Clientenan di Elmar y WEB a haya nan mes cu un situacion fastioso, cu a kita nan meter.
Segun vocero di WEB, Asja Dongen, e motibo ta cu no a yega na un areglo cu WEB pa cuentanan atrasa.
Bon Dia Aruba a ricibi diferente keho di ciudadanonan cu a haya nan mes sin awa. Den combersacion cu Dongen, el a bisa cu berdad ta cu na maart, tur hende a haya dos cobranza pa motibo di e sistema nobo, pero hunto cu esey a bin e crisis di Covid. Y e tempo ey, WEB a pidi esnan cu por, pa sigui cumpli cu nan pagonan, pero cu WEB mes lo no cera ningun meter.
Y esey tabata e caso tambe.
Na juni sinembargo a avisa comunidad na varios ocasion cu ta bay cuminza cobra e sumanan atrasa. Esnan cu tin cuenta atrasa, por a yega na un areglo di pago cu WEB. Si no yega na areglo of no paga, lo a cuminza corta meter na juli. Y esey a sucede tambe.
Segun Asja Dongen, WEB a pone un formulario digital riba su website pa yuda esnan cu a cay atras den pago pa yega na areglo. Nan lo mester a describi nan situacion individual, pa di forma cu por diseña e areglo di pago segun e condicionnan individual tambe. “WEB ta determina e ora si ta duna tres of te hasta seis luna pa por haci e pagonan.”
Asja Dongen a bisa cu a ripara cu hasta personanan cu a haci areglo, no a cumpli cu e pagonan y consequentemente a cera nan meter di awa. Pero tambe tabatin hopi hende cu desde e anuncio na maart, mesora a stop di paga pero na juli a bin paga tur nan cuentanan den un solo tiro.
Pa loke ta e meternan cu a corta, lo bolbe pone esakinan unabez cu cuminza pago y hasta haci un areglo. Te cu awor sinembargo, mester acudi personalmente na WEB pa paga e 50 florin pa re-instala e meter. Den futuro cercano lo permiti personanan manda un potret di nan pago di nan cuenta habri, WEB lo pone e cobranza di e 50 florin riba e siguiente cuenta. Pues esey lo evita cu mester bay personalmente na oficinanan di WEB pa paga. “E cliente lo por haci su pago via Elmar, banco, MFA y otro,” Dongen a bisa.
Bon Dia Aruba no a logra drenta den contacto cu vocero di Elmar pa mira con e compania lo maneha e pagonan atrasa y bou cua condicion lo reconecta coriente di ciudadanonan.
