Na su yegada for di Hulanda, minister Marisol Lopez-Tromp a referi cu e segunda tanda di e reunion cu a keda suspendi di dia 31 di juli ultimo den Parlamento, caminda fraccion POR tabatin intencion pa entrega un mocion di censura contra dje.

E mandatario a laga sa cu ta presidente di Parlamento, Juan Thijsen, esun cu mester yama e reunion aki. El a bisa cu ‘ami tabata cla pe na cualkier momento.’ Ya cu el a bin Aruba specialmente pa atende e reunion aki maratonicamente, mientras cu e tabata den un biahe priva pa cu su yiu cu a bay studia den exterior.

Te ainda Parlamento su presidente no a duna di conoce un fecha pa continua cu e reunion aki cu a bira uno turbulento, mirando diferente caso di supuesto corupcion cu e mandatario a trece dilanti. Di su banda parlamentario Endy Croes (MEP) a declara na Bon Dia Aruba cu nan ta pro investigacion y nan ta contra corupcion. Encuanto e di dos buelta, el a laga sa cu nan ta contento cu si Marisol ta hayando algo pa e entrega keho. Tambe el a laga sa cu “nos ta pura pa e reunion aki bin pasobra nos kier mira documento.”

Parlamentario Croes a bisa cu e mandatario no a laga niun documento atras. E documento cu el a bin cune durante e reunion tabata poni ‘ter inzage.’ Mientras cu den un reunion di e caliber aki, unda nan mester scucha y debati, si nan ta pone documentonan ‘ter inzage’ nan tin chens di wak nan un rato, pero di un manera no apropia. E biaha pasa locual cu e por a mira entre otro tabata un contract di minister Bikker y cuater suspension di empleado publico cu el a manda cas cu pago. E ta un procedura cu ta tuma luga durante un investigacion.

Tambe nan kier mira e biaha aki tur documento hopi mas tempran pa nan por studia tur iregularidad cu e mandatario por a constata. P’esey nan ta di opinion cu prome cu di dos ronda di e reunion aki pendiente cu minister Lopez-Tromp tuma luga, nan kier wak prome tur locual e kier trece dilanti. “Nos kier nan ya caba riba mesa,” el a bisa.

El a menciona cu fraccion POR mes a pidi pa suspende e reunion aki, ya cu nan kier sinta bek cu prome minister pa realisa un trabao di mediacion. Parlamentario Endy Croes ta kere cu unabes cu e proceso aki ta asina leu, seguramente presidente di parlamento lo yama e reunion.

Tambe nan kier puntr’e si minister Lopez-Tromp a entrega keho caba y cuanto keho el a yega di entrega caba. E ta kere cu ta un deber di cada minister di e gobierno aki ya cu den nan acuerdo di gobernacion ta para e parti di integridad.