Te ainda detenidonan di GNC wardando solucion pa deportacion

Dialuna ultimo, un biaha mas e personanan cu ta deteni na Guarda Nos Costa na Sabana Berde banda di aeropuerto a protesta pa motibo cu nan ta pidiendo solucion pa nan situacion legal.

Mirando e desaroyonan di e virus na e isla, na unda te diamars tin 600 persona infecta cu Covid-19, Bon Dia Aruba a purba di haya un declaracion di minister di Hustici,a Andin Bikker di loke ta trata e protocolnan cu mester a implementa na Guarda Nos Costa y asina evita plamamento den e luganan aki. Pero den e caso aki no por haya contesta di su banda.

Tambe a puntra con e situacion di e personanan aki a sigui, mirando cu algun dianan pasa minister Bikker a anuncia cu den Cumbre di Husticia cu a tuma luga di manera virtual a wordo trata e tema di e personanan sin status legal na e isla y nan deportacion. Di mesun manera e contesta tampoco a wordo haya.

Algun di e detenidonan na Guarda Nos Costa varios biaha a protesta pa motibo cu nan kier bay back nan pais, pero pa via di e ceramento di frontera cu Venezuela esaki no por ta posibel. Mester di un mediacion diplomatico entre Hulanda cu Venezuela, cu te ainda no por a trece un solucion pa e personanan aki por haya un vuelo di repatriacion.

Por a compronde mediante un reportahe di otro medio di comunicacion cu ayera atardi varios detenido a wordo traslada te Guarda Nos Costa di Dakota (Huis van Bewaring). Esaki pa motibo cu supuestamente nan a menasa cu otro accionnan y te hasta crusa e pista di aeropuerto si nan no ta haya un pronto solucion pa nan situacion.

Siman pasa, trahadonan di Guarda Nos Costa na Sabana Berde a ofrece un conferencia di prensa pa medionan local y nan a trece dilanti e situacion hopi delicado den cual nan ta pasando na e momentonan aki. Un di e peticionnan cu nan a haci ta pa nan por haya mas personal, pa motibo cu nan no tin e capacidad pa maneha e cantidad di detenidonan cu ta den e luga aki.

Ademas a solicita material pa asina nan por cuida miho di nan mes. Den pasado nan tabatin arma, pero na e momento aki e cantidad di detenido ta surpasa nan capacidad y nan no ta conta cu esey.