Tin un grado halto di insiguridad y angustia entre miembronan di Sindicato di Polis, SPA y Sindicato di Maestronan, SIMAR. A expresa e preocupacion aki den un carta conhunto dirigi na Prome Minister Evelyn Wever Croes, unda entre otro ta dirigi atencion na e negociacionnan cu ta tumando luga cu Hulanda pa e sosten financiero.
Segun Jose Dirksz di SPA y Josephine Albertus di SIMAR, falta hopi claridad riba e desaroyo di Covid19, cu ta produci un angustia creciente den e bida diario di e miembronan. A pesar cu ta keda confronta diariamente cu informacion di diferente punto di bista via rednan social, durante e periodo di crisis aki, e sindicatonan ta particularmente preocupa riba e desaroyo di negociacion cu Hulanda y e status pa e di tres tranche, cu segun e sindicatonan, lo mester bira conoci pa september 11, esta diabierna awor.
E miembronan ta reconoce e situacion financiero precario y ta sintie tambe. “E miembronan den Cuerpo Policial y esnan cu ta traha den enseñansa ta perdi den scuridad pa loke ta futuro y kier mas siguridad pa nan propio posicionnan. Ya caba a tuma un cantidad di medida, cu a yega na un reduccion di 12.5 porciento riba salario bruto, y como consecuencia di esaki, e base di pensioen cu ta mara na salario, tambe a keda afecta.
E pregunta como tal ta bin, te cu leu otro medidanan financiero impactante tin na caminda cu ta mishi e siguridad di derecho di e miembronan di e sindicatonan. Tempo ta core y e miembronan kier sa na tempo, kico nan por spera di e derechonan cu nan a acumula of si esakinan tambe ta influencia negativamente debi na e situacion.
Como sindicato, SPA y SIMAR ta balora e lucha pa interes di e miembronan y ta trata di haci esaki optimalmente, y no kier cana tras di hechonan. Pa esey ta esencial cu Prome Minister ta duna e sindicatonan informacion cla y na tempo, pa asina e dirigentenan tambe por ta transparente ora di duna informacion na e miembronan riba desaroyo y cambionan den nan posicion huridico.
Tanto SPA y SIMAR ta urgi Prome Minister Wever Croes pa duna informacion relevante mas pronto posibel pa asina por pasa e datonan aki pa e miembronan y asina evita disturbionan innecesario y pa percura cu tin trankilidad.
