Coronavirus… A bin pa keda…?

Loke pa basta tempo caba tabata nos temor, ta parce di bira realidad. Despues di e maneho bastante exitoso di e coronavirus den e promer lunanan, ta innegable cu nos ta den otro teritorio actualmente. Nos ta clausurando un luna di contagio di nivel halto cu nos no a conoce te awor, y ta dificil pa predeci final di e problema aki. Despues cu nos a mira un mehoracion leve den e cantidad di caso cu tabata registra tur dia, den e siman aki nos por ripara cu nos ta keda mantene un grupo grandi cu ta activamente contagia cu Covid-19.

E señal cu cos no ta andando bon ta cu a tuma medida pa combati e virus, introduciendo touqe de queda atrobe, ademas di instruccion pa evita aglomeracion di hende na pia di trabao y na otro lugar, tambe na cas. A pesar di e medidanan aki, ta keda e duda si esey lo ta e medida corecto y si esey ta suficiente. Cu mas di mil caso activo riba un teritorio chikito, por bisa cu e virus ta tur caminda caba. Den un caso asina, ta kico kier logra cu un toque de queda? Di mes mayoria di hende marduga no ta riba caya, pero si ta permiti tur hende ta na cualkier ora di dia riba caya, y no ta mantene nan mes na regla di distanciamento social y uso di tapaboca, laba man regularmente, y evita bay unda tin hopi hende, e toque de queda no lo tin efecto. Kico anto si ta loke mester considera? Por ehemplo, percura pa tin lo menos hende posible na pia di trabao. Laga tur empresa cu por manda mas tanto hende traha for di cas, haci esey. Percura pa tur tienda y negoshi limita atrobe e cantidad di hende cu ta na mes momento paden. Nos por a observa e fin di siman aki ainda cuanto hende ta aglomera den e supermercadonan, unda por mira tambe cu e reglanan cu a impone algun tempo pasa, ya no ta conta cu cumplimento estricto di e clientenan. Ta necesario pa nos cuminza limita atrobe nos movecion, pasobra ta nos mes ta carga e virus hib’e pa otro hende. Y ta den dia nos ta move rond, no marduga.

Tin mas aspecto preocupante den e asunto aki. Un di nan ta si na e momento aki e autoridadnan encarga cu e pandemia tin e aparato adecua y suficiente pa maneha e nivel unda e crisis a yega. Claro cu nan lo bisa cu nan por si nos puntra esey, pero nos duda ta keda. Ora nos ta papia di mil pa mil doscien caso activo, nos no mester ta genio pa sa cu ta imposible pa controla tanto hende. Y ora no tin control, ta imposible pa evita cu e contagio ta sigui su camida. No mester lubida cu mas cu mitar di e contagio ta tuma lugar den seno familiar. Tin hopi informacion caba di persona cu tabata contagia, cu a pasa nan tempo di contagio sin mayor problema, sin cu un dia nan tabatin contacto cu autoridadnan. Nan no ta haci esey pasobra nan ta mal hende ni pasobra nan ta floho, pero esaki ta e señalnan cu e aparato no ta apto pa maneha un crisis di e tamaño aki. E no mester a yega nunca na e nivel aki, pero ‘no use crying over spilt milk’. Sin embargo, si e conclusion ta cu nos no por maneha e crisis na e nivel aki, kico lo bay pasa den e proximo siman y lunanan?

Mester sigui opera manera ta haciendo awor aki? O mester cambia di strategia y stop di pretende cu por cubri tur base? Lo no ta mihor pa cuminza usa e recursonan cu tin pa garantisa proteccion optimal pa e gruponan mas vulnerable? Esey por implica por ehemplo cu ta cuminza duna prioridad na control estricto pa personal cu ta traha den casnan di anciano, pa percura pa nan no por trece contagio di pafor pa e institucionnan aki. Di mes tambe e ciudadano mester colabora den mantene contacto cu hende di edad den nan famia limita na lo minimo, pa no pone nan den riesgo. Tambe ta necesario cu tur hende cu ta vulnerable di un of otro forma, pa nan tuma medida pa no core riesgo. Aki nos ta referi na e cantidad grandi di hende cu enfermedad cronico, cu ta core riesgo grandi si nan haya Covid-19. Y esey no ta solamente hende di edad, pasobra nos tin un grupo creciente di hende mas hoben cu tin enfermedad cronico y cu tambe por termina den ICU.

Manera bisa caba, nos por constata cu e organisacion actual cu mester combati e virus, no ta apto pa carga e peso. Esey por mira tambe den fayo di e organisacion, cu ta resulta den dato confidencial riba caya y intercambio pa eror di prueba di virus, manera a sucede cu un di nos specialistanan den e dianan aki. Si di berdad no por carga e tarea aki, lo ta mihor pa admiti esey, pa por pensa riba otro strategia y no keda simplemente administra loke a pasa caba, sin cu ta yega na planifica di antemano unda kier bay. Esey ta e preocupacion mas grandi.