Hopi hende homber tin miedo di e “dede”

E luna aki Fundacion Contra Cancer di Prostaat ta bay dedica su mes pa bin cu mas informacion riba e tipo di cancer aki cerca nos poblacion masculino. Nan ta haya cu ainda cancer di prostaat ta wordo trata como un taboe den nos comunidad, ya cu hopi hende homber no kier papia di dje.

No tin cifra actualisa

Cerca e ser masculino, cancer di prostaat ta e di dos mas frecuente na Aruba despues di cancer di cuero. Presidente di e fundacion aki, Jurgen Benschop a bisa cu ta hopi dificil pa haya cifra mas actualisa; pero nan ta wak cu tin un tendencia cu e ta creciendo den nos poblacion masculino.

E ta creciendo no necesariamente pasobra tin mas hende cu cancer di prostaat. Pero di otro banda e ta kere cu tin aworaki hendenan mas consciente cu nan tin cu haci nan testnan. “Esaki ta alentador y positivo na e mesun momento, ya cu esaki kiermen cu haciendo bo test bo ta wordo detecta y por tuma bo remedi y bo tratamento na tempo.”

E cifra cu e fundacion aki tin ta data for di 2007 caminda ta mustra cu e cifra di prevalencia di pashentnan cu e malesa aki a duplica. Nan a bisa cu e malesa aki ta tratabel y curabel. E ta tratabel den sentido cu si bo ta detecta na tempo y e no a plama ainda, e specialista por haci tratamento di radiacion of uza cierto tratamento pa contraresta of elimina completo.

Test y prevencion  

E fundacion aki ta un plataforma pa conscientisa hende homber riba e malesa aki.  E ta haya cu e taboe aki ta debi cu tur hende homber ta kere cu e unico test ta esun di dede; siendo cu  tin otro test cu ta esun di PSA cu ta un simpel test di sanger. E test aki por midi y duna indicacion si tin algun problema cu bo prostaat.

E ta aclaria cu no necesariamente e test ta indica cu bo tin cancer di prostaat, pero e ta un indicacion cu mester tene cuenta cu ne. “Bo por tin un prostaat hincha, bo por tin un infeccion.” Pero ta importante  pa hende homber cuminsa test na tempo.

E patronchi uza mundialmente ta cu hende homber riba 50 aña di edad mester haci e test aki via bo doctor di cas.  Si e ta un malesa cu bo por preveni, el a laga sa cu e cancer ta algo cu por ta den bo DNA.  Pero tambe ta wordo bisa cu un estilo di bida sano manera come saludabel y haci movecion ta contribui positivamente pa preveni e malesa aki.  E test por wordo haci na un edad mas tempran riba 40 aña caba si tin indicacion cu tin of tabatin casonan di cancer di prostaat of otro tipo di cancer den bo famia.

Fundacion

E fundacion aki ta traha hunto cu otro partnernan manera Wilhelmina Kanker Fonds, Fundacion BOB y Mary Joan Foundation cu ta mas dirigi riba ser femenino.  “Pero nos ta haya cu falta ainda  na Aruba un plataforma pa papia riba malesanan di hende homber”.

Considerando cu actualmente fundacion BOB ta bin realisando un campaña masivo di test di mamograam cerca tur hende muhe mayor di 45 aña y menor di 75 aña afilia na AZV, Fundacion Contra Cancer di Prostaat no ta descarta pa bin cu un tipo di campaña masivo pa midi e PSA cerca hende homber.  Pero ainda nan no a bay asina leu pa concretisa algo asina hunto cu otro instancia cu ta traha riba e tereno aki.

Sintoma

Sr. Benschop ta splica cu hopi biaha cancer di prostaat bo no ta sinti dolor, mayoria di biaha ora cu e persona ta sinti dolor, ya practicamente ta un tiki laat. P’esey ta importante pa e ser masculino sa kico ta e sintomanan cu bo ta cuminsa sinti y bay na bo doctor di cas pa haci e testnan necesario.

Nan tin dos aña dunando charla informativo rond di e malesa aki. Nan a acerca varios compania local cu tin un grupo grandi di ser masculino trahando pa nan pa asina hunto cu nan pareha por atende e tipo di charla aki. Nan ta haya cu esaki ta duna un resultado hopi positivo, ya cu e pareha mes ta pusha e ser masculino pa bay haci e testnan necesario.

E fundacion aki a wordo lanta cuater aña pasa pa Sr. Rudy Rodriguez (d.f.m) kende a bira victima di e tipo di cancer aki dos aña pasa, y prome cu el a bay laga nos a stempel e lema atras: “Mi tabata laat, pero abo no mester ta laat.”

Sr. Benschop a bisa cu den e fundacion aki tin varios sobreviviente di e malesa aki. El a interpreta e lema cu nan fundado a laga atras como: “Si bo ta na tempo test nan na tempo, ya cu tur hende por sobrevivi cu e malesa di cancer di prostaat”.

Informacion y conscientisacion

P’esey e luna aki cu ta wordo dedica mundialmente pa conscientisa riba malesanan cu tin di haber cu  hende homber, e fundacion ta sali den luz publico pa informa riba e obhetivo di nan fundacion.

Nan a publica materialnan informativo skirbi na Papiamento den forma di flyer disponibel den consultorionan di Doctor di Cas. Tambe nan a lansa nan website oficial(www.prostaataruba.com) pa divulga mas informacion riba nan fundacion.

Pero fundamentalmente nan kier informa riba kico ta cancer di prostaat, sintomanan y testnan cu bo por wordo haci. Nan tin nan Facebook page cu ta Fundacion Contra Cancer di Prostaat; y tambe nan tin nan e-mail adres: prostaataruba@gmail.com

“Nos kier duna informacion kico bo por haci y con bo contact  nos si tin pregunta y si kier papia mas over di e malesa”, el a bisa.  Pues si tin cualkier hende  cu tin pregunta of kier haya mas informacion riba e fundacion aki of tocante e malesa libremente, bo por tuma contact cu nan.

Mayoria di hende cu ta tuma contact cu e fundacion ta pashentnan cu tin cu bay haci e tratamento afo y nan no sa kico ta spera nan. Ta asina cu algun miembro di e fundacion aki cu a pasa den e situacion aki por splica mas riba e proceso aki. Asina aki e pashent por keda mas trankil durante e proceso cu e ta bay pasa aden.