Hulanda a mustra di no ta confia nos politiconan cu nan placa y tin biaha mester dal stap patras pa dal dos dilanti despues. Esey ta pensamento di dos lider sindical, cu ta di acuerdo cu kisas ta ora pa acepta e condicionnan di Hulanda pa bienestar general di Aruba.
Pasobra e situacion financiero di famianan ta urgi esey. “E enemigo mas grandi di hende ta hamber. No ta prudente pa pusha nos pais den pobresa y miseria pa motibo di un par di documento cu despues di tempo por cambia,” tabata e palabranan cla di Diego de Cuba, lider di Sindicato di Trahadonan Arubiano, STA.
Hubert Dirksz di FTA, ta sinti cu e condicionnan cu Hulanda ta impone, ta pasobra simplemente ‘nan no ta confia politiconan Arubiano cu nan placa’. E posicion aki sinembargo no ta nifica cu e dos lidernan sindical ta cla pa duna Hulanda un premio pa su actitud. Al contrario. Sinembargo, e realidad ta cu Aruba ta cu su lomba na muraya y tin hopi tension. Particularmente pa motibo cu e recuperacion economico lo tuma por lo menos tres aña y sin sosten Hulandes, e situacion social lo bira uno explosivo.
STA
“No ta asina cu Aruba ta perde autonomia, manera hopi hende ta bisa,” Diego de Cuba a comenta na Bon Dia Aruba. Repasando tur e documentonan, e ta posibel pa sigui negocia despues. Sinembargo, berdad ta cu dirigentenan Hulandes lo por bin ‘snuffel’ den cierto area, ‘algo cu kisas cierto Minister y Parlamentario lo no gusta. Pero si nan no tin nada di sconde, nan lo no tin nada di teme’, De Cuba a bisa. “Ta for di Status Aparte nos a mira cuanto Minister y Parlamentario a enrikece nan mes. E cos aki mester caba. Como pais chikito, nos mester a maneha nos asuntonan miho.”
Di otro banda, berdad mester un balans. Pasobra e ta di acuerdo cu Profesornan di Ley di Hulanda, kendenan a ilustra cu Hulanda no ta actua corectamente riba nivel estatal. Nos pais ta den un crisis y ta haci uso di e situacion pa bin cu condicionnan pisa. Esaki, mientras cu net awor Aruba a cuminsa bay den bon direccion. “Presupuesto tabatin un surplus. No ta Aruba a bisa esey, ta CAFT a bisa esey. Y como tal, a recomenda pa Aruba a haya e di tres tranche di prestamo. P’esey ta straño cu diripiente Hulanda a mara e prestamo na condicionnan mas estricto.”
Ta poco biaha cu politiconan di diferente partido ta comparti e mesun pensamento y aki, mayoria ta contra pa acepta e condicionnan di Hulanda. “Mi ta compronde nan punto di bista.” De Cuba ta compronde cu Parlamentarionan tin miedo cu Aruba ta bay den e mesun direccion cu Boneiro y St. Eustatius.
Lo por considera otro rumbo tambe, pasobra tin placa na Aruba. E fondo di Pensioen General di Aruba, APFA tin biyones y banconan tambe, a pesar di a haya sla, tin hopi likides. Aruba lo por saca bononan pa gana tempo y negocia di berdad cu Hulanda. “No ta e intencion pa debilita e fondonan, mas ainda, e prestamonan aki lo ta hopi caro. Ademas, fondonan cu ta disponibel lo bay pa e carga salarionan y ta nifica cu un biaha mas, inversion den diversificacion lo no ta posibel y atrobe esey ta ilustra e posicion vulnerabel cu Aruba ta aden.”
Entre spada y muraya
De Cuba a bisa cu e no lo tin problema pa lanta un revolucion na Aruba pa bringa e condicionnan. “Mi por lanta hendenan. Es mas, mi tin un documento y carta traha caba pa manda VNO, Tweede y Eerste Kamer. Pero kico e ta bay yuda. Rutte y Knops ta para firme den e posicion di Gobierno Hulandes.”
De Cuba ta sinti cu mester sigui negocia cu Hulanda pa cambia pensamento y algun di e medidanan. Si ta posibel, hasta prome cu acepta e condicionnan. Ideal lo tabata si por a bay Nacionnan Uni of otro organisacionnan global. Riba e pregunta si Aruba tin e tempo pa esey, De Cuba a bisa sinembargo cu: “nos ta entre e spada y muraya.”
Propio responsabilidad
Diego de Cuba a bisa si cu e problema di Aruba, for di Gobierno te na ciudadano, ta cu no ta spaar. “Mi a yega di trece e asunto aki dilanti mas cu cuater aña pasa. Si nos tin 55 mil trahado, y dunado di trabou (incluyendo Hulanda) y trahado spaar hunto sikiera 100 florin pa luna pa un fondo di emergencia, den un aña lo a logra 66 miyon florin. Y si a inicia cu esaki e momento cu STA a sugeri esaki, lo tabatin un fondo di emergencia pa trahado di 264 miyon florin. Lo por a usa parti di dje hasta pa cierto inversion sin cu mester paga interes halto. Algun compania cu si a acepta un fondo di spaar asina y nan ta usando esey awor.” Kisas e ta un les pa nos pa nos siña con vulnerabel y pober nos ta. Nos mester cambia nos sistema di bida. Ta un hecho cu mayoria hende ta biba riba entrada. Si djis mira cuanto auto grandi tin riba caminda, cuanto hoben tin auto grandi.
