College Aruba Financieel Toezicht (CAFT) a mira cierto cambio positivo den e presupuesto 2016. Gobierno a simplifica e proyeccion pa termino largo (meerjarenraming) hunto cu un miho splicacion. Pero finalmente e cifranan no ta substancia esaki suficiente pues ainda CAFT tin duda cu lo realisa e metanan proponi.
Esaki por lesa den nan rapport riba e presupuesto 2016.
Puntonan critico principal:
-gobierno ta premira un crecemento economico mas positivo (3.8% mientras CAFT ta premira 3.5%). Pues gobierno ta spera di haya por ehemplo mas entrada a base di e cifra aki cu segun CAFT ta mucho positivo. En general gobierno ta proyecta cu su entradanan lo crece cu 6%, locual CAFT no ta considera realistico. Tampoco gobierno a substancia esaki debidamente pa asina CAFT por verifica e datonan.
-Gobierno no a corta suficiente den gasto personal. Nan a presupuesta 6 miyon menos compara cu aña pasa pero e suma aki ainda ta keda hopi menos cu gobierno prome a proyecta di 90 miyon florin.
-CAFT ta conseha pa introduci e Algemene Bestedings Belasting (ABB) mas pronto posibel, prome parlamento lo aproba e presupuesto 2016. Pasobra den e presupuesto ya ta tene cuenta cu e extra 50 miyon cu e impuesto aki mester genera na entrada pa gobierno.
-E organo di consulta ta conseha pa gobierno lo presupuesta un suma extra (13 miyon) pa asina tin placa pa gastonan inspera. Aworaki no tin niun placa reserva como cu na final di 2014 nos pais ta 2.4 biyon den cora (eigen vermogen).
