Definitivamente e ferry di e compania Naviera- Paraguana di Venezuela ni cualkier otro ferry, no lo opera inmediatamente pa Aruba.
Ainda mester bin cu algun preparacion entre otro logistica cu lo por tarda mas cu un aña, den caso cu un compania di ferry lo haya permiso for di gobierno pa cuminsa opera pa nos isla.
Director Financiero di Aruba Port Authority (APA) Humffrey Tromp a bisa cu a APA a wordo acerca pa atende e asunto aki. Den combersacion cu APA a sostene cu diferente departamento clave pa e tipo di operacion aki, a wordo informa na gobierno “cu nos no ta cla pa ricibi e ferry”. E ta agrega cu aworaki e ferry no por bin ni prome cu fin di aña, ni pa otro aña tampoco. Ya cu nan mester haci un trabou grandi prome na operacion di cualkier ferry.
Falta personal
Sr. Tromp a declara na Bon Dia Aruba cu den e 11 añanan cu e tin trahando den e departamento aki, el a yega di sinta cu diferente grupo cu tabatin interes pa bin cu ferry. Sin embargo a base di e ultimo combersacion cu nan como APA tabatin cu e departamentonan di Duana, Inmigracion pa wak si nan por ricibi e ferry di e compania menciona, e hefenan di e departamentonan aki a bisa APA bon cla cu nan no tin e personal. Tampoco nan no tin e ekiponan cu ta demanda un operacion di ferry di e caliber aki.
E ta bisa cu APA di su banda por haci algun adaptacion na e infrastructura, pero mester tene cuenta cu nan ta dependiente tambe di Duana y Inmigracion. APA a informa gobierno cu si tin un decision di parti di gobierno mes pa sostene e idea pa bin cu e ferry, pa nan informa APA debidamente y tambe e departamento di Duana y Inmigracion. Si ta asina nan lo por sinta y traha riba un plan, segun sr. Tromp
Na e inauguracion di Citgo e director di Citgo y tambe e vice –presidente di PDVSA a menciona den nan discursonan cu ‘aki pronto lo bin un ferry’ cu tambe lo yuda den e plan pa amplia e relacion comercial y social entre Venezuela y Aruba.
Esaki tabata un sorpresa pasobra un poco prome gobierno a indica cu nan lo no duna permiso na e compania pa bin cu e ferry.
Compania di ferry
Pues esey ta e decision cu e ferry no por bin aworaki, y e decision aki a wordo informa na e agencia di e ferry di Venezuela tambe.
“Pa aworaki nan e ferry no por bin. Definitivamente cu no.” Encuanto si ta existi un solicitud formal di parti di e directiva di e ferry Naviera Paraguana pa bin Aruba y ofrece nan servicio, basicamente tur cos tabata na palabra.
Sr. Tromp a declara cu e doñonan di e ferry a bin y nan a acerca un agencia y nan a reuni cu APA, caminda nan a bisa cu kier cuminsa bin Aruba. “Pero nos a bisa nan cu nos no por yuda nan.”
