Ayera tardi, abogado David Kock hunto cu Guillermo Raymond, director di Post Aruba N.V a ofrece un conferencia di prensa pa trece dilanti informacion pa comunidad pa loke ta trata e ultimo desaroyo na Post Aruba N.V y su servicioe-Post.
Di esaki, Kock a señala cu manera a keda conoci, comercio via internet ta algo cu ta creciendo desde algun tempo caba, y e-Post tin basta tempo enfocando riba e tereno aki, brindando e servicio y posibilidad pa e comunidad por haci compra via internet y pa nan por dispone di e articulonan cu nan a cumpra na Aruba mes via post kantoor Aruba.
El a informa cu nan tabata haci esaki prome cu otro compania. Pa via di mehora e servicio e-Post a cuminsa traha cu e compania comercialmente conoci como Punto Mio, pa locual el a expresa cu e asociacion aki a dura basta aña. Pero cu nan a sinti e necesidad di cambia e proveedor di servicio aki na Merca, esaki ta encera e servicio cu e cliente di e-Post Aruba ta haya un number di registracion y e por dispone di un adres na Merca.
Ora cu e-Post a dicidi na cuminsamento di aña aki pa cambia di proveedor di servicio cu tabata Punto Mio, Kock a indica cu e reaccion di e compania aki tabata hopi negativo. Tabatin indicacion “di kier purba caba cu Post Aruba, pasobra e por bay brinda e servicio aki pa e clientenan di Aruba”.
Pa cuminsa cu esaki, Kock a comenta cu e compania aki a manda un e-mail na tur e cliente di Aruba na unda nan tabata informa cu nan a termina e contract cu e-Post Aruba. Asina mes cu e-Post Aruba no por duna e nivel pa ofrece servicio necesario y cu nan so si por sigui zorg pa duna e servicio cu tax free na Merca.
Kock a manifesta cu nan a manda esaki pa motibo cu na momento cu e-Post Aruba nan tabatin tur e-mail di tur e cliente na Aruba, algo cu el a declara cu e empresa a mal usa esey y cu no tabata cuadra cu e realidad. “Esaki ta algo sumamente condenabel”, Kock a sigura.
Di mesun manera, el a splica cu e compania a cambia di e-mail adres y nan a sigui usa e logo de e-Post loke a causa confusion pa henter comunidad na Aruba.
For di e momento aki Kock a bisa cu nan a cuminsa un caso contra e compania Punto Mio na Merca, cu ta permiti pa via di e clausula di e contract na e pais ey. Y prome cu e caso a tuma luga diamars ultimo, e compania a bay di acuerdo pa rectifica e mensahenan cu nan a manda pa tur e cliente di e-Post.
Di esaki, el a menciona cu “e compania a reconoce cu el a gaña tocante con e cos a bay y cu tampoco tabata berdad cu tabatin keho di e servicio cu e-Post ta ofrece”.
Kock a bisa cu nan a haci e rectificacion aki pa e caso no bay mas leu, pero e caso lo sigui pa algo extra. Nan kier prohibicion pa nan bay haci negoshi cu e clientenan di e-Post pasobra nan ta bay acerca nan directamente usando informacion cu nan tabatin prome di e-Post.
Un hues lo dicidi esey dia 9 di september, manera Kock a declara. Pero tambe ta importante pa trece dilanti e retraccion cu e compania Mericano aki a haci, cu ta reconoce cu nan a haci fout contra di e-Post, pero tambe cu algun persona tin algun kehonan inhusto contra e-Post pa loke ta trata e maneho di paketenan.
Di su parti, Guillermo Raymond, director di e-Post Aruba N.V a expresa cu tocante e kehonan cu nan a ricibi, nan a haya conoci cu otro e-mail a cuminsa sali for di compania Punto mio na Miami usando e logo di e-Post Aruba, manera a menciona caba.
E clientenan cu a bestel nan comprasnan cu e-Post Aruba a wordo manda na otro compania y te ainda nan no a ricibi nan, loke nan kier segun Raymond a afirma ta den comprendemento den e situacion aki pa evita cu e clientenan lo wordo perhudica pa via di e problema entre e-Post Aruba y Punto Mio.
Na e momentonan aki nan ta bezig pa sinta cu nan abogado y cu e compania tin un plan cu nan ta espera pa sigui cu e servicio pa e clientenan.
