Negociacionnan cu Hulanda pa e leynan di Reino riba supervision financiero y e Organo di Reforma y Recuperacion (Orgaan voor Hervorming en Herstel), OHH, ta continuando e siman aki. E tempo sinembargo ta preta. Asina mes, Prome Minister Evelyn Wever Croes ta sigui trankilisa comunidad cu Gobierno lo no laga e pais cay, ni riba tereno financiero ni riba e tereno economico.

Te awor, e rosea financiero ta yega te medio September, prome Minister a bisa. E ayudo di FASE, subsidio di salario y otro ta cubri luna di Augustus. Pero tempo ta preta.

Y proposicion di Hulanda no ta facil. Mr. Carlos Guiamo di Direccion Legislativo y Huridico, DWJZ a ilustra cu e proposicionnan di Hulanda ta mina autonomia di Aruba y tambe e posicion di igualdad di ciudadanonan Arubiano den Reino, pa no papia di e posicion democratico unda ya e Arubiano no tin influencia riba e proceso di decision.

 

Guiamo a ilustra cu e meta di e proposicion di Hulanda ta pa logra un finanzas publico sostenibel y duradero y un economia mas resistente na shock externo. E forma con Hulanda kier logra esaki ta cu e OHH.

Problema ta cu e OHH ta situa na Den Haag, y ta cay bou leynan Hulandes. E ta un organo independiente di Hulanda, y ta e Minister di Asuntonan Interior y di Reino di Hulanda ta apunta e miembronan. E tareanan di e OHH ta amplio, entre otro asisti y supervisa desaroyo y ehecucion di proyectonan y medidanan; por ehecuta proyectonan y duna subsidio na individuo y compania. Y si ta di opinion cu mester, conseha pa Aruba cay bou supervision financiero estricto unda te hasta por exigi pa Comision di Supervision Financiero di Aruba aproba e gastonan di Gobierno prome cu por ehecuta nan. E tarea di OHH ta amplio y ta cubri Gobierno, finanzas, reforma economico, cuido, enseñansa, estado di derecho (husticia) y hasta infrastructura.

Pero no a logra un acuerdo cu Hulanda ainda pasobra e proposicion ta bay contra tur principio democratico y di bon gobernacion, segun mr. Guiamo. Ta e pueblo Hulandes lo tin mas di bisa, ya cu ta Gobierno Hulandes, nombra pa Parlamento Hulandes lo nombra e organo. E pregunta di Aruba ta ken lo tin e responsabilidad politico. Parlamento lo no por yama un Minister pa hustifica decisionnan.

Negociacion

Mientrastanto a trece algun cambio chikito den e proposicion di Hulanda. Esakinan, sin kita di e meta di finanzas publico sostenibel y reforma economico. E negociacionnan a produci cu Hulanda a bay de acuerdo pa Aruba haya mas derecho di consulta. No a acepta e condicion di cooperacion basa riba Statuut.

Por ehempel Aruba awor tin oportunidad pa duna opinion riba e perfil di e personanan cu ta bay maneha e organo y cu ningun miembro di CAFT ta bira miembro di e OHH. Aruba tambe por duna su punto di bista prome cu OHH saca su cuenta anual of reportahe di cada 6 luna. Esaki lo a sosode sin participacion di Aruba, na prome instancia. Aruba tambe lo por duna su opinion na momento cu Hulanda dicidi pa stop di financia un proyecto. Y unda ta posibel, OHH lo consulta cu Gobierno di Aruba prome cu desaroya y ehecuta un proyecto. Pa loke ta a regimen di aprobacion, atrobe, Aruba lo por duna su punto di bista.

Memorie van Toelichting

E problema di tur esaki ta cu Hulanda no ta acepta cu e acuerdonan aki ta bay den e ley, sino den e Memorie van Toelichting. Aruba ta di opinion cu si nan ta den ley, nan tin mas balor. Pero en todo caso, e Memorie van Toelichting di e ley lo bisa cu OHH ta respeta e posicion constitucional di Aruba y su institutonan. OHH lo no actua riba areanan autonomo tanten cu no duna e sancionamento democratico y lo entama reforma, proyectonan y medidanan cu Aruba a bay de acuerdo cune riba liñanan grandi. E supervision financiero y derecho di aprobacion lo ta basa riba proporcionalidad.

