Den cuadro di aña escolar nobo cu oficialmente ta cuminsa awe den e mayoria di scolnan di Aruba, Skoa a haci un yamado pa mayornan cu te ainda tin e miedo di hiba nan yiu na scol, mirando e aumento di casonan di Covid-19.

Anueska Baly, director di Stichting Katholiek Onderwijs Aruba (SKOA) a splica cu e ta compronde cu esaki ta un situacion fastioso y cu tin hopi hende, specialmente mayornan, cu tin miedo. Pero “nos tin tur e cosnan cu ta posibel den nos, man caminda cu por mantene e mucha sano”, specificamente den dianan aki cu tin mas casonan activo desde cu e virus a yega na maart.

Baly ta kere cu pa con fastioso cu e situacion por ta, tur tin cu pasa riba e miedo y tuma lo cual a wordo siña di e virus y acepta esey den bida cotidiano, pa motibo cu si hende no ta haci esey y ta keda cas, niun hende por haci nada.

Ademas, Baly a menciona cu awe algun scol ta habri 50% pa cuminsa. Tambe tin otro scol cu lo habri 100% pa asina mantene den e reglanan di prevencion y precaucion bao protocolnan di Directie Volksgezondheid Aruba (DVG); pero tambe di e protocol cu nan a traha pa muchanan y docentenan por bay back na scol na un manera hopi sigur.

Tambe el a informa cu nan ta bay keda asina te cu yega e vakantie di luna di october, y despues di esey nan ta bay habri full, ‘si tur cos ta bay bon den e normal nobo’, Baly a sigura.

Aunke muchanan ta 50% fisicamente na scol, por ta un dia si y un dia no, of un siman si y un siman no, esey ta depende di scol. Pero locual nan ta haya di material di educacion ta 100%, loke ta nifica cu e mucha cu ta na cas e tin material pa traha y no ta bay haci’e online.

Di esaki el a señala cu no ta tur alumno tin e mesun facilidad pa traha na cas online. Tambe el a trece dilanti cu di parti di nan como Skoa a acorda cu DVG pa nan por pasa na tur scol pa controla, pa wak si tin tur cos cu mester tene na cuenta y asina cumpli cu tur protocol.

Di e manera aki, ‘nos por duna e mayor-, alumno- y docentenan e siguridad cu tur cos a wordo haci den un manera responsabel’, Baly a declara.

Manera ta conoci, Skoa tin un cantidad di 46 scol, y nan a palabra cu departamento di Salud Publico cu nan lo bishita tur scol e simannan aki y despues cada tres luna, pa controla y asina nan por haya e siguridad pa e mayornan. “Pa nos ta importante pa mayornan tin e siguridad cu nos ta haci tur di nos banda pa tin e salud di e alumno na prome luga”, Baly a manifesta.

Tambe el a declara cu e virus Covid-19 ta un malesa cu no lo bay na e momentonan aki y cu e hende no por keda na cas y no haci nada. Al contrario, mester tuma e medidanan necesario como laba man, mantene distancia y bisti tapaboca pa por sigui cu bida y adapta na e normal nobo.

Tocante ‘Homeschooling’ cu minister di Enseñansa, Armando Rudy Lampe a referi den conferencia di prensa di dialuna pasa, Baly a señala cu Skoa lo no haci esaki, pa motibo cu nan ta laga esey na mayornan dicidi si kier manda nan yiu scol. “Skoa ta haciendo todo por todo pa mantene e siguridad di mucha na scol. E parti cu e muchanan ta na cas cu homeschooling y e maestro tin cu duna les na scol y na cas, pa Skoa esey no ta factibel”, pa motibo cu nan no kier pa nan docentenan ta haya nan mes confronta cu trabounan cu mas stress. “No ta facil pa mantene na scol den un situacion no normal y ainda tin cu yega cas despues di trabou, cu por ta bezig cu su mesun famia, y bezig tambe cu muchanan cu no a bin scol”, Baly a bisa.

Pa finalisa, el a comenta cu cada director di scol por dicidi pa habri mas sanamente posibel. Ademas el a sigura cu scolnan cu no tin hopi mucha den klas lo dicidi di habri awe na 100%. Pa scolnan grandi por ehemplo, cu tin 28 mucha den klas, e ta bira 14 alumno, p’esey nan a laga e decision ey na cada scol, pa wak kico ta mas miho pa nan.