Mirando e desaroyo cu actual di Covid-19 riba nos isla, e virus aki a trece cune un desafio y reto pa Stichting Reclassering en Jeugdbescherming Aruba.
Di un banda proyectonan cu nan tabata ehecuta pa integra e hobennan aki den mercado laboral a cay atras. Y di otro banda, coronavirus a trece cune un escalacion den violencia domestico y rebeldia cerca un grupo di nos hobennan.
Directora di stichting aki, Seraida Pemberton a declara na Bon Dia Aruba, cu pa loke ta nos hobennan nan ta un poblacion cu ta gusta ta hopi riba caya. Na momento cu e toque de queda (TDQ) a drenta na vigor, autoridad policial tabatin man yen cu e hobennan cu tabata tribi di kibra e reglanan y sali riba caya. Esey ta e hobennan cu Stichting Reclassering en Jeugdbescherming Aruba ta bin hayando.
E efecto di coronavirus a wordo sinti mundialmente, y logicamente na Aruba tambe. Pa loke ta e Reclassering su trabao, nan ta sinti mas tanto cu nos adulto cu a haya un tension ariba nan cu ta wordo refleha riba violencia domestico y violencia pa cu nos muchanan. Principalmente den e periodo cu tabatin e shelter in place y toque de queda, ya cu Aruba no ta custumbra di biba paden. E tension di keda cera den famia sin mucho cos di haci a crea un escalacion den e parti di violencia domestico.
Adicional na e situacion di perdida di trabao, ta un factor cu ta trece tension den hopi famia cu mester ricibi ayudo di pakete di cuminda, ya sea via Fundacion Pa Nos Comunidad of tambe pa medio di Cruz Cora. Tambe stichting Reclassering en Jeugdbescherming Aruba a haci un apelacion na e instancianan aki pa cu nan clientenan. E ta reconoce cu coronavirus a trece cune diferente efectonan mas tanto di presion psicologico.
Proyectonan
Pa loke ta e programanan of proyectonan pa yuda socialisa nos hobennan cu a cay den problema cu husticia a bay un tiki riba ‘hold,’ debi na e presencia di e coronavirus y e medidanan cu a bin despues di shelter in place.
Esaki a haci cu hopi di nan proyectonan cu nan tabata manda nan hobennan a cera. E proyectonan cu Reclassering tabatin, ta pa integra hobennan den e mercado laboral. Nan tabata proyectonan apunta pa Reclassering tres biaha pa siman. Nan tabata haya diferente training pa reenforsa e hobennan aki ora cu nan ta drenta e mercado laboral. Pero dor di e situacion di e Covid, nan mester para e proyectonan aki. Pero unabes cu a cuminsa flexibilisa e medidanan, poco poco stichting Reclassering en Jeugdbescherming Aruba a cuminsa start e proyectonan aki. Pero aworaki cu e cantidad di caso nobo di Covid, e fundacion aki a haya su mes cu mester para temporalmente e proyectonan pa mira con e desaroyo nobo di e Covid-19 ta.
Nan tin diferente proyecto, pero dificilmente nan por ehecuta nan debi na e situacion di e virus aki. Nan tin pa prome biaha tanto mentor cu a aplica, pero Reclassering ta evalua con lo por proporciona e training pa nan, ya cu nan mester bin hunto den grupo. Nan ta training manera maneha bao influencia, training riba maneho di agresion, pero nan ta wordo duna den grupo. Awor Reclassering tin cu baha e cantidad den cada grupo pa sigui dun’e cumpliendo cu tur regla y protocol di DVG. Nan mester sigui ehecuta e proyectonan, ya cu parti di e trabao aki mester sigui, segun directora di stichting aki, Seraida Pemberton.
