Ayera nochi, gobierno a tene un conferencia di prensa pa duna un update tocante e situacion di covid-19 na nos isla. Durante esaki, a referi un biaha mas na e lista cu a leak cu informacion personal di personanan cu lo ta positivo pa Covid-19, enfatisando cu e maneho cu DVG ta hibando ta esun adecua.
Bon Dia Aruba a puntra: ‘Los di e criminalidad di publicacion di e lista di pacientnan infecta cu Covid, locual a sali na cla ta e fayonan pa comunica y supervisa e personanan aki. DVG a cay atras den contact tracing?’
Sharlene Koolman di DVG a contesta: “No ta asina cu nos a cay atras den contact tracing. E lista cu a sali ta un lista bieu, y e listanan aki ta update regularmente. E lista cu a sali ta un lista cu e sistema ta genera tur mainta. E tin su balor agrega pa esunnan cu ta ricibi esaki, nan sa kico ta tene cuenta cune na momento cu ta haya e data aki.” E lista ey mester ‘clean up’ regularmente. Pero prome cu yama verifica e informacion (e ‘clean up’) mester manda e informacion di biaha, “pasobra si no e ora ey si nos ta cay atras cu e contact tracing”, el a bisa.
Na momento cu e informacion di un persona ta aparece ta pasobra un persona a duna su informacion pa bay haci test. Relaciona cu e personanan cu a aparece incorectamente riba e lista, el a enfatisa cu ta pidi pa e persona mes yena su datonan, pasobra na momento cu tin un eror den esaki, ta keda responsabilidad di e persona mes.
“Esaki mi kier a splica den un nutshell, no tin ‘fouten’, mi no sa si por husga DVG pa ‘fouten’. Pasobra tur sistema ta asina. Bo ta haya bo data, bo tin cu ‘clean up’ e data, y e ‘cleaning up’ di e data no a tuma luga ainda den e lista en cuestion.”
Ademas, Bon Dia Aruba a puntra, mirando cu Organisacion Mundial di Salud (WHO) ta urgi pa test na cantidad y asina logra un grado di positividad bou di 5%… Kitando e testmento na aeropuerto, e positividad den comunidad ta entre 20-25% dependiendo di e dia. Esey ta hopi halto. Kico esaki ta nifica pa e casonan di covid aki un of dos siman?
“Positividad na Aruba, pues for di cuminsamento te aworaki ta alrededor di 7%.” El a bisa cu por tuma esaki diariamente y compara esaki cu otro paisnan. “Berdaderamente di nos ta rond di 20-25% den e dianan cu a pasa, vooral pasobra nos a haya un brote, y ora bo haya un brote si bo lo test y bo lo haya un positividad mas halto.” Compara cu St. Maarten, cu tabatin siman pasa un positividad di 75%, ta djis duna un perpectiva di kico e informacion ta bisando. Si e positividad pa dia ta alrededor di un cuart, ‘kiermen bo ta haciendo bo trabou hopi bon’.
“E personanan cu ta sintomatico ta bezig ta reporta. Tin un grupo cu por ta asintomatico, y e grupo ey por ta bo nunca ta gar’e. Pero ora cu nan pega otro persona cune, e persona ey si. Pues pa e motibo ey bo por keda pa cuatro siman ta haya caso di e clusternan cu bo tabata purba di controla.”
