E dinamica di mercado di petroleo y gas a cambia, caminda perspectiva di mercado di petroleo ta mustra menos faborabel cu esun di gas pa futuro. Sinembargo e poco demanda di gas den Caribe y e transportacion di dje, ademas di falta di infrastructura, ta haci cu su prijs ta resulta costoso.
Prof. Edward Glab (Ph.D) y Dr. Eduardo Del Valle (Ph.D) a realisa recientemente un presentacion den cuadro di e seminario “Aruba’s best option for Feeling Its Future”, organisa pa AruGas pa celebra nan 75 aña di existencia. Hopi informacion a wordo duna caminda nos lo trece dilanti algun puntonan importante cu nos mester tene na consideracion
Dinamica di mercado
E prijs di petroleo lo no crusa atrobe e barera di 100 dollar pa bari prome cu 2020 pa 2025. Esaki ora e produccion di shale di Merca lo cuminsa baha poco poco, segun Nubuo Tamaka kende ta ex director di Agencia Internacional di Energia di Union Europeo ubica na Paris
Den su disertacion Dr. Glab a indica cu na largo plaso e demanda di crudo na paisnan manera China, India, Asia sur oriental y Africa lo por subi e prijsnan global. El a uza como fuente e declaracion cu Tamaka a haci durante un entrevista na Abu Dhabi. E prijsnan lo no subi asina facil manera antes pa via cu e produccion di shale ta un indicador di mercado nobo, y esaki lo keda asina por lo menos pa 10 aña.
Mientras cu Iran a bisa cu lo subi su exportacion di petroleo na 500 mil bari pa dia, denter di seis luna di lantamento di sancion nan, y lo subi na un miyon bari denter di 18 luna. Kiermen mas oferta riba e mercado di petroleo cu lo tin su efecto no faborabel riba aumento di prijs.
Proyectonan Gas Natural Likido (LNG)
Pa aña 2020 lo tin 104 proyecto (63 plania y 41 operacional) den 27 mercado LNG rond mundo.
Nan a cita cu di acuerdo cu Goldman Sachs, hopi di e proyectonan aki lo por wordo cancela of enfrenta tardansa debi na obstaculo nan di regulacion y proyectonan cu a keda para.
E dimension di e mercado global de LPG a wordo stima 219.43 biyon dollar na 2013. Ta spera cu e mercado global aki lo crece mas riba un averahe di 4.8% cada aña di 2014 pa 2020. Esaki si e gobiernonan nan regulacion ta mas faborabel y nan subsidionan, tanto na paisnan desaroya como den esunnan no desaroya. E mercado mas grandi den region di Asia Pacifico ta spera un crecemento di 5% pa aña
E mercado LPG di Europa a wordo balora riba 36 biyon dollar na 2013, y ta spera cu lo tin e crecemento mas slow di e region den futuro
Den diferente pais desaroya y no desaroya, e LPG ta reemplasa e carbon como combustibel pa cushina, debi cu ta accesibel cu mas facilidad, costo abao y consideracion cu nan medio ambiente.
Di otro banda e uzo di gas natural ta wordo uza mas cu antes pa trucknan comercial y mashinnan pisa cu ta uza diesel. E plan ta pa uza un mescla di diesel y gas natural cuminsando cu un 50% pa yega na 90%, pa elimina of modera e problema di conversion.
Retonan pa refineria di Caribe
Profesor Del Valle a indica cu e refineria Hess na St. Croix y Valero na Aruba ta reuni tur e criterio pa genera ganashi. E reto mas grandi pa cuminsa ta tocante e costo di e combustibel, cual ta un desbentaha compara cu e refinerianan di e golfo y gastonan di adkisicion di e crudo.
El a señala como ehempel cu refinerianan chikito manera esun di Republica Dominicano, Jamaica, Martinique y Nicaragua lo sigui nan operacion tanten cu e gobierno lo sigui subsidia y “proteha” nan operacionnan.
Igualmente el a mustra cu e suministro den Caribe a haya dificultadnan mas compleho debi na e ceramento di refineria Valero, refineria Hess y e refineria Isla.
Hopi pais nan den Caribe tin tiki alternativa riba e tereno aki, y nan ta cumpra combustibel Mericano y nan ta paga prijs mas halto den costo nan di transportacion di US Golf specialmente na luga nan chikito.
E logistica di transporte di Aruba ta hopi superior cu otro isla nan chikito. Profesor Del Valle a señala cu Valero ta opera e terminal di e isla y por trece carga nan mas pisa na su terminal.
Den su disertacion el a laga algun preguntanan pa nos reflexiona riba nan, manera: E islanan di Caribe, specialmente Aruba, lo mester cuminsa mira forma di cambia pa energia mixto? Ki alternativanan Aruba mester considera, si tin na cuenta e tendencia actual, specialmente e aumento di disponibilidad di combustibel menos caro, manera gas natural y LPG . E uzo di LNG (Gas natural likido) ta un alternativa factibel pa nos isla nan?…y pa Aruba?
|
LNG ta un alternativa pa islanan di Caribe
Actualmente LNG no ta un alternativa factibel pa e islanan di Caribe, ya cu e ta resulta hopi caro pa handle pa un demanda abao. Tin mester di 750 pa 1500 MW power units, pa sigura suficiente demanda di LNG.
Pa LNG bira un alternativa pa islanan di Caribe meter tin na consideracion tres condicion:
Un terminal cu tin capacidad pa barco di a lo menos 130 kdwt cu 45 pa 50 pia draft.
Suficiente demanda di coriente pa mantene un planta 750 MW den uzo constante. Algun hende ta sugeri cu mester demanda electrico mas halto te hasta 1500 MW, manera e caso di Republica Dominicano, unda mester pasa gas den tubo te hasta 30 kilometer leu for di terminal.
E habilidad pa financia of atrae inversion priva pa un terminal cu por costa te hasta 400 miyon dollar.
Profesor Del Valle a laga sa cu solamente tres isla den Caribe ta reuni e tres condicion anterior, nan ta: Republica Dominicana, Puerto Rico y Trinidad y Tobago.
