Ex Prome Minister Nelson Oduber: “Corupcion no ta den politica so, pero den comercio y hopi mas caminda”

Lesando e rapport di Banco Central cu accento ariba e generalisacion di corupcion den politica, den mi 36 aña cu mi tabata activo mi a conoce den tur partido hopi politico honrado y serio. Cu na caminda tin cu a y ta cay pa placa ta lamentabel y condenabel.

Straño ta cu “nan di cu e di cu el a tende cu 1 di cada 5 hende di, di a conoce un hende cu lo a paga pa haya fabornan di gobierno”. Ma bon, ta spirito tin ta biba na Aruba? Basta calumnia cu redashi! Ken ta e hende cu a laga e politico haci’e fabornan, cual politico e lo a paga y pakico? Basta storia cu generalisacion. Pa balia tango mester minimo 2 baliador. Abo cu a haci un encuesta, cu lo a papia cu hende y no cu spirito y ta bisa cu nan a bisa bo cu tin hende cu conoce hende cu a paga sa ken nan ta toch? No papia so, actua tambe! Ken a bisa bo y ken e ‘spiritonan’ ta?

Segun nos leynan “si bo draag kennis di un strafbaar feit” bo mester haci denuncia cu evidencia y no cu redashi of calumnia na Ministerio Publico. Tanten cu kier tira cu lodo y sconde den “mi lo a tende, mi conoce un hende cu lo a paga”, pero bo no ta bisa ken, nos ta keda biba den limbo di spiritonan cu ta denuncia scondi y no kier saca cabes! Be a man and not a mouse! A bira tempo pa persigui tambe e hendenan cu ta duna placa – segun nan pa fabor – pero kier keda  hunga pelicula di Boris Kharloff!

Corupcion aki no ta den politica so, pero den comercio y hopi mas caminda cu bo ta kere. Vermogensbelasting ta e unico arma efectivo, unda bo mester prueba fiscus con bo a yega na tur bo propiedadnan! Corupcion ta un mal cos cu mester ser combati no cu “mi a tende, un hende a bisa mi, pero mi no ta corda ken”. Lamentablemente mucho redashi, calumnia sin presenta ningun evidencia y prueba tin nos ta biba di e mal pensamento cu tur politico lo ta corupto.

P’esey hopi bes Ministerio Publico no ta haci nada, pasobra tin ora ta keha pa duna keho! Tin casonan ultimo añanan berdad si cu tin evidencia, pero no mucho ta wordo haci cu nan pa investigacion. Basta cana busca y haci redashi. Investiga y entrega keho cu evidencia y bisa ken a pidi y ta ken a duna. Bo sa toch? Sentencia tambe tur dos cu a balia e “tango di corupcion”. Abo cu ta paga/duna placa pa lok uit e politico pa bira corupto tambe ta castigabel pa ley.

Un contribucion pa bo tambe pensa.