisis di coronavirus

A pesar di e biyones di euro cu e gabinete Hulandes ta invertiendo pa combati e impacto di coronavirus, ministernan ainda no mester aumenta impuesto ni baha gasto, segun un grupo di economista lider.

E 10 economista, cu tabata papiando cu ING Bank dos siman prome cu e presentacion di presupuesto 2021, ta bisa cu tin ‘mas cu suficiente’ placa den e tesoro pa sosten financiero temporal.

Algun, sinembargo, ta bisa cu mester aumenta impuesto of baha gasto unabes e crisis a termina, pa asina reduci e ratio halto di debe. Pero esaki mester sucede solamente unabes cu e economia por para riba su mes atrobe, nan a bisa.

Algun economista tambe ta kere cu ta un momento pa restructuracion y enfoca riba sectornan cu miho prospecto a largo plaso, destacando cu e crisis por dura un tempo largo y lo trece cambionan duradero, manera mas trabou for di cas y shopping online. “Timing ta specialmente importante aki”, segun hefe economista di ING, Marieke Blom. “Si coronavirus ta temporal, pakete di sosten tambe ta mas beneficioso pa e tesoro cu paga beneficionan di desempleo adicional y reconstrui capacidad di produccion y habilidadnan despues. Si e economia a recupera mas aleu, tambe lo ta mas cla ki servicio y habilidadnan ta den demanda.

OECD a bisa ayera cu gobiernonan a tuma accion fiscal sin precedente den respuesta na e crisis di Covid-19, pero paisnan mester sostene recuperacion economico mirando aumento significante di retonan fiscal.