No a invita SIMAR na reunion riba destino di aña escolar nobo

Despues cu a keda conoci cu e siman aki, crisis team hunto cu veld di enseñansa lo reuni pa tuma decision tocante aña escolar nobo, Sindicato di Maestronan di Aruba (SIMAR) a informa cu nan como sindicato no a wordo envolvi den e situacion aki.

Asina Josephine Albertus, presidente di sindicato SIMAR a duna di conoce durante un entrevista pa Bon Dia Aruba, den e cual tambe a expresa cu Gobierno no a tuma contacto cu SIMAR y cu pa nan, esaki ta un situacion di incertidumbre na unda no tin claridad.

El a menciona cu nan ta hayando hopi yamada di maestro pa puntra kico lo pasa. E unico cos cu e por garantisa, ta cu nan lo keda critica, pa motibo cu nan lo no acepta si bin un decision na unda cu e siguridad, salud y bienestar di maestronan y alumnonan no wordo salvaguardia. Esey ta algo cu nan ta haya cu ta primordial.

Di mesun manera, Albertus a splica cu nan ta haya lamentabel cu te ainda nan no a invita sindicato SIMAR, ni por medio di carta ni un invitacion pa un reunion.

Tocante e situacion di aña escolar nobo pa loke ta e incidencia di casonan positivo di Covid-19, Albertus a expresa cu nan mester tin siguridad. El a pone como ehemplo, oficinanan di gobierno y cu te hasta banconan na unda nan ta cerando pa publico y ta trahando riba cita, loke ta nifica menos ora di servicio. Nan como maestro ta traha cu hende grandi y si scol habri cu tin maestronan yen di mucha. No sa tampoco si e 500 maestro lo t’ey y con scol lo draai si nan no t’ey.

“Nos ta haya asina fastioso cu nan a tarda asina hopi sabiendo e situacion di Covid. Sabiendo cu e siman aki caba hopi scol ta habri porta pa maestronan bay scol y prepara pa habrimento di aña escolar”, Albertus a declara.

Ademas, el a comenta cu situacion di Covid no ta algo di awo. Dia 16 di maart scolnan a cera, prome cu vakantie, a habri scolnan un par di siman. “Pues nan tabata sa tambe cu ora nan habri frontera, nan a bisa cu nan no lo sospecha cu no tin caso. Anto e ora ey mi ta bisa, pakico nan no a prepara of sinta riba enseñansa mas prome?”

“Pa e motibo aki mi ta haya lamentabel cu nan no ta envolvi sindicato”, Albertus a señala. Asina mes, el a trece dilanti cu nan ta haya hopi jammer cu na ultimo momento minister di Enseñansa, Armando Rudy Lampe ta bisa cu e no por tuma decision sino ta crisis team, hunto cu minister presidente. E por duna solamente conseho, pero e ora ey e ta puntra su mes, pakico a tarda asina largo?

Tambe Albertus a bisa cu tin docentenan cu ta cay den grupo vulnerabel, tin mucha cu asma y e situacion aki ta fastioso. Agregando e situacion cu internet y device unda cu no tur mucha y no tur maestro ta dispone di esaki, pa motibo cu e crisis aki ta birando pio luna pa luna y nos no ta wak tampoco con minister di enseñansa ta yudando cu nada”.

Di esaki, el a expresa cu ora Covid a bin, minister Lampe no a yuda maestronan, no a zorg pa wak con nan ta soluciona e situacion cu devices pa maestro y pa alumnonan. Na un momento el a menciona cu por regla cu algun compania e pago di esaki poco a poco, pero si un maestro no tin placa con e ta bay haci un pago poco a poco.

Manera Albertus a sigura, na otro luga di mundo si a pone extra placa pa enseñansa y si ta purba di yuda enseñansa. Na Aruba e ta haya cu lastimamente no a wordo haci nada, pa motibo cu desde comienso di e crisis, a saca encuesta na unda a saca afo cu 90% di e maestronan no ta cla pa duna les digital. Y te ainda nan no a haci nada pa e maestronan, pa yuda nan, tin hopi docentenan riba nan mes.

Di loke a wordo kita for di su salario pa motibo di e crisis, Albertus a manifesta cu esey ta net e cantidad di placa cu maestronan tabata usa antes, di nan mesun saco, pa cumpra diferente cosnan pa enseñansa. Y aworaki cu e placa no t’ey nan no lo por haci mas tampoco.

“Mi ta spera cu nan por bin cu un bon decision e siman aki y cu nan a envolve e veld, aunke nan a cuminsa cu SIMAR cu ta representa enseñansa, no a wordo invita”.