Na bispo di Dia di Prensa, Prome Minister Evelyn Wever-Croes a expresa un breve mensahe pa e gremio periodistico.
E ta haya na su parecer cu Dia di Prensa cu a wordo celebra ayera tabata un dia di reflexion, ya cu prensa ta hunga un rol importante den democracia di nos pais.
“Nos ta considera prensa como un di e pilarnan sumamente importante den garantisa esaki,” el a bisa.
Igualmente e ta haya cu prensa ta enfrenta retonan den su trabou diario, specialmente den e tempo aki cu e fenomeno conoci como ‘fake news’ of noticianan cu no ta real, ta algo cu ta afecta tur hende, specialmente prensa.
E ta haya cu prensa ta un poder mes importante y poderoso cu nos kier pa e ta. E mandatario a pidi pa nos protege e libertad di expresion cu nos tin, cu ta un derecho fundamental. Tambe pa nos sigui aplica e derecho aki pa medio di prensa di un forma responsabel, manera nan ta bin haciendo, el a declara.
“Un pabien di awor caba pa tur miembro di prensa y un danki pa comunica tur loke ta considera importante pa comunidad haya sa,” Prome Minister Wever-Croes a bisa.
Radio teleton
Tambe el a referi na un evento cu tin di haci cu prensa, esta e radio teleton “Happy to Give Back” cu den 48 ora a logra e bunita suma di 211.461,91.
E mandatario a felicita tur esnan cu a uni durante e fin di siman pa yuda esnan den necesidad. E fondo colecta lo wordo distribui cu e fundacionnan cu ta brindando ayudo na esunnan den mas necesidad, Fundacion pa Nos Comunidad, YMCA, Fundacion pa Uni Man pa Cria Nos Muchanan. E tabata un evento cu a uni no solamente e medionan di prensa, sino comunidad en general pa yuda esnan mas afecta debi na e Covid crisis aki.
“Covid a dal nos pais hopi duro y e ta trece reto cune tur dia…” el a bisa.
Premier Wever-Croes a duna un danki na esnan cu a contribui pa e radio teleton aki por a colecta e suma bunita aki. E ta haya cu e evento aki tabata un bunita ehempel di inspiracion cu ta mustra cu nos lo bay sali di e crisis aki tambe, si nos ta uni.