Gobierno di Hulanda no a bay de acuerdo pa laga Raad van State duna un bista preliminar, pero unabes cu Aruba bay de acuerdo, lo laga e instancia di conseho mas importante di Reino duna su punto di bista.

Tempo

Ainda Gobierno ta sigui negocia cu Hulanda pa purba cu ta mishi lo menos posibel cu autonomia di Aruba. “Nos ta negociando for di 10 di Juli y lo sigui te unda cu por.” Segun Prome Minister Evelyn Wever Croes na Bon Dia Aruba, Parlamento tin un papel pa hunga na final di e trayectorio di negociacion, pasobra na final, nan lo mester trata e ley. E ta consciente cu su fraccion, entre otro, y sigur baluartenan di su partido, ta luchando duro pa no acepta e condicionnan pisa di Hulanda, ya cu ta considera cu esaki ta mina autonomia di Aruba. “E ta un dilema cu como gobernante semper bo tin. Bo ta scucha bo pueblo y bo mester tuma decisionnan cu ta na bienestar di tur.”

Balans

Prome Minister tin comprension pa e actitud di Hulanda y ta kere cu ta hibando un negociacion den buena fe, a pesar cu e exigencianan ta pisa. Ta su tarea sinembargo pa Aruba sali afo cu mas cu locual tabatin den e proposicion. Riba e pregunta cua ta e balans, su contesta tabata: “Na mi parecer mester haya e balans na mesa di negociacion. Hustamente esey mi ta haciendo. Y tin tempo. Na mesa di negociacion mita spera di convence Hulanda pa hala un poco atras den e autoridad cu e entidad ta bay haya pa asina ta bon hancra cu e entidad no ta bay dicidi pa Gobierno y sigur no pa parlamento. Cu tur cos mester bay den consulta adelanta y respetando e autoridad di Gobierno y Parlamento legitimamente eligi door di pueblo. Cu un balans asina no tin (mas) entrega di autonomia.” Prome Minister a agrega cu pa loke ta autonomia, de facto ya a entrega gran parti di esaki cu e LAFT na 2014. “Loke mi ta purbando ta pa nos no perde mas autonomia y permiti e structura aki traha pa un periodo transitorio, temporal pa yuda nos sali di e problema serio cu Covid a hinca nos aden, pa nos sali afo mas fuerte. Cu un economia mas fuerte nos por tin un autonomia mas fuerte y asina un Aruba mas fuerte.”

Fraccion di MEP

Lider di fraccion Rocco Tjon di su banda a bisa cu ta urgi pa Gobierno sigui negocia de acuerdo e mocion, pa no acepta e rijkswetten. “Nos a splica cua ta e punto di e rijkswet cu nos tin problema cune. Nos a busca conseho huridico di profesor mr. Hoogers di Rijks Universiteit Groningen cu ta concorda cu no por papia di consenso, mirando e contexto y situacion di pandemia. E ley manera cu ta riba mes ta anti-constitucional pasobra e ta kita autoridad fundamental di Parlamento y Algemene Rekenkamer. E alternativanan cu nos a presenta ta dos landsverordening cu ta mara na dos protocol. Nan mester acapara e situacion nobo. Raad van Advies tambe ta menciona cu den pasado a uza protocol y otro articulo di Statuut cu ta yuda haci economia di mas resiliente. Pues Prof Hoogers ta bisa cu por logra esey.”

E alternativanan aki lo yuda cu Hulanda y Aruba logra e meta di un finanzas publico sostenibel y duradero y tambe un economia resiliente, cu un supervision di Hulanda. Pero tur sin mina autonomia.

Pero, manera Prome Minister Evelyn Wever Croes a indica, pa aki dos siman, no tin mas placa y e posicion di negociacion ta bira menos fuerte. E lider di fraccion di MEP, Rocco Tjon no kier a bisa kico ta e opcion di Aruba si Hulanda bisa no, pasobra esey no ta al caso na e momento aki. “Nan ta na mesa ainda y esey ta importante.”