Aworaki tin contradiccion riba maneho di enseñansa, meymey di e pandemia di Covid-19, caminda e cantidad di caso positivo a keda subi keto bay.
Dialuna anochi a keda evidencia cu minister di Enseñansa, Ciencia y Desaroyo Sostenibel, Rudy Lampe tin un posicion totalmente otro, compara cu esun di e crisis team tocante enseñansa online.
Mientras cu e mandatario ta promove enseñansa digital como un alternativa den e asina yama e ‘normal nobo’ pa e muchanan di scol no keda atras den nan enseñansa y cumpliendo cu ley di enseñansa obligatorio. Pero di otro banda crisis team –nan tin total autoridad den tempo di calamidad y crisis– a dicidi pospone apertura di scol. Esaki a pesar cu tin un minister responsabel riba maneho di enseñansa. Pero den e situacion di emergencia cu pais Aruba ta pasando aden, desde cu Covid a bati nos porta, ta crisis team bao guia di minister presidente, ta tuma e tipo di decision aki.
Pero e pensamento entre minister Lampe y crisis team ta totalmente otro pa bin cu enseñansa a distancia aworaki. Sra. Glenda Hernandez, kende ta representa cluster 4 di crisis team a bisa cu e hecho cu den actual situacion nan mester informa cu scol mester cera pa dos siman mas, no kiermen cu “bo ta bay haci enseñansa digital.” El a argumenta cu nos infrastructura no ta prepara ainda pa bin cu un tipo di enseñansa online.
Sinembargo esaki no ta kita cu si tin algun scol cu a cuminsa cu e iniciativa aki, nan ta encurasha nan pa sigui cune. “Ya cu e ta algo cu bo a cuminsa caba,” el a bisa. Pero si tin scol cu no a cuminsa ainda, y tampoco ta intencion pa tur scol bay digital, ya cu e ta bay tranca infrastructura digital por completo, el a declara.
“Esaki ta djis un mensahe cu mi a tende,” el a bisa. Hernandez a conclui cu actualmente Aruba su infrastructura digital no ta prepara pa enseñansa online.
Sra. Hernandez a declara cu un punto cu a wordo trece dilanti durante e deliberacion pa cambia e fecha di apertura di scol y cer’e pa dos siman, tin di haci cu examen cu ta bin den luna di october. Hernandez a bisa cu esaki lo haya su debido atencion hunto cu SEPPA, SIMAR, gremio di scol y organisacion di mayor, pa trata entre nan e situacion di examen escolar.
Mientras cu un siman pasa, minister Lampe a bisa cu departamento di Enseñansa ta ofrece diferente posibilidad of opcion digital, entre nan landsexamen, completamente online cu guia. Nan ta bay introduci aworaki esaki cu tur esnan cu kier hala nan MAVO, HAVO of WVO diploma, pa asina nan ta habri e posibilidad aki full online, asina el a yega di bisa.
