Durante un reunion cu a tuma luga den Parlamento diahuebs ultimo, Minister Presidente, Evelyn Wever-Croes a duna un update di e negociacion cu ta tumando luga entre gobierno di Aruba y Hulanda.

 

Ayera durante un conferencia di prensa e mandatario a bisa cu e nivel politico di e negociacion cu Hulanda ta uno bon y cu respet. Tambe e ta tumando luga den un ambiente habri riba tres punto: Supervision financiero, landspakket y entidad.

 

Nan a logra un avance den e negociacion aki, pero no suficiente den sentido cu nan por bisa cu e pakete cu tin riba mesa, pais Aruba ta acept’e. “Nos ta satisfecho cu locual nos a logra te awor, pero nos no ta cla ainda,” el a declara.

 

El a garantisa cu gobierno no lo acepta un pakete cu ta bay mina autonomia y lucha cu a wordo hiba pa logra Status Aparte. Nan ta buscando un alternativa, entre mantene nos autonomia y percura recurso financiero pa evita cu nos pueblo cay den hamber of pobresa.

 

Pa loke ta e aspecto di supervision financiero, mirando cu Hulanda ta bay presta nos un suma considerabel -mas cu 600 miyon na 2020- nan kier tin un supervision mas fuerte aregla pa medio di un ley di Reino. Gobierno ta purba pa mas bien e supervision financiero keda den un forma di Landsverordening. Pero te ainda Hulanda no kier bay di acuerdo cu esey.

Segun e mandatario no tur cos ta malo den e acuerdo aki. Algo cu e ta considera como un bon paso tin di haber cu e facilidad di fiansa cu Hulanda ta ofrece. E ta uno masha faborabel pa nos, specialmente den e proceso cu nos ta pasando aden debi na e coronavirus crisis, pa activa nos economia. Actualmente mercado internacional no ta interesa pa presta Aruba, specialmente den e momento aki cu nos ta confronta un problema financiero grandi.

 

Supervision financiero

 

Un punto cu gobierno di Aruba ta negoshando tin di haci cu e ley di Reino (Rijkswet) no mester keda habri. E ta haya cu mester stipula ki dia nos lo ta sali afo. Pues loke gobierno ta considera importante den e ley di reino aki pa nos tin un fecha di salida.

 

A pesar di e mandatario su actitud positivo, e mandatario ta haya cu Aruba ta den un punto aworaki cu nos so no por sali afo, y nos mester di ayudo, pero temporal. Segun Sra. Wever-Croes, cualkier ayudo cu nos ta haya awor, e mester ta defini concretamente riba ki dia nos lo sali afo. Te ainda nan ta negoshando riba e punto aki, pero nan por a logra alomenos un formulacion den horizonte.

 

E formulacion ta cu Hulanda kier cu Aruba por cumpli 3 aña consecutivo cu e norma di surplus cu a wordo palabra den e ley di Landsverordening Aruba financieel toezicht (LAft). Igualmente pa pais Aruba tin un cuenta anual riba e diferente surplus y adicionalmente un accounting verklaring cu ta demostra cu e ta un surplus di berdad. Nan no ta rekisitonan cu un pais cu ta respeta su mes, no por cumpli cune. Tampoco e no ta rekisitonan “inhusto ni irasonabel,” el a bisa.

 

El a haci algun calculacion lihe cu ta indica cu na 2029, pais Aruba lo por sali for di Rijkswet di supervision financiero. Kiermen e ta un ley di Reino cu conta pa 9 aña. Pero mas lihe nos baha nos debe, mas lihe nos lo por sali di dje. Pues den forma optimista aki, e ta haya cu e Rijkswet no ta uno pa 9 aña, sino cu ora pais Aruba cumpli cu tres aña surplus y cu tur rekisitonan exigi, nos lo por sali di dje. Pero te ainda e punto aki no ta cla.

 

El a bisa cu Hulanda ta dispuesto pa bay refinancia nos debe pa dos aña te 2022 pa un interes reduci di 2% y no di 4% cu ta e interes cu normalmente pais Aruba ta paga pe. E ta trece un alivio di interes di 82 miyon florin riba e periodo di e fiansa. Ademas nos no mester kibra cabes cu instancia di evaluacion internacional si nan ta ‘downgrade’ nos si of no. Pasobra nos no ta bay depende di nan rating como pais pa haya fiansa for di Hulanda.

 

Landspakket

Encuanto e landspakket of reforma cu Hulanda a defini pa sigura cu nan por haya nan placa bek, un 80% di nan –segun minister presidente- gobierno ta di acuerdo cu nan, te hasta nan ta ehecutando algun di nan.

 

Mayoria di e reforma aki gobierno di Aruba tabatin den su pakete caba. No tin mucho diferencia -segun e mandatario- entre e reforma Hulandes y e reforma “organico” of Master Plan cu ta uno di nos mes. Gobierno lo percura cu loke nan lo palabra den e landspakket ta bira parti di nos Master Plan crioyo.

 

Sinembargo den e landspakket tin punto entre nan edad di pension, cu gobierno ta diferencia cu Hulanda. Prome tabata poni cu ta subi como 66 aña na 2023 y e ta bira 67 aña pa 2025. Pero gobierno a propone cu prome cu nan bin cu e cambio aki, mester bin un estudio riba e fondo di pension mes.

 

Entidad

Pa loke ta trata e entidad cu ta esun cu Hulanda kier bin cune pa canalisa e fiansa pa Aruba. El a bisa cu ora cu nan a lesa e prome version, e entidad aki tabatin un poder enorme. “Mas grandi cu un gobierno y mas grandi cu Parlamento,” el a declara.

 

Minister Presidente a agrega cu a base di e negociacion nan a logra baha e poder di e entidad aki. “Y pone un entidad cu no ta sinta riba stoel ni di gobierno, ni di parlamento,” segun e mandatario. Tambe a bin cu cambio pa loke ta trata nombramento di hendenan den e entidad aki.

 

Den sintesis, ainda gobierno di Aruba ta den negociacion cu Hulanda, y cu nos tin como pais un proposicion ariba mesa. Tin algun puntonan cu nos por acepta, pero otronan cu definitivamente Aruba no por acepta, manera cu nan ta.