SVB ta preocupa. E Seguro di Malesa ta na su limite y e cantidad di casonan di Covid19 y tur cu mester bay den cuarentena ta pone un presion cu e fondo no por sigui carga.

 

Mientras cu comunidad tabata haya shock pa e cantidad di caso di Covid cu tabata detecta,  Director di SVB tabata haya mas tension pa mira kico e contagio enorme aki lo nifica pa e fondo cu ya caba a haya un caida, debi na miles y miles di hende sin trabou.

 

Cuarentena

Segun e Tratado di International Labor Organization, ILO, na cua Aruba ta mara, seguro di malesa, SVB mester cubri e salario di e persona cu ta den cuarentena. E cobertura ta 80 porciento di su salario e momento ey. Manera Bon Dia Aruba a splica den un articulo anterior, pa hopi, nan salario ta hopi mas abou cu normal. E loonsubsidie ta pa yuda trahadonan haya 60 porciento di nan salario y e dunado di trabou ta cubri e otro 20 porciento, of nan ta traha menos ora pa ahusta na e realidad nobo.

 

Pero den caso cu nan ta na cas, nan ta ricibi 80 porciento di  nan salario cu SVB of e seguro di malesa ta paga y e doño di trabou ta responsabel pa e resto. Pa e prome tres dianan, ta e doño di trabou ta cubri e salario completo. Den e siguiente simannan, te cu 6 siman, e trahado ta ricibi 100 porciento di su ultimo salario, di cual 80 porciento ta cubri pa SVB. Y despues di e 6 siman, SVB ta carga 80 porciento di e ultimo salario, y aki e dunado di trabou no ta paga nada adicional mas. “Pues e trahado tin derecho di 100 porciento di su salario pa 6 siman. Pero mester tene cuenta cu e beneficio ta basa riba e salario real ora cu e persona mester avisa cu e ta AO (Arbeidsongeschikt).”  Pa ilustra esaki miho, si e persona normal tabata gana 100 florin y su salario a baha na 80 florin,SVB ta cubri 48 florin y e doño di trabou mester agrega 12 florin.

 

Cuarentena den sector publico

Contrario na sector priva, ambtenaarnan y otronan cu ta traha den sector publico y mester bay den cuarentena, “esaki ta bay for di nan dianan di vakantie.” E areglo aki ta pa tur cu ta ricibi fondo publico pa salario. Si tin e malesa, y mester bay den isolacion, e ora Gobierno ta cubri e salario. Den sector priva, e seguro di malesa ta cubri e isolacion. Y manera ta conoci, e cantidad di persona cu awor ta den isolacion, ta e cantidad mas halto registra den historia di e cobertura di salario pa malesa.

 

Fondo por paga?

Riba e pregunta si e fondo di malesa por wanta e sla financiero aki, e contesta tabata simpel: “No.”  E fondo di malesa no lo tin suficiente placa pa cubri tur e slanan aki. “Te ainda nos no tin un bista exacto con e situacion ta. Pero e ta bay subiendo. E tin nos hopi preocupa.” E cantidad di hende infecta y e cantidad enorme den cuarentena no ta conoci formalmente pa SVB ainda. Ta spera di haya e cifra aki pa diamars. “A logra wanta e fondo di seguro di malesa na Maart y April, pero manera cu e situacion ta bayendo  awor aki, e no ta mustra positivo.”

 

Bancarota
Riba dje trahadonan cu acudi na SVB pa haya sa cuanto nan dunado di trabou a ricibi pa nan subsidio di salario, esta loonsubsidie, ta haya nan mes cu abogadonan cu ta cla pa kita nan di trabou. Mester bisa cu e areglo di loonsubsidie ta pa companianan cu ta compromete cu nan ta keda cu nan trahadonan.

 

Sinembargo, manera ATIA a mustra, hopi biaha e loonsubsidie ta djis pa yuda algun luna, y ta yuda den minimalisa e daño, pasobra e no ta cubri tur e gastonan fiho. Pues no tur compania lo por wanta e sla financiero. Aunke no a haya hopi ciere oficial, uno grandi e siman aki tabata e anuncio di bancarota di Hard Rock Cafe Aruba. Ora cu a señala esaki na Sr. Jacobs, su reaccion tabata hopi sobrio. “Awor nos ta bay haya e ola di bancarota.”