Parlamentario, drs. Mervin Wyatt-Ras a declara cu awe porfin Parlamento a haya informacion di minister di Salubridad, Dangui Oduber, hunto cu Minister Presidente, Evelyn Wever-Croes, encuanto desaroyonan rond di COVID 19. Tambe tabata presente representantenan di VGZ, oficina di Calamidad y ATA. E reunion aki a ser yama pa dia 20 di augustus, e dia cu Lider di AVP hunto cu Wyatt-Ras y coleganan a organisa 2 sesion cu 16 stakeholders pa delibera encuanto di e malesa devastador aki y su consecuencianan. Intencion lo tabata pa boycott e brainstormsessie. Parlamento despues a pospone pa awe. 

Wyatt-Ras durante e reunion den Parlamento tabatin palabra di elogio pa tur profesional cu ta trahando ariba e tereno aki den e diferente sectornan y di crisisteam. El a critica si e falta di comunicacion y falta di transparencia di gobierno pa loke ta trata decisionnan y proceduranan y en especial cifranan y datonan. Desde cu a habri frontera a bin un second wave di casonan.
Actualmente tin 1165 caso. Di esaki 17 caso so ta di no-residentenan y 1148 caso di residente. Tin 26 persona den hospital di cual 7 den ICU. Tin hopi contagio den grupo di hobennan, sinembargo por nota cu e contagionan ta bai tambe pa esunnan di edad mas halto. Por bisa 50% di casonan di contagio ta den famia, 25% na trabou y 25% no tin origen defini.
Wyatt-Ras no ta haya corecto cu den bijeenkomst di caracter informativo minister Dangui Oduber, cu no ta contesta preguntanan por escrito di Wyatt-Ras y su coleganan, ta bin abusa e parlamentario cu palabra y haci politica anticua. Ora Wyatt-Ras a pone na su lugar Presidente Ady Thijsen a cera microfon di Wyatt-Ras pa defende e minister. Segun Wyatt-Ras tur hende tin mesun derecho. Si e minister ta ser permiti dor di Presidente pa ofende Wyatt-Ras y gaña cu no a bin reunion, Wyatt-Ras tambe mester tin derecho di defende su mes paso tabatin reces y si pueblo por subi website por mira cu hopi dia e minister aki no a bin un reunion tocante salubridad.
Segun Wyatt-Ras Minister Dangui Oduber mester ta mas serio y no paso e ta sinti cu el a faya den no yama reunion encuanto COVID mas tempran den tempo e mester perde respet.
Presidente di Parlamento no a gusta cu Wyatt-Ras a haci hopi pregunta pero kico e kier si e minister no ta contesta su preguntanan por escrito e tin cu haci nan ora e mir’e den Parlamento tog?
Wyatt-Ras pues a lansa entre otro e siguiente preguntanan:
E la puntra cuanto test a haci precies y si ta sigui test despues di COVID positivo? Cuanto test a ser haci? Cuanto test ta ser haci pa dia y na unda y con e cantidadnan  ta parti?
Den caso e edad di esunnan positivo ta subiendo, con lo por proteha esunnan mas grandi di edad?
Kico ta haciendo como medida pa baha e cantidad cu no sa origen? Con?
Wyatt-Ras ta trece padilanti e falta data. Corsou ta publica regularmente un curve di casonan y diferente analisis. Dicon nos no ta haci esey?
Den seconde wave di unda e brote ta origina? Tui y con a sigui?
Dicon no a tuma medida di toque de queda y samenscholing mas tempran?
Na Hulanda cuarentena ta 10 dia en bes di 14 dia. Kico ta pensa di esaki? Dicon tin prohibicion di bishita di max. 4 persona na casnan y scol cu tin hopi mucha hunto si mag di habri dia 3 di september?
Tur scol lo habri of esaki lo bay gefaseerd, en bista cu tin diferente scol cu ta carece na wasbak, wc adecuado, ventilacion dor cu tin airco, material desinfectante etc.?
Dicon muchanan di basisschool no mester bisti tapaboca mientras WHO y Unicef awor ta indica esey? Mescos cu negoshinan a ser controla, scolnan lo ser controla?
Con e sistema di cuarentena ta vloei den esun di isolacion? Cuanto dia esaki lo ta total?
IHR, RIVM tin reunionnan y contacto regular. Esaki ta un proceso cu Parlamento di Aruba a contribui na dje. Por otorga Parlamento e bista di funcionamento di e crisisteam structura schriftelijk? Cua ta recomendacion pa esnan cu tin problema psychologico/  Psychiatrico?
Con experencia ta cu e-card, test haci den exterior prome cu yega Aruba? Si un persona nenga na aeropuerto di haci test di COVID, el lo bay den cuarentena? Ken lo vigila esaki? Cuanto persona ta vigilando e proceso aki y ki ta e experencia?
Pa loke ta trata e app di VGZ, parce no tur hende tin internet pa download e app. Con ta haci e ora? Dicon tin persona ta haya resultado di test via app den 2 dia, siendo cu ta bisa cu e lo ta cla den 8-9 ora?
Cuanto hende ta test? Y unda hospital, VGZ, cual compania priva?
Tin operacionnan cu no por sigui dor di Covid. Kico por haci pa laga nan bay dor? Den caso tin mas caso di Covid con hospital por traha hunto cu IMSAN pa por haci cierto operacionnan? Con ta para cu e cooperacion cu hospitalnan?
Ki ta experencia cu e call center, den caso tin hende no por haya dokter di cas?
Con e website ta funciona?
Hopi hende specialmente hobennan no ta mira persconferentie. Con ta duna informacion na un forma mas atractivo cu por yega tur grupo di edad?
Wyatt-Ras a trece dilanti cu e expresion di sra. Wever-Croes cu nos hendenan mes ta cana busca COVID no ta bon. Con por stop di plama guilthy feelings di publico y tog yega na publico di un manera mas positivo?
Online shopping no ta facil ainda. Esunnan di edad no por yama pidi comestibel? Con por haci posibel cu e proceso aki por ser facilita pa evita cu esunnan di edad mas grandi tin cu drenta den supermercadonan grandi cu e peliger di contagio? Pa loke ta trata e lekkage di test cu minister Oduber enbes di carga su responsabilidad kier acusa otro hende di dje, kico a haci caba pa investiga esaki? Pasobra no ta posibel cu informacion priva di nos hendenan ta riba caya. Esaki ta inaceptabel segun Wyatt-Ras. Wyatt-Ras ta di opinion cu gobierno mester duna informacion mas frecuente na Parlamento encuanto e malesa COVID y no haci comosifuera mester mendiga pa por haya informacion. Tampoco gobierno mester rabia ora cu profesionalnan duna informacion na Parlamentarionan di oposicion. Te ainda cu Wyatt-Ras sa nos ta biba den un pais democratico. Nos pueblo sigur no ta acepta ni dictadura ni censura.