No ta pa semper
De Cuba ta bisa cu e situacion ta hopi cla. “Yega na unda mester yega. Si esey ta e condicionnan, nan ta pa seis te cu siete aña. Y seis aña ta pasa den un rato. Mi ta prefera pa nos perde un bataya, pero no perde e guera.”
Diego de Cuba na final, pues, no ta mira unda otro lo por saca e placa pa sostene economia di Aruba. E loonsubsidie y FASE a wanta economia draai y a permiti hende sobrevivi. “E tabata un alivio. Ami mes ta traha na Aeropuerto y turistanan ta keda drenta, y buelonan ta aumentando. Pero nos no ta bay yega na e nivel di 2019 pa awor. Pasobra otro paisnan tambe ta pega cu Covid19.”
Diego de Cuba a bisa cu e pandemia a mustra con vulnerabel y ‘con pober nos ta. P’esey, awor no ta momento di actua cu terkedad,’ e sindicalista a comenta. “Bo ta imagina Aruba dos luna sin loonsubsidie, sin FASE? Lo no tin placa pa paga onderstand, nos lo ta mal para.”
FTA
Federacion di Trahadonan Arubano, FTA ta sostene e carta cu AHATA y otro gremionan comercial a manda pa Gobierno siman pasa. “Prome Minister mester evita cu tin drama, mester evita cu tin caos, y empeoramento di un economia manca,” su Presidente, Hubert Dirksz a bisa.
“Si no tin subsidio di salario, diferente empresa lo cera na porta, hopi hende lo ta na cas y e situacion social lo ta hopi mas grave.”
Dirksz a bisa cu e ta di opinion cu berdad Hulanda ta pone condicionnan fuerte, kisas te hasta ta abusa di su poder. “Si tin espacio pa negocia, negocia. Pero na mesun momento, despues di papia cu diferente sindicato, nos tur a expresa cu nos mester mas transparencia di parti di Gobierno, pasobra si nos no sa kico ta pasando, unda e negociacionnan ta y asina nos no por duna nos aporte tampoco.”
Pasa loke mester pasa, si companianan no tin entrada, ta bay yega un momento cu no por paga salario. Sigur no cu locual tin acorda. “Tin hopi cu ta paga 80 porciento danki na e subsidio y sin subsidio lo no por paga mas cu esey. Nos situacion ta depende di Gobierno. Pero ya caba, manera cu e ta caba, tin hopi negoshi ta pasando dificil, y trahadonan no tin ningun garantia kico ta bay pasa. E ta dificil.”
No tin confianza den politico Arubiano
Segun FTA, e enfoke mester ta pa mira con, hunto cu Hulanda, percura cu ta surpasa e crisis mas sigur posibel. Dirksz ta compronde cu pa politiconan, e ta dificil pa entrega e maneho total den man di Hulanda, y no solamente e parti financiero.
“Nos por bisa cu Hulanda su posicion ta, basa riba nos record di Status Aparte te cu awo, cu no ta confia nos. Nan no ta confia ni un politico, ni esunnan awor.”
FTA ta consciente cu Secretario di Estado Raymond Knops a bisa no lo duna ningun concesion riba e condicionnan pa e prestamo y e pakete di reforma y recuperacion. “E unico forma pa Aruba por a negocia, ta si tabatin forsa pa negocia. Si bo ta man bashi y cu tur locual mester pasa, tur placa, delaster un cen cu nos lo usa na Aruba, ta bin di Hulanda, anto Hulanda lo exigi pa e mes maneha su placa.”
Den pensamento di Dirksz, e posicion Hulandes aki ta basa riba tur locual a pasa den ultimo 34 aña. “Considerando cu e placa ey, cu ta bay pa fundacionnan, companianan, e no ta mishi e area di Minister di Finanzas so. E placa di Hulanda lo mishi tur otro sector cu ta cay bou maneho di otro Ministernan tambe. Pues nan ta mira e relacion cu tur e otro Ministerionan como importante pa nan mes maneh’e.” Den concepto di Dirksz, den e sentido aki, Aruba no por bisa mucho mas.
Autonomia
Pa loke ta e derecho di autodeterminacion, e ta compronde e postura di politiconan Arubiano.
“Mi ta kere cu Hulanda lo mester tene cuenta cu esey. Pero Hulanda ta bay argumenta a cambio cu no ta kita autonomia, ya cu e ta un paso temporal. Hulanda ta bisa cu e situacion ta temporal y mester hancr’e un caminda. Profesor Kunnemans di otro banda a duna espacio pa hiba un negociacion politico. Hulanda mester haya un garantia si. Pero no ta Gobierno so por dicidi. Gobierno ta para su so, y Hulanda ta mira esey.”
Dirksz ta bisa cu si tabatin un union entre gremionan y Gobierno lo por a logra mas. E cumbrenan organisa pa Gobierno no a duna suficiente informacion y sigur no tabata dialogo di forma cu gremionan por a duna nan aporte.
“For di politiconan por sinti hopi emocion, unda ta enfoca riba e lucha pa Status Aparte. Mi ta compronde. Pero tin un realidad di hende sin trabou y sin cuminda. Ta bisa cu Hulanda ta mal usa e momento pa bin cu su condicionnan, pero netamente pa e motibo ey mester a sinta hunto pa e fundamento di negociacion ta mas fuerte pa convence Hulanda.
Sinembargo awor aki e situacion ta insigur y ademas di Covid, e presion ta hopi grandi y e tension t’ey, cu por hasta yega na un explosion social.”
