Ta un realidad dificil di acepta pero… Negoshi di bar y prostitucion ta draai economia na San Nicolas

Masha poco actividad economico nos por wak na San Nicolas. Varios negoshi a cera nan porta caba, y otronan ta luchando pa sobrevivi. Esaki no ta un caso excepcion den henter nos isla, despues cu e pandemia di coronavirus a dal nos principal pilar economico, un golpi duro. Pero San Nicolas ta un caso singular.

Situacion dificil

Prome cu nos a conoce e crisis di Covid, San Nicolas tabata pasando den retonan grandi. Te hasta San Nicolas Business Association (SNBA) a yega di organisa un cumbre pa busca alternativa cu por yuda re activa economia di San Nicolas y bisindario, despues cu refineria a stop di funciona.

Durante un entrevista cu Bon Dia Aruba, presidente di SNBA, Andres Hernandez, a yega di bisa recientemente cu no por nenga cu e impacto di e Covid crisis ta afecta henter nos isla. Pero San Nicolas tabata den un estado dificil economicamente, y awor ta pio.

SNBA tin alrededor di 120 miembro, pero aworaki cu e crisis aki, nan ta wak cu por lo menos nan lo baha mas cu un 20% pa 30%. Esunnan cu ta pasando den duro ta e negoshinan chikito, entre nan e negoshinan di paña. Nan ta luchando pa keda habri, pero tin negoshinan cu ta paga huur, y nan no ta genera suficiente entrada pa cumpli cu nan compromisonan.

A pesar di esey tabatin negoshi cu ainda tabata draai. Pero despues cu a bin cu un serie di medida di shelter in place y Toque de Queda cu a categorisa cada sector economico como esencial y no esencial, cantidad di negoshi cu ta draai rond di e barnan estableci den e zona di tolerancia pa eherce un di e trabaonan mas bieu di humanidad, a bay failliet.

Ta dificil di reconoce cu e barnan aki cu ta bira tema di critica y nan ta mal mira, ta bira un gran catalisado di actividad economico na San Nicolas. Alomenos parcialmente, pero si den forma substancial den nan caya principal. Esey ta wordo mira aworaki. A esar cu diferente negoshi di paña, restaurant, botica, luga di manda divisa, supermercado, beauty salon, etc… ta habri, masha poco cliente ta bishita nan. Tin algun di nan cu a baha prijs di nan productonan te hasta un 50%.

Actualmente cu e flexibilidad di diferente sector pa reactiva nos economia, ta permiti cu e barnan mag di habri, teniendo na cuenta tur regla y protocol stipula. Pero esunnan na San Nicolas nan principal atractivo no t’ey. P’esey un gran mayoria di nan ta prefera di sigui cera, te ora cu e frontera cu Colombia y Republica Dominicana ta habri bek y nan trahadonan sexual lo por bini brinda nan servicio bek. Ademas ayera nochi e crisis team a anuncia cu e barnan y night club lo keda cera, te ora cu nan ta bin cu otro anuncio pa nan.

Trahadonan sexual

Den e asina yama ‘zona cora’ tin 34 bar caminda den tempo normal 124 hende muhe ta eherce prostitucion den forma legal.

Cada bar tin derecho pa haya permiso pa 4 trahado sexual. Kiermen cumpliendo cu nan permiso di tres luna, control diplomatico y di inmigracion pa evita e trafico di hende pa eherce trabao sexual contra nan boluntad, y tambe cumpliendo cu tur control di higiena di DVG. E perfil di nan trahadonan sexual ta entre 18 pa 40 aña, alegre, cariñoso y bon papiado.

Despues cu a dicidi di bin cu e lock down, mayoria di e hende muhe aki a bay pa nan pais bek, Colombia y Republica Dominicana. Pero un grupo di 31 no por a logra bay na tempo, y nan a keda te ora cu a bin e alternativa di vuelonan humanitario.

Na final 18 di nan a keda. Nan a keda eherce nan trabao, a pesar cu e bar tabata cera. Normalmente nan orario di trabao cu nan mester cumpli cu e doño di e bar ta for di 7’or anochi te cu 2’or di madruga. Prome of despues di e orario ey, e “damita” por “rebusca” su mes cu algun cliente cu ta bin busca nan. Of tin algun di nan cu ta tribi di bay den luganan di hopi actividad pa pisca nan.

Pero te hasta pa e trahadonan sexual aki, coronavirus crisis a afecta nan servicio y nan entrada. Prome cu Covid, mayoria di e clientenan di e bar na San Nicolas tabata hende local. Pero tin bar di cierto caliber y espectaculo special cu ta haci cu nan clientenan ta mixto, entre turista y local.

Pero aworaki nan negoshi a mengua hopi. Ya cu no tabatin mucho turista, y esunnan cu ta bini, tin otro motibo pa bishita nos isla. Pero di otro banda masha poco clientenan local ta busca nan servicio, ya cu e nivel di desempleo ta grandi. Te ainda e situacion ta mescos. Ademas prostitucion ilegal a aumenta na Playa, y te hasta den otro barnan cu no tin e tipo di permiso aki. Tin cierto casitanan di prostitucion na San Nicolas locual a haci cu e negoshi a bira hopi mas competitivo pa esunnan cu ta eherce e servicio legalmente. Tanto asina cu nan mester a baha nan tarifa, mescos cu e tiendanan di paña.

Si antes haciendo uzo di Google Translation nan tabata cobra e turista entre 50 pa 70 dollar pa un rato. Awor nan ta cobra entre 30 pa 50 dollar pa esunnan cu ainda ta tribi di bay cerca nan.

Pero nan tarifa pa hende local tambe a baha. Antes nan tabata cobra 75 florin pa nan servicio sexual. Awor e prijs a bira 50 florin, te hasta menos pa un ‘quick.’ Esaki ta depende di e cliente. E hecho aki ta haci cu esunnan cu ainda t’ey pa ofrece nan servicio sexual, masha poco nan ta gasta na San Nicolas. Nan prefera di spaar nan tiki entrada pa yuda nan famianan den nan pais di origen.