Marge Simpson tin conseho pa un abogado den campaña Trump: No bisa mi nomber. Den un clip diabierna den e serie anima Fox, ‘The Simpsons’, matriarca Marge a critica e abogado tocante un tweet comparando su stem na un di e candidato vice-presidencial Democrata, Sen. Kamala Harris.
“Usualmente mi no ta bay den politica, pero consehero senior di e presidente, Jenna Ellis, a bisa cu Kamala Harris ta zona manera ami”, Marge ta bisa den e clip, agregando cu su yiu Lisa Simpson a bisa ‘e no kiermen esey como un cumplido’. “Si esey ta asina, como un esposa suburbano ordinario, mi ta cuminsa sinti un tiki falta di respet”, Marge a bisa. “Mi ta siña mi yiunan pa no bisa otronan nomber, Jenna.”
Anteriormente e siman aki, presidente Donald Trump a tweet cu e ‘esposa suburbano lo ta votando pa mi’ pasobra el a ‘termina e programa largo unda cas di baho recurso lo invadi nan bario’.
Mientras e clip di mey minuut ta termina, por scucha Marge fuera di camara bisando: “Mi tabata bay bisa cu mi ta rabia, pero mi tin miedo nan lo censura esey.”
Harris di California a keda anuncia e siman aki como escogencia di nominado presidencial democrata, Joe Biden, como su candidato vice-presidencial. E convencion di e partido lo tuma luga proximo siman, probablemente virtualmente pa motibo di pandemia di coronavirus.
Ellis, abogado senior pa campaña di reeleccion di presidente Donald Trump, no a responde inmediatamente na un peticion pa comentario. E campaña tampoco a responde inmediatamente na un peticion pa comentario.
Diamars, Ellis a post riba Twitter cu ‘Kamala ta zona como Marge Simpson’.
‘The Simpsons’, un show transmitiendo pa basta largo, ta conoci pa burla di figuranan publico y celebridadnan, entre nan, Trump. Actor Julie Kavner ta e voz tras di Marge Simpson.
