Facebook, Instagram ta prohibi potret di Zwarte Piet cu cara preto

Gigante di rednan social, Facebook a anuncia siman pasa cu lo elimina tur video, potret y imagen cu ta mustra personahe di fiesta di fin di aña Zwarte Piet cu su cara pinta na preto ‘blackface’, of di otro manera mustrando un stereotipo insultando hende color scur. E prohibicion lo ta na vigor tanto riba Facebook como Instagram, y lo inclui un fin na stereotiponan negativo di hende Hudiu.

E uso di ‘blackface’ ta representa un ‘historia continuo di deshumanisacion y rechaso di derechonan civil’, Facebook a bisa NOS. “Ademas, Facebook no ta acepta cu ta discrimina usuarionan a base di, entre otro, rasa, sexo, religion, etnicidad, genero of malesa. Como resultado, gruponan vulnerabel por perde nan voz.”

“Cu ‘blackface’ nos kiermen cu un persona tin un pintura riba cara cu ta distintivamente preto of scur, combina cu elementonan stereotipando, manera renchi horea grandi, un peluca di afro, of lipnan grandi”, un vocero di Facebook a bisa Nu.nl. Mas caracteristicanan identificante a ser determina internamente, pero no a revela esakinan pa preveni cu hende lo purba pusha e limitenan di e politica. Un personahe di Zwarte Piet usando shinishi (‘soot’) lo ser permiti, NOS a bisa.

Lo elimina e imagennan ofensivo cu a post prome cu anuncio, e compania a bisa, ya cu e politica ta retroactivo. E imagennan cu lo elimina ta inclui esunnan den cual un persona ta haci su cuero mas scur usando makiyahe of shoe polish, un potret di famia unda un mucha ta banda di un persona cu blackface, un mensahe bisando cu Zwarte Piet no ta racista, pero cu ta usa e caricatura racista. Algun excepcion na e politica ta inclui mensahenan di defensornan contra e uso di blackface y reportenan di noticia cu ta contene imagen di un personahe den blackface.

“Expertonan ta bisa cu blackface ta racista. Asina ta con a yega na e politica. Como resultado, Zwarte Piet tambe ta prohibi”, e vocero a bisa Nu.nl.

Stereotiponan mustrando ‘acusacionnan cu Hudiunan ta doño di mundo’ of cu nan ta den top y ta controla e institucionnan mas importante di mundo ta entre esunnan cu e compania tambe ta combatiendo. E compania a bisa cu e mitonan en cuestion ta sirbi pa duna impulso na aumento den anti-Semitismo.

Facebook a bisa cu no tabata preocupa tocante perde un porcion di su base di usuario Hulandes. “Esaki por ta un golpi, pero ta e escogencia corecto pa nos”, un vocero lo a bisa. E compania a bisa cu ta trahando riba e politica nobo pa nuebe luna, y cu e movemento Black Lives Matter y e boycott di aviso cu a sigui no tabatin un rol den e decision.

E politica lo tin impacto riba tur potret y video usa den post, imagen di perfil, imagen di background, Facebook Stories of Instagram Stories.