Comerciantenan di Welcome Plaza cu suplica pa DIP y minister Lopez-Tromp

Comerciantenan di Welcome Plaza, ubica dilanti di waf di crucero na Playa, a convoca un conferencia di prensa ayera mainta pa trece dilanti nan mal contento y preocupacionnan pa loke ta trata maneho di DIP.

“Esaki, e conferencia di prensa aki ta bira nos ultimo recurso, nos ta espera cu di e forma aki nos por haya atencion debido” for di esunnan cu ta encarga di e maneho y mantencion di Welcome Plaza, asina menciona Elizabeth Guanipa, ken ta artesano y comerciante den un di e lokaalnan den e area aki.

Nan ta solicita atencion di Directie Infrastructuur en Planning (DIP) y specialmente di minister di Infrastructura, Marisol Lopez-Tromp, pa motibo cu el a expresa cu nan ta pensa cu nan expresionnan no a yega na su oido, of no a yega cu e enfasis cu tabatin mester.

Di mesun manera, Guanipa a trece dilanti cu nan intento pa yega na acuerdonan cu DIP ta data for di mesun aña cu Welcome Plaza a habri na 2018. Nan a cuminsa manda cartanan no solamente como Asociacion di Comerciantenan di Welcome Plaza, pero tambe individualmente otro comerciantenan di e luga, pero ningun di e carta a haya un contesta, Guanipa a sigura.

Den e cartanan nan a expone un lista largo di asuntonan cu a wordo menciona of priminti, pero nunca a wordo aregla y esey ta afecta e funcion di e plasa. “E potencial cu e plasa aki lo mester tin como e prome impresion cu e turistanan crucero ta haya y pa e turismo en general” ta afecta, el a señala.

Ademas, nan tambe a inclui sugerencia pa saca e maximo probecho di e inversion cu a haci den e liga cu fondonan publico y cu segun el a destaca, “ta core peliger di bira un structura bandona, otro ruina mas”.

Pa loke ta trata e crisis di Covid-19, Guanipa a expresa cu e situacion a yega na tal punto cu ta insostenibel pa e comerciantenan y artesanonan. Diabierna 13 di maart ultimo tabata e ultimo dia cu tabatin un barco na waf y tabata e ultimo dia cu Welcome Plaza a habri su portanan.

Pero, a pesar cu frontera a habri no tin fluho di turista pa e area aki, cu ta hustifica pa e tiendanan por habri. Mesun situacion ta pasa na e mercado cu ta ubica na otro banda di e plasa. Guanipa a comenta cu expertonan local y den exterior ta pronostica cu industria crucero no lo ta back pa e aña aki mas y ora cuminsa, lo ta na un nivel hopi abou, manera a keda conoci den pasado.

“Nos ta e artesanonan cu tanto ta papia di dje di bay promove, empresarionan chikito cu tambe a scucha cu mester bay pusha pa nan bay dilanti. Nos kier, nos mester y nos ta desea di haya e ayudo aworaki, pasobra nos mester di dje”, Guanipa a bisa.

El a splica cu nan a aplica pa e ayudo Fase y tin algun cu a haya pa un luna of dos, pero tambe otro cu no a haya e ayudo mes y cu aworaki cu ya tin seis luna cu e negoshinan ta cera. Tin aproximadamente 30 famia afecta pa e situacion aki.

Aparte di e preocupacion cu nan tin, tin tambe stress constante pa motibo cu nan no sa kico lo pasa cu nan inversion cu nan tin den e luga. El a expresa cu comerciantenan kier sinta cu DIP y traha cu nan pa yega na un solucion.

Lia Maldonado, un di e artesanonan di e plasa cu tin 44 aña den negoshi aki, na momento cu a cuminsa na Eagle cu artesania Arubiano a presenta algun documentonan pa medionan di comunicacion presente, riba cual a pone e problemanan cu nan a haya na e luga aki for di 2018. Por ehemplo, algun portanan y diferente aspecto cu mester wordo drecha, pero nunca nan no a haya oido.

Tambe Maldonado a bisa cu den e temporada aki nan a purba di bay personalmente na DIP, pero si no tin afspraak no ta atende nan. “Minister di Infrastructura, scucha nos y wak tur e problema cu Welcome Plaza tin, cu no ta habri aworaki, cu no tin ni crucero, ni turista y asina con nos ta haya entrada?” Maldonado a specifica.

Algun otro problema cu infrastructura ta presenta, ta trata cu si awa ta yobe nan no por habri, of si awa ta bay cay nan mester muha pa warda tur e mercancia y asina por cera e luga. Tin hopi aspectonan cu no ta cuadra pa ta un luga agradabel pa e bishitantenan. Ademas di esey nan tin tres baño, cu un so ta wordo usa, y si esunnan cu tin e yabi no t’ey, e bo no por usa e baño. Tambe ora turistanan di edad avansa ta cana, nan no tin un luga pa sinta.

Di loke ta trata e huur, nan tin seis luna di huur cu nan ta pagando sin un turista. Otro comerciantenan a dicidi di baha e suma di huur, nan a firma varios peticion pa wak si nan por papia over di e huur. “E idea tabata cu nos kier pa nan stop di cobra huur pa seis luna, y asina nan no cobra nos mes. Pasobra nos ta cera, pero nos no por haya ningun contesta di DIP.”