Haiti y Aruba ta busca fortalece nan relacion comercial

Consul di Haiti na Aruba Herve Saint Louis  ta mira hopi perspectiva pa un relacion comercial mas estrecho entre Haiti y Aruba. Siguramente riba tereno agricultura pero tambe productonan manera cerbes. Tambe e ta expresa su gratitud pa e ayudo despues e horcan Matthew.

Di un banda e diplomatico y hefe di Consulado di Haiti na Aruba a expresa su satisfaccion como diplomatico di su pais, pasobra e ta kere cu esaki ta e prome biaha cu e dos Camara di Comercio  tanto di Haiti como di Aruba, ta organisando un actividad comercial bilateral for di 15 pa 18 di november awor na Divi hotel.

Ya caba e presidentenan di ambos camara ta bin papiando pa evalua e forma con nan lo por bin cu un bon cooperacion y relacion mas estrecho riba tereno di comercio entre ambos pais. Consul di Haiti ta haya cu esaki ta un oportunidad unico cu nan no mester perde, ya cu Haiti tin productonan pa ofrece specialmente un cerbes prestigioso bon conoci den  henter mundo como Prestige, tambe juice  y  productonan agricola, etc.. E ta haya cu e relacion aki entre e dos Camara di Comercio lo habri oportunidad economico y di trabou pa ambos paisnan.

Horcan Matthew y Haiti

Sr. Herve Saint Louis  a bisa cu su gobierno y  nan debutantenan  ta haciendo su best pa yuda e hendenan damnifica cu a sufri e  consecuencianan di e horcan Matthew.  Tanto nan Presidente  Jocelerme Privert como Prome Minister Enex Jean-Charles  como nan Minister di Relacion Exterior y demas miembro di e gabinete di Haiti, ta trahando sin sosega pa asina atende y satisface e necesidadnan di e habitantenan di e regionnan cu tin mas problema, segun e consul Sr. Saint Louis.   

Despues di e temblor di 2010 y awor e efectonan debastador di e horca Matthew a crea un situacion mas dificil pa e pueblo di Haiti. E region mas afecta ta esun cerca di e costanan  unda cantidad di Haitianonan a keda sin cas. Pero tambe e muchanan a keda afecta, ya sea cu nan a perde nan mayor of nan no por bay scol pasobra no tin scol mes, pasobra nan  a keda destrui.

Ayudo

E ta reconoce e labor cu hopi organisacion manera Cruz Cora ta bin realisando pa yuda Haiti y  pa canalisa tur sorto di ayudo manera paña, sapato, cuminda, awa, remedinan,  etc.. E gobierno di Haiti tanto su presidente como su prome minister ta traha hunto cu tur organisacion internacional y  amigonan di Haiti cu ta bin ofrece nan ayudo na e pueblonan cu tin hopi problema den e regionnan  di Les Cayes, Dame Marie y Jeremie.  E hendenan di e regionnan aki a perde tur cos, nan cas, propiedadnan y documentonan.

“Mi ta akinan pa ricibi tur hende y tambe pa e Haitianonan cu tin problema tambe  pa yuda nan”, e ta bisa.

Su gobierno a nombra su persona como diplomatico pa bin traha cu satisfaccion  positivo cu e comunidad di Haiti na Aruba Tambe pa nan traha hunto cu nan y tambe pa estrecha e lasonan entre Haiti y Aruba.  E diplomatico a bisa cu e ta realisa su trabou cu hopi amor pa su comunidad estableci na Aruba.  “Mi kier gradici e gobierno di Hulanda y Aruba cu a traha hunto cu e Cruz Cora pa yuda Haiti actualmente cu tin problema.”

Evaluacion cu militar y  Cruz Cora

Segun informacion divulga pa medio local, militarnan Hulandes y boluntarionan di Cruz Cora Aruba a bay den area zuid di Haiti. Nan a bay e Hospital Immaculee Conception na  Les Cayes pa asina haci un evaluacion di e dañonan haci door di horcan Matthew.  Tambe combersacionnan a tuma luga cu e director di Hospital, representante di WHO y tambe un miembro di Hospital Medical Team na unda despues tur hende a haya un recorido di e facilidadnan. A tuma nota di e situacion y nota diferente punto nan importante. Cruz Cora di Aruba cu militarnan Hulandes lo bay sinta bek na mesa pa evalua e ayudo cu nan mester y kico por haci pa por pone un sector di e Hospital bek operacional.

E consul ta gradici  tanto e gobierno di Aruba y Cruz  Cora Internacional na Aruba y tambe na gobierno di Hulanda pa  medio di nan militarnan cu a manda un grupo di nan pa brinda ayudo na Haiti cu un variedad di articulonan.

E diplomatico  a bishita e  director di Cruz Cora na Aruba,  Michael la Haye pa coordina miho cualkier tipo di ayudo cu e comunidad di Haiti na Aruba lo desea di manda pa su paisanonan den nan pais.  Ya cu e intencion di e comunidad di Haiti riba nos isla ta esun di lanta un asociacion so –ya cu actualmente tin varios organisacion-  cu lo ta  encarga pa bin cu un actividad pa colecta  tur sorto di ayudo pa manda pa Haiti cu mester di  nan prioridad.

Consul Saint Louis ta bisa cu su comunidad ta uno di bon curason na Aruba cu semper ta dispuesto pa yuda  tur hende. Ademas pa mustra nan solidaridad cu nan hendenan den momento di necesidad manera esunnan cu nan ta pasando aden actualmente.

Den e reunion aki nan a papia pa coordina e mandamento di e ayudonan aki. Ya cu ora un organisacion internacional ta transporta ayudo, Ministerio di Interior di Haiti mester brinda nan siguridad y proteccion pa distribui e ayudo aki; y pa nan sa cual instancia  ta ricibi e ayudonan. Consulado di Haiti na Aruba ta e canal oficial localmente pa tuma contacto cu e Ministerio di Relacion Exterior di su pais pa realisa tur e tramitenan necesario pa brinda e siguridad  y proteccion necesario na e mision di ayudo humanitario cu ta bay Haiti.