Randy Arends, cabesante di scol a ofrece un conferencia di prensa pa trece dilanti informacion di loke ta trata e comienso di aña escolar nobo 2020-2021, y con scol ta den proceso di preparacion pa ricibi 266 alumno di 11 klas.
Arends a expresa cu ya caba nan tin un siman prepara pa e apertura di scol cu ta cay bou directiva di Skoa. Nan ta bezig trahando riba tres escenario cu ta: habri scol 100% cu tur mucha na scol, habri 50% cu diferente manera organisa pa nan t’ey 50%, y e ultimo escenario ta cu ni un mucha ta presenta na scol cu e posibilidad pa nan bay den enseñansa riba distancia.
Pa motibo cu cosnan ta cambia dia pa dia, segun Arends a señala, nan tin cu traha riba e tres escenario aki, den cual nan tin basta claridad riba dje y nan ta wardando e señal pa wak si nan lo cuminsa dia 3 realmente y asina wak kico ta bira e organisacion y con esey ta bay sucede. Pa loke ta trata e plan di e lesnan, esey ya caba ta hinca den otro.
“Ta cuestion di ki dia ta cuminsa y cua escenario”, Arends a menciona.
Asina mes, ayera atardi mester a tuma luga un reunion na unda nan tabata wardando e contesta definitivo. “Esey ta haci fastioso tambe pa plania y pa nos manda informacion si cos lo cambia durante fin di siman. Aworaki nos ta wardando.”
Di loke ta trata preparacionnan na scol, Arends a informa cu maestronan y personal cu ta traha na scol ta haciendo nan esfuerso y nan preparacion. E parti bon segun loke el a sigura ta cu tur cos bay digital y ta warda y na e momento ey nan por haci nan cambio hopi lihe den e contenido di e materianan.
Su persona como cabesante tin contacto cu otro cabesantenan of guianan interno di diferente scol tambe pa asina haya y comparti diferente idea.
Tocante e prome ola di casonan di Covid-19 na Aruba, Arends a splica cu nan a keda basta siman sin duna les y ora nan a bin back, nan a bin cu 40% y 60% loke a duna un guia pa nan por traha. Nan a ripara cu “trahando cu mita di grupo di mucha e ta duna su beneficionan”. Na e momento ey esey ta sirbi pa kita e retraso; pero aworaki e muchanan tin un retraso atrobe y nan tin cu traha riba dje.
Por ehemplo, nan ta pensa cu ta depende di con por cuminsa, y pa fin de september por ta cla pa kita e retraso cu algun muchanan tin. Pero tur cos ta depende di con nan ta bay habri y con nan por habri eigenlijk.
Di loke ta trata e di dos opcion, cu ta trata 50%, esaki ta nifica cu muchanan lo asisti pa scol dos biaha pa siman y nan ta haya mas materia pa nan train na cas. E maestro ta duna su instruccion, e muchanan ta bay cas y traha riba dje, y ora nan ta bay back scol, e maestro ta controla y ta duna materia pa muchanan por haci nan les na cas. Esaki ta keda dificil, ya cu “no ta tur mayor ta disponibel pa sa con por duna e materia nobo pa e muchanan”, Arends a sigura.
Tocante e proceso di adaptacion di maestronan cu e lesnan online, Arends a trece dilanti cu St Paulus School a cuminsa 9 aña pasa cu enseñansa riba digitalisacion. Nan maestro tin basta habilidad den traha cu materia digital, aunke el a declara cu e parti dificil e momentonan ey ta pa cambia nan sistema y bay na un sistema online digital. El a sigura cu e cambio asina ta tuma basta tempo, pa motibo cu maestronan ta custuma hopi cu papel, pero ora e cos a bira moderno y muchanan ta siña hopi door di wak y scucha, “e ora ey bo por busca mas video cu zonido pa e muchanan siña di dje”, el a afirma.
Durante e prome periodo na unda tabata na cas prome cu scol a cera, nan a siña traha cu diferente plataforma unda cu por pone e material digital.
“Maestro mester a siña den pura y pasa e informacion ey pa e mayornan”, el a bisa.
Di otro banda, e mayornan tambe ta haya nan mes confronta pa siña traha cu e materia digital. Nan mester a siña por ehemplo con por drenta den sistema, con por traha cu e-mail di e mucha, e plataforma yama Google Classroom y despues nan a bay na un plataforma cu ta un tiki mas sigur, segun el a comenta.
El a pidi pa mayornan pa tin hopi pasenshi pa e cambionan cu ta tuma luga y cu nan tambe tin cu deal cu cambionan na scol cu no ta bay asina lihe manera otro caminda. “Scol tin hopi regla y hopi structura”, Arends a finalisa.
