Hulanda mester pidi conseho di Raad van State pa su proposicionnan impactante pa sigui duna Corsou, St. Maarten y Aruba sosten di liquidez. Y mientras cu ta warda e conseho, mester sigui yuda, pasobra e consecuencianan lo ta ireversibel y lo cay pa cuenta toch di Hulanda.

 

Esey ta opinion di e bufete di abogado renombra VanEpsKunnemanVan Doorne riba e impasse entre Hulanda y e tres paisnan autonomo den Caribe, tur cu retonan sin precedente debi na e crisis financiero/economico.

 

E bufete di abogado, cu ta cay bao di mr Randolph van Eps,  dr. mr. Frank Kunneman y oficina di abogado van Doorne na Hulanda, ta consisti di abogadonan den henter Reino. Segun e opinion aki, Hulanda a duna paisnan Caribense den Reino un concepto di Rijkswet Caribische Hervormingsentiteit dia 6 di Juli 2020. E ley aki tin como meta pa sostene e paisnan den Caribe den e situacion di crisis actual y pa promove proyectonan nobo. E base di e ley aki ta articulo 38 inciso 2 di Statuut. Articulo 38 di Statuut ta haci posibel creacion di Rijkswet riba asuntonan di paisnan den Caribe Hulandes bao condicion cu e paisnan ta di acuerdo cu e forma y contenido. Esaki ta e consensus. E acuerdo di ambos banda ta importante pasobra un rijkswet ta riba e constitucionnan local.

 

Organo di Maneho Independiente

 

E proposicion di ley ta inclui un traspaso di autoridadnan importante riba tereno di gobierno y implementacion na un entidad Hulandes, un Organo di Maneho Independiente. E Entidad lo ta controla pa e Minister Hulandes, los di Parlamentonan di e paisnan den Caribe. Den e ley tin poco mencion di proteccion contra decisionnan di e entidad. Pa e motibo aki y tambe otro, paisnan den Caribe Hulandes no por sin mas bay di acuerdo cu e forma y contenido di e ley proponi. Pues, nan lo acepta e ayudo ofreci, pero e proposicion ta mishi nan autonomia profundamente y innecesariamente.

 

Cambio fundamental

 

VanEpsKunnemanvanDoorne a bisa cu no tin un consensus ainda riba e ley aki manera cu Statuut ta exigi. Secretario di Estado di Asuntonan Interior y di Reino a anuncia cu e sosten di emergencia lo para di inmediato si e paisnan no bay di acuerdo cu e contenido di e ley proponi. Esaki a sucede na momento cu el a presenta e ley na Juli 2020. Su motto tabata: “den autonomia bo no por biba.”

E paisnan a compronde esaki debidamente. Pero toch nan ta duda pa, manera gobierno Hulandes ta desea, djis firma na e cruz. E impacto di e pasonan ta mucho fundamental. Esey tambe a keda confirma den un conseho di emergencia di parti di e Conseho di Consulta independiente di Corsou (Raad van Advies Corsou; red). Bon Dia Aruba a trata di obtene e conseho di Raad van Advies di Aruba, cu a bay pa Prome Minister Evelyn Wever, pero no por a haya e texto di e conseho).

 

Raad van State mester opina

 

Pa tal motibo mes, e paisnan kier pa Raad van State di Hulanda duna su opinion den un forma di emergencia, incluso  e historia con el a bin riba papel como proposicion. Un evaluacion independiente y riba contentido asina lo yuda tur hende pa balanza e forma y contenido di e ley,

Gobierno di Hulanda ta nenga te ainda pa pidi un conseho di emergencia asina di Raad van State. Segun Secretario di Estado Raymond Knops, no tin tempo pa perde.

 

Pero segun VanEpsKunnemanvanDoorne, esaki ta un motibo cu no ta cuadra cu realidad. E opinion ademas a menciona cu e argumento ta un ‘drogreden’ cu,traduci na Spaño ta un ‘falacia’ of na Ingles, ‘fallacy’. No tin ningun motibo pakico no por a cuminsa pa duna e di tres tranche di e sosten di liquidez durante e apenas algun siman cu ta tuma pa yega na e consehonan aki cu ta pidi.

 

Crisis economico/social ireversibel

 

Si a para e sosten financiero na augustus 2020, e ora por a asumi cu probablemente economia di e paisnan den Caribe Hulandes lo a cay completamente den otro. E momento ey ta bin diferente problema social economico cu no por draai back. Den cuadro di e asina yama funcion di garantia di Statuut (articulo 43, inciso 2), no ta duna Hulanda otro opcion cu bin cu un asina yama Algemene Maatregel van Rijksbestuur ( articulo 51, inciso 1 di Statuut). E maneho di e paisnan lo ta bao encargo di Den Haag e ora. Esey no ta parce di ta den interes di Hulanda ni tampoco di e paisnan den Caribe. Pues, mientrastanto a keda hopi biaha demostra cu e paisnan for di un punto di vista di eficiencia y efectividad no por keda maneha for di Den Haag. Particularmente pasobra no tin suficiente sosten local.

 

Sabiduria

 

E falta di sosten amplio pa un paso asina, di antemano caba mester ta un advertencia serio pa e fayo di e acercamento Hulandes aki. E lo demostra sabiduria pa ya caba cuminza cu traspasa un parti di e di tres tranche di sosten di liquidez en espera di un conseho di emergencia di Raad van State.

Esaki lo mester forma un base racional pa e consensus necesario y finalmente e colaboracion completo pa ehecucion di e pakete di medida. Y si gobierno Hulandes no kier esaki, anto Parlamento Hulandes lo por pidi pa un conseho di emergencia di Raad van State, ta e opinion di VanEpsKunnemanvanDoorne.