Minister di Husticia ta ilustra su rol den Huis van Bewaring y Edificio Brown

No a bin mocion di desconfianza contra Minister Marisol Lopez Tromp. Pero particulamente fraccion di MEP tabata kier sa si Marisol Lopez Tromp a haci denuncia contra e casonan di corupcion cu el a trece dilanti.

Lider di fraccion di POR, cu a pidi e reunion inicialmente pa kita confianza di e Minister di Ordenanza Teritorial, Infrastructura y Medio Ambiente, esta Dellanire Maduro, a elabora cu berdad a bin informacion nobo durante e disertacion di e Minister y durante y despues di e mediacion di Prome Minister. Pero su discurso durante e di dos tanda tabata mas bien pa ilustra cu e mes a haya hopi atake politico te cu a haci remarca riba su aspecto fisico, pero alabes el a mustra cu kisas ta ora pa esnan cu tin hopi tempo den politica tuma nan retiro y laga hobennan crece.

E declaracion aki tabata djis un di e varios momentonan yamativo durante un reunion cu a keda colga cerca comunidad, desde cu a suspende dia 31 di juli. A continua awe, cu mas di un ora di retraso, pero cu un presentacion di Minister di Husticia, Andin Bikker, kende a pidi oportunidad pa defende su maneho riba puntonan cu a bin dilanti durante e prome tanda dia 31 di juli. Fraccion di AVP no tabata di acuerdo cu a kibra e reglamento di ordo, pasobra e Minister no tabata invita pa e reunion inicialmente y mas ainda, ni Parlamentarionan cu no a presencia e reunion yama cu urgencia dia 31 di juli por a hiba palabra awe.

Asina mes, Presidente di Parlamento Adi Thijsen a permiti Bikker pa splica e proceso di dos proyecto cu segun Minister Marisol Lopez Tromp a bay completamente contra ley di comptabilidad y cu tambe a crea tension entre e dos miembronan di Gabinete Wever Croes cu alabes ta di e mesun partido, POR.

Bikker a bisa cu e cartanan di POR di dianan 5 y 24 di juli unda a bisa di no kier sigui cu Marisol Lopez Tromp como miembro di partido a caduca, despues cu a pasa den mediacion. E ambiente a mehora, segun Andin Bikker y ya caba tabatin reunionnan di Conseho di Minister.

Pero e no tabata kier pa percepcionnan keda biba, y aki e tabata referi na e asina yama noodvoorziening pa personanan indocumenta y tambe e huur di un edificio nobo pa Cuerpo Policial.

E centro na Dakota di Guarda Nos Costa tabata uno cu a informa Parlamento di dje, aunke cu oposicion mes no tabata presente, segun e Minister di Husticia. E motibo pakico no a bay den destaho publico ta pa motibo di e situacion di emergencia unda mester a ubica algun cien persona indocumenta mas pronto posibel. Y articulo 26 di Ley di Comptabilidad ta permiti pa desvia di e proceso aki unda pa medio di un Decreto Ministerial ta instrui pa expande e centro. E Minister ta nenga cu no tabatin conseho. Al contrario. Ademas, ta a base di e conseho huridico cu a laga Guarda Nos Costa sigui negocia pa logra e construccion di e centro. “Ami mes no a controla si DOW lo tabatin un papel den dje. Ami no sa ken a consulta ken. Nos a firma pa ehecuta e acuerdo. Ta despues a bin un carta di DOW cu e pregunta si a sigui e exigencianan di destaho publico.”

Pero e Minister a ilustra cu e situacion di Covid a crea un emergencia unda a sali afo cu pa dia mester a interna personanan cu a bin Aruba como turista y nunca a bandona e isla. E facilidad e momento ey tabata solamente pa 80 persona y mester a expande mesora. Riba dje, mester a tene cuenta pa crea espacio di cuarantena pa Covid19. “Ami a sigui e reglanan normal, conforme tur proceduranan di un Decreto Ministerial.”

Pa loke ta e edificio nobo pa Cuerpo Policial, e Minister a splica cu e edificionan bieu tabata haci e trahadonan malo y mester a busca nobo. Cuerpo Policial mester di edificionan cu espacio, pasobra no ta solamente oficina, sino areanan pa interogacion y detencion. Consecuentemente a identifica e dos edificionan similar na Wayaca, un di nan conoci como Brown Building. Atrobe, esaki a sosode a base di idea di Cuerpo Policial pa lanta un compleho hudicial. “Ami no ta inventa e wiel. Ma haya conseho y mi a duna e instruccion na KPA pa sigui cu e proceso.” Segun e Minister tin exigencianan pa un compleho asina, manera adaptacion di bentananan y consecuentemente mester a cuminsa paga huur prome cu drenta pasobra e trabou di adaptacion ta tumando luga. Pa loke ta e discusion ken ta e doño, e Minister a bisa cu un di e edificionan lo a keda cumpra pa un persona, cu entretanto a perde e opcion ey.

Pa loke tabata e discusion entre Minister Lopez Tromp y Bikker riba e gedoogbeleid di piscamento di harpun, e ultimo a bisa cu esaki tabata un mal entendimento y cu berdad ta un encargo di su colega. “No ta cuestion di un mal intencion, sino di wak con por yega mas cerca na peticion di piscadonan.” Bikker ta kere cu por sali afo na un forma pragmatico teniendo na cuenta interes di naturalesa y di e piscadonan, cu diabierna awor ta planea un demostracion.

“MI intencion ta pa kita e percepcionnan robes cu por a lanta despues di e prome tanda di e reunion di dia 31 di Juli. E ta na interes general pa mi clarifica nan. E Minister a sigura di ta mas cu dispuesto pa bolbe Parlamento pa bay mas profundo riba e tema.

Pero e reunion a dal otro buelta ora cu miembronan di fraccion di MEP a exigi Minister Lopez Tromp pa documentonan cu ta sostene su ponencia cu e lo a topa cu casonan di corupcion. A lanta un discusion si esakinan mester ta publico of no. E Minister a bisa cu no tur por ta publico pasobra algun ta parti di un investigacion penal y lider di fraccion di MEP Rocco Tjon no a haya esaki un argumento valido, pasobra no mester tin nomber di personanan pa laga Parlamento haya tur informacion. A tuma un pausa di casi cuater ora pa Parlamentarionan por a lesa e como 30 documentonan cu a pone pa lesa, cu ta 24 mas cu locual a pone dia 31 di Juli. Segun Minister Lopez Tromp tambe a contesta diferente pregunta riba e incinerator, y a haya mas informacion y ta hayando mas informacion.

E preguntanan di e Parlamentarionan tabata hopi riba e casonan specifico y cu nan kier mira casonan specifico. Mayoria no ta sinti cu e documentonan presenta a ilustra casonan pisa di corupcion y si e Minister lo tabatin indicacion, anto nan lo a spera cu Lopez Tromp lo a entrega keho na autoridadnan y demostra esaki na Parlamento.

Lopez Tromp a bisa cu e ta haya cu ta mundo riba su cabez, pasobra e mester a defende su mes contra un posibel mocion di desconfianza. E mes a bay Parlamento pa tende kico tin contra dje, pero awor ta exigi di dje cu e mester bin cu prueba.

Presidente di Parlamento Ady Thijsen a bisa di su banda, cu esey no ta un caso, pero apesar cu ta mustra cu e fraccion di POR no ta bay entrega mocion, e ta necesario pa comunidad cu ta trece claridad pa comunidad por haya confianza.