Ayera durante conferencia di prensa di gobierno, prome minister a duna e cifranan mas recien di infeccion di Covid-19 na Aruba. Maske e cantidad di caso ta sigui aumenta, Wever-Croes a sigura cu e situacion ta bao control.

Minister presidente a anuncia cu ayera tabatin 73 caso nobo di Covid-19, 61 persona cu a recupera, pa un total di 1043 caso activo. Di esaki, 27 ta den hospital y 4 den ICU.

Wever-Croes a subraya cu e situacion ta serio y mester di atencion. E cantidad di caso ta haci cu ‘e contestanan cu tin cu duna ta tarda un tiki mas. Por ta cu bo ta yama y no ta haya contesta di biaha’, el a bisa. Sinembargo, hospital a designa piso 3 pa Covid, y maske tin hopi pashent den hospital, e cantidad ‘ta manehabel’. El a enfatisa cu hospital ta hopi cauteloso cu e cuido riba e piso en cuestion, y cu no ta asina cu e infeccion ta plamando den hospital.

Mirando cu e cantidad di caso a aumenta asina hopi, mester adapta e maneho di Crisis Team, y tur informacion lo ta disponibel riba website arubacovid19.org, unda por haya tur protocol pa tuma nota.

Ademas tabatin varios cambio, entre otro, a pospone apertura di scol. “Esaki eigenlijk pa preveni cu mas hende ta riba caya. Nos no a cera scol pa motibo di alumno, of Setar. Nos a dicidi cu nos lo tene muchanan na cas dos siman mas pa preveni cu tin mas hende riba caya”, cual lo aumenta riesgo di transmision di Covid-19. Wever-Croes a bisa cu den proximo simannan lo sigui evalua y mira con lo haci pa dia 3 di september. Mientras tanto lo prepara un forma pa muchanan por haya algun les online mientras ta yega na apertura di scol.

Alabes, Wever-Croes a desmenti cu lo tin medida manera ‘ley seco’. Di esaki, el a bisa ‘ainda no’. Dependiendo di evolucion di e pandemia lo evalua si mester tuma mas medida, pero actualmente no tin medida nobo cu lo bin na vigor. El a curasha pueblo pa confirma cualkier rumor door di bishita e website arubacovid19.org.

“Dos siman pasa nos a mira un aumento drastico den cantidad di caso den cluster di clubnan nocturno. E siman aki nos mester cuminsa mira e efecto di e medidanan cu nos a cuminsa tuma. Nos a ripara cu dos siman pasa e cifranan a cuminsa aumenta drasticamente, cada dia exponencialmente. Aworaki danki Dios e no ta aumentando exponencialmente.” E averahe ta entre 70 cu 80 caso pa dia, cual ta menos cu e 133 cu a yega dos siman pasa. Segun Wever-Croes, esaki ta un indicacion cu e medidanan ta funcionando. E no ta descarta cu e aumento ta halto, sinembargo.

El a comenta cu e siman aki, e virus a wordo transmiti den famia, concluyendo cu por ta e caso cu e hendenan cu a contagia na clubnan nocturno a bay cas y pega nan famia. Te cu ayera tardi, tabatin alrededor 150 cas na Aruba cu ta considera un cluster den cas, di entre dos cu ocho hende. “Un hende a wordo infecta prome, el a bin cas y pega un mas, of dos mas, tres, cuatro cinco y hasta shete mas.” El a curasha pa keda alerta si tin un hende positivo den cas, pa sa y ta prepara pa atende cune.

Finalmente, el a curasha tur hende pa sigui cumpli cu reglanan di higiena, tapaboca, distancia, laba man, y hand sanitizer